![](https://utusansarawak.com.my/wp-content/uploads/2020/11/2.-beduruk-ngaga-tekat.jpg)
![](https://www.utusansarawak.com.my/wp-content/uploads/2020/11/2.-beduruk-ngaga-tekat.jpg)
BEDURUK BERENGKAH ARI KELIA
Endang sigi udah utai teleba digaga tauka diatur kitai bansa Iban pengawa beduruk kenyau ari kelia.
Duruk tu mayuh macham tang nadai lebih ari duruk bumai berengkah ari nebas nyentuk ngagai berangkut udah tembu ngetau.
Atur beduruk tu sigi dipaumka dulu, iya nya sebedau manggul umai. Orang serumah nya deka nentuka nama duruk umai ti deka diatur. Tu berengkah ari nebas, nebang, nunu, nugal, mantun, ngetau, ngindik nyentukka berangkut mai pulai padi ke rumah panjai.
Malam sebedau nurun tauka tumu agi, orang diri sebilik ti ngempu duruk deka baum enda lama.
Aum sida nya pasal atur pengawa hari siti. Enti nya duruk nugal, atur bagi pengawa nya nyengkaum sapa ti ngema benih, mai tugal, mai takin, mai raga, mai semua keresa kena nugal. Bisi mega orang ditentuka mai lauk baka jani tauka manuk, asi sereta enggau lauk bukai kena merarau tengah hari duruk nya.
DURUK NEBAS, NUGAL NGERIDUKA ATI
Duruk ti chukup ngerinduka ati nya nebas enggau nugal. Kebuah pia, laban penulis teleba agi enggau dalam duruk tu lalu bisi cherita ngasuh ketawa.
Laban ti beduruk nugal kelia, pengawa nugal tu nyau deka sama sebaka enggau pengiruh nyendiaka gawai laban mayuh orang enggau sereta dinahka merarau. Mayuh mega bala indu enggau lelaki ti diberi tanggung pengawa mela lauk, bepandukka utai dempa, nyengkaum manduk ai angat kena ngirup kupi. Kekadang bisi ga orang sepintu nya udah nyendiaka bubur ambika kena muai aus maya ngetu pukul sepuluh pagi. Nyadi lebuh orang ke nugal sepagi nya bisi ga sekeda bala indu enggau lelaki ke nembiak agi diberi pengawa nyendiaka utai ka empu enggau irup maya ngetu pukul 10.00 pagi, iya nya kena menggal sebedau ngetu merarau.
Mutar ngagai siti duruk nebas kelia ba tapak umai kami sebilik, enda mukai-mukai pelanduk belanda mansa bala ke nebas lalu ulih pantap siku apai tuai orang ti sama enggau nebas. Parai meh tudah pelanduk nya lalu dibela ambika lauk bala merarau tengah hari nya. Aku baru angkat bujang maya nya tang penatai pelanduk nya nyadika burung manah dikumbai orang “laba”. Amat manah meh, laban ujung taun nya menyadi tuai ari aku lalu bulih bini. Diatu umur iya udah manggai 72 taun lalu bisi anak lima iku sereta uchu lima iku mega – dua iku anak lelaki iya sama ngembuan degree ari universiti menua tu. Nya alai endang amat munyi ku orang laba tu sigi burung manah.
MABUK NGIRUP KOPI
Nyadi pulai ngagai siti cherita ti tau ngasuh sinu, tau ga ngasuh ketawa, lalu tau ga ngasuh rindu, ka tambah mega nyadika pelajar. Tu ngenang cherita duduk nugal alai tudah pangan mabuk kupi beduduk ari pekit ngirup kupi maya ngetu jam pukul 10.00 pagi. Tegal minta puji (ke tambah mayuh indu dara) penulis ulih ngabiska kupi dua igi jalung tang ngujungka mabuk lalu enda ulih enggau merarau belauka manuk gulai daun ubi tengah hari nya.
Anang pelita-pelita enti ngirup kupi kelalu mayuh, endang amat mabuk. Enda asai mabuk tuak, mabuk arak iya wai. Tulang naka iya pengelembut, deka bediri pala sebening ngelu lalu deka tumbang. Rangkai meh ngeli bala sida ketawaka aku laban maya orang nyirut penyamai kuah manuk gulai daun ubi lebuh merarau nya, tudah pangan endang mina ninga aja laban apin ulih angkat, pala agi ngelu. Mutah nadai ga tang pala ngelu lalu semampai tebimbing enti dibai angkat. Nyau ngalih hari udah bekau peluh laban kum panas ba langkau sida baru aku ngeleda angkat lalu dibela siku indu dara makai – mayuh lauk digalau sida ka aku. Jani guring pan bisi meh, ukai mina manuk gulai daun ubi aja, tang nyawa numbas bendar laban udah bekau mabuk kupi. Tu tau ga nyadika pelajar. Sigi tau ngasuh jera ngirup kupi kelalu mayuh, kelebih agi mata hari panas terit.
NYEDIAKA DIRI SEBEDAU NUGAL
Mulai ngagai pengawa ngemunka nugal, lebuh udah datai ba tegalan umai, lalu nudukka takin tauka sintung benih. Sida lalu ngidupka api. Bala mayuh lalu begempuru ba palan, selalu nya ba mua langkau, enti udah bisi langkau, tauka ba serunggu ti nyadi ka palan sida.
Orang empu pengawa lalu mantaika piring ading kena bepinta ari Petara, ari Simpulang Gana, ari Samarugah Petara Tanah, ari Seragindi Petara Ai, ari Aki Lang Sengalang Burung, Ari Aki Jugul Menaul Tuntung, Ari Petara Aki, Petara Ini.
Udah semua orang jenuh begulu ba tengah laman, dia siku tukang biau lalu diasuh miau piring ngena manuk ti endang dibai ungkup kena miau piring. Manuk nya deka disayat tembu biau lalu darah iya kena enselan benih, rengka kena nugal enggau menih enggau sekeda lubang tubal.
LEKA SAMPI MAYA BEBIAU NUGAL
Sekeda ari leka sampi engka bisi semunyi enggau tu.
“Sa, dua, tiga, empat, lima, enam, tuuujuh! Oh…ha, oh…ha, oh…….ha!
“Nama utai ti nyedu baka munggu, munyi sanu sinu bejaku nusui cherita? Nama ti ngangau di kaki rantau, munyi papau ugau mutus chara?
“Nama ti ngukuk munyi tajai, ngukuk di dan pengerawan benang? Nama ke nyidit munyi landai, nidit dalam lubang?“Nama ti ngensung munyi sengayan? Nama ti engkebab munyi sempidan? Nama ti bedarup munyi bandir? Nama ti meletup munyi bedil?
“Nama ti merauk munyi kijang? Nama ti ngangau munyi orang?
“O……..nya aki kami ti berani mati tuai bulu, laban iya makai tegalan makai reban, makai di umai, makai tembawai, nanam padi pun, padi taun, padi puting, padi sangking.
“O……..sapa dikangau, sapa ke ditesau? Sapa ti dipadah, sapa ti ditelah deh? Sapa diensung, sapa dipulung deh? Kami ukai ngangauka orang ti nginti, ti meti, ti nubai, ti mansai, orang ti ngasu ti beburu, orang ke rubik baju charik.
“O….enti pia, kami tu ngangauka Pulang Gana meh kami tu, Bujang Jangkang Kirai Raja Sua, Bujang Sempulang Gana.
“O……ha….Oh…..ha……….O…..ha! Ni orang tI teleba bediri di mua padi, betunjang di mua tibang deh? Bujang Pulang Gana, Jangkang Kirai Raja Sua? Nya sigi orang nulung, orang mandung, orang meda, orang nela, nanam padi taun, padi puting padi sangking!
“Sapa ti dikangaum ditesau? Sapa ti dipadah, sapa ditelah deh? Orang di ili apin diambi, sida di ulu apin nemu, orang tengah apin dipadah.
“Ngangau Luta Telenga Telengguk, duduk bepanggai lampung, Bunsu sintung penuduk berambing timbang, beranakka Lanyung Lanchung Patung, Betis Lupis, kaki laka nyingkang batang.
“Ngangauka Dara Tuai, ti parai bebayaka tikai tambun, Dara Biak beminyak ai ambun, Bunsu benih buntih padi pun, bekedengkun pulai ke serangan.
“Ngangauka Dara Jawai Bejalai Niti Tinting, Dara Biak Tampak Bebanding, Bunsu benih buntih padi sangking, enda kala bula ka puting tekeliling tandan.
“Ngangauka Jawai Bejalai Ampai Sesumba, Dara Biak benih buntih padi paya enda kala bula ka semaya tibang mengentam.
“O……ha…………Oh…………ha………Oh……….ha! Runti-tali sabut, Dayang Jerenang Ujung Kukut, Bunsu benih padi pulut, enda kala bula ka selimput puting papan.
“Ngangauka Lengayun Pantun Kedumu, bejalai enggai dudi deka dulu. Bunsu rampu tumbuh di munggu, tiga bulan belunggur ujan.
“Nyaguka senakan buntang meriran lalu entapu, Bunsu Kumang Tekang Pirak, gatak-gatak diau di tapa dada jari, Kumang Mandi Gelenggang Ai Minyak, penampak mua puchung penguji.
“O………..ha……..O………..ha…………O………..ha! Diatu baru ngangauka orang di pun selengking pisit, baka dijir entak tiang, orang diau ba dan rian nyangkit, baka lepi sanggul sintung.
DURUK ULIH NGASUH TEKAIT ATI
Nyau pulai ngagai bala kami ti beduruk nugal, gaya peda penulis, taja pan ari sekula nengeri besai (Kuching), engka tak bisi ga sida bala petunggal tekaitka bala kami bujang menua ulu tang laban nadai ari betundi maya ke nugal, semua peneka ati din disimpan pia aja. Tang nya tau mega nyadika peransang lalu ka pemun tali ti nyantil pengerindu ka pangan. Kebuah pia, ukai ba aku empu, tang ba tubuh bala diri petunggal, diri serumah bukai, pengerindu ka pangan diri bepun ari duruk nugal nya. Enti merati diatu, nya endang diagihka Petara, laban ba gaya peda penulis diatu sida ke bekelala sereta beteleba maya nugal nya ti jadi melaki bini udah mujur beranak betelesak, lalu udah nyapai pemujur dalam pengidup sida. Tu bepun ari siti duruk nugal kelia.
DITULIS TELESA EMPERAN