![](https://utusansarawak.com.my/wp-content/uploads/2020/08/Caption-2.jpg)
![](https://www.utusansarawak.com.my/wp-content/uploads/2020/08/Caption-2-1024x682.jpg)
SABAR ati ngereja pengawa nya akal ke pemadu badas kena nyapai juluk ati. Ba kontek ngeluarka album, sabar beguna bendar laban pemujur siti-siti album enda ulih dijangka. Lagu ke dikumbai kitai badas nyangka bedau chukup badas ba ati peminat. Sekeda lagu ke enda disadang kitai ulih nyadi popular tau mega nyadi lagu hits. Ari atas semua, peminat mih ti nentuka pemadas siti-siti lagu. Kelimpah ari peminat, chara promosyen nengah sosial media mega chukup beguna. Kelimpah ari nya, radio mega siti media ke pemadu badas dikena ngelakuka siti-siti lagu / album baru.
Betemu baru kitai ba ruang pemerindang ke minggu tu. Sekali tu kitai deka begulai enggau Mark Benet ke udah popular enggau lagu Asal Jadi. Terubah datai ngagai dunya pemerindang dalam taun 2005 suba begulai enggau Dara Hellena. Mark Benet ti bendar udah kala ngeluarka siti album solo Tanda Pengingat Tua. Album nya suba dikeluarka kompnei rikot JMP ti bepalan di Sarikei dalam taun 2012. Ketegal kelalu kiruh gawa sebelah menua orang, album nya suba tau dikumbai enda chukup promosyen ti ngujungka iya enda tentu ditemu peminat. Taja pan pia, pekara nya enda muntanka juluk ati Mark Benet ke deka nyadi penanyi tebilang baka sekeda penanyi popular di menua kitai tu diatu.
ALBUM KETEGAL NGUAI TUA BESERARA
Album Ketegal Nguai Tua Beserara diatu udah dijual ba kedai nyual CD / VCD di serata Sarawak. Entara lagu ke bisi ba album Ketegal Nguai Tua Beserara nya Lelengau Ke Bekau Lama, Ketegal Nguai Tua Beserara, Asal Jadi, Enggai Dikeduan, Pengerindu Enda Lebu, Pengerindu Enda Padam, Indu Meligai Dunya enggau Kaya Semalam.
Lagu ba album Ketegal Nguai Tua Beserara dirikot ba PROJAM Studio ti betuaika Ajis Projam tang dikeluarka nengah Kaban Music Proiduction (KMP) di Kuching. Diatu album kedua Ketegal Nguai Tua Beserara tu udah bisi dijual ba kedai CD / VCD.
“Aku arapka peminat lagu Iban meli CD / VCD ke original. Ngena chara meli iya ke original nya siti ari jalai kitai ulih munaska pengawa ‘cetak rompak’ / piracy. Enti kitai majak meli VCD tiru, dia lagu Iban tau puntan pia aja laban bisnes ngaga album sigi nadai mai penguntung,” ku Mark Benet ngepunka saut iya ba randau kami duai.
Ditanya nama lagu ke dijangka ulih nyadi lagu popular, Mark Benet ti mega nemu bemain muzik (gutar enggau keyboard) madahka, semua lagu ba album Ketegal Nguai Tua Beserara badas magang.
“Semua lapan iti lagu ba album tu badas magang. Kebuah pia laban genap iti lagu bisi cherita enggau jerita kediri. Tiap iti lagu mega enda sebaka rentak lalu iya manah didinga semua peringkat umur. Taja pan pia, lagu Asal Jadi nyau baka ke nyadi lagu hits ba album tu. Kebuah pia laban lagu nya suah dipinta bala peninga ba radio. Aku beterima kasih ngagai bala peninga lalu terima kasih mega ngagai semua DJ radio,” ku Mark Benet sekali agi mantaika penemu diri.
MUZIK ENGGAU LAGU IBAN
Ngenang kualiti lagu Iban maya ke diatu, Mark Benet madahka diri enda tentu irau laban lagu Iban diatu ku iya nyau majak badas.
“Lagu enggau muzik kitai Iban makin bekualiti laban nyau majak mayuh komposer enggau pemuzik baru ke landik. Sida nya ukai semina landik pia aja tang sida mega ‘kreatif’. Sida mayuh peneleba ari ke meda lagu orang bukai lalu mayuh mega menua udah ditujah. Sekeda ari muzik lagu Iban diatu udah jauh nyelai ari muzik lagu Iban ke dulu suba. Nya mih siti pemansang ti chukup badas,” ku Mark Benet.
Sebengkah agi pekara ke chukup beguna nitih ke penemu Mark Benet nya kaul enggau pangan diri. Kaul ti badas enggau artis sama artis, artis enggau peminat tauka orang bukai ulih ngangkatka pemadas lagu Iban.
“Enti ulih, biar mih kitai begulai sejalai ba industri tu. Ngena chara nya kitai ulih bekunsika mayuh penemu ti tau mai pemadas. Buai mih ati dengki tauka kepapaska pangan diri. Penemu ke baka nya sigi nadai mai penguntung tang semina nanggul runding enggau kaul entara diri sama diri,” ku Mark Benet bekunsika penemu diri sentang kaul entara raban artis enggau semua ke ba dunya pemerindang.
PAGE & INSTAGRAM
Ngagai semua palan pemerindang tauka sapa-sapa ti deka ngangauka Mark Benet belagu / merindang, kita tau betanya ari iya empu nengah page facebook enggau instagram markbenet_enggaidikeduan.
“Kelimpah ari instagram, kita tau inbox aku terus ba facebook aku. Terima kasih besai ngagai semua kita lalu arapka kitai ulih betemu ba menua kita tauka palan ti deka endur aku merindang,” ku Mark Benet.
Ngena peluang tu kitai arapka Mark Benet terus mujur nyadi penanyi ti dikerindu. Kitai mega ngarapka iya ulih ngaga mayuh agi lagu ti badas baka Asal Jadi ke diatu dipasang ba radio nyau ka ninting hari.
“Aku minta ampun laban enda ulih nyebut semua nama orang ke selalu begulai sereta mantu aku ngelama tu. Sida nya mayuh peneleba ba dunya pemerindang. Ba aku sida nya chukup berega laban sida ulih meri kitai penemu kena ngangkat sereta ngemansangka diri. Terima kaksih ngagai semua peminat aku, DJ radio, raban pemberita enggau bala pangan aku ke bukai ke enda ulih sebut aku ditu magang,” ku Mark Benet ke teleba enggau penanyi Urai Rosiana, Riena Will, Dom Romeo, Winnie Albert, Ricke Andrewson, Tony Engkabi, Florence Lo, Lucy M, Watt Rock enggau mayuh agi sida ke bukai.
DIKARANG MR TUBAI PENGERINDU