KENA ngenukuka bala nembiak enda lalu putus kaul enggau alam samulanyadi beduduk ai sekat pejalai ketegal Covid-19, Aim Smart Academics Sdn Bhd ke lalu nyadi anak serikat ngagai Smart Reader® Worldwide Sdn Bhd udah bulih runding projek kebun nengah mai bala anak mit betanam spesies Belalai Gajah.
Dikemujur nengah kerejasama Sarawak Biodiversity Centre (SBC), utai tumbuh tu tau nyadika ubat diagihka ngagai 14 buah pra-sekula di baruh brand `Smart Reader Kids® di Kuching bedau lama ke udah.
SBC ke nyadi agensi pemansik negeri nyediaka utai tumbuh ke ngembuan nama saintifik, Clinacanthus nutan ngagai piak sekula, nyengkaum mantu dalam aspek teknik betanam enggau bekebun.
Nambahka nya, utai tumbuh tu disikap enggau kod QR kena ngemuntang bala pemansik, bala anak mit enggai apai indai kena ngulihka mayuh agi penerang ba sentang utai tumbuh tu nengah telefon pintar.
Nundaku Menijer Pemansang Operasi enggau Marketing Aim Smart Academics (Malaysia Timur), Norma John, projek baka tu ulih nerenak pengerindu ba sentang alam samulanyadi dalam anak mit, kelimpah meri penemu enggau peneleba baka ni ngintu utai tumbuh tu.
“Kami pechaya kami ulih nyungkak penyedar sereta minat sains enggau alam samulanyadi nengah rapat sereta medium ke bebida anak mit; ku iya pengudah udah nerima utai tumbuh nya ari pengari SBC, Tu Chu Lee.
Tu Chu Lee ke lalu nyadi Pemesai Pemansik Program Dokumentasyen Ilmu Asal di SBS madahka, Belalai Gajah muntang diintu lalu ditanam nengah nanam batang.
“Siti pansik nunjukka utai tumbuh tu nadai berachun lalu selamat ditanam ulih anak mit enggau chara nanam batang, awakka nambah pemayuh,” ku iya.
Seraya nya, Norma meri jamin aspek pengelikun tetap dikemeran sida, nya alai seraka rama dipejalaika maya program tu.