SARATOK: Pengempu kerusi Sitak Kunsil Negeri (DUN) Krian, Datuk Ali Biju bediri nyadi chalun ngatika diri kena ngetanka penuduk iya ungkup renggat ketiga dalam Penggawa Bepilih Besai Negeri (PRN) Sarawak ke-12.
Entelah sekalika Sapit Menteri Tenaga enggau Pengeraja Asal nya deka ngetanka penuduk nya besaut lebuh iya datai di Palan Ngantung Nama Chalun (PPC) di Dewan Masyarakat Sri Krian ditu nyadi chalun ngatika diri menggau lambang kerusi.
Iya ke mega raban parti Bersatu datai jam 9.02 pagi di balai nya ngenjukka keretas chalun ngambika iya tau bediri.
Seraya nya, Pemesai Menijer Pengawa Bepilih Besai DUN Krian, Bilong Engkas nebah kerusi nya diperebut antara tiga iku agi chalun nya Musa Dinggat ngarika Parti Sarawak Bersatu (PSB), chalun Parti Bumi Kenyalang (PBK) Danny Kuan enggau chalun Gabungan Parti Sarawak (GPS) Friday Belik.
Ali Biju lebuh ke dikerandau madahka pemutus iya bediri baru ngetanka penuduk DUN Krian nya atas peminta rayat di DUN Krian.
Iya madahka, pemutus nya digaga kena masa sukung enggau peminta rayat ari tikas baruh ke minta iya bediri ngetanka penuuduk ke dimenang iya kenyau ari dua renggat ke udah.
“Dalam PRN-12 ungkup DUN Krian tu, aku ngena tikit ngatika diri nengah lambang ‘Kerusi’,” ku iya.
Nyaut tanya pemberita, bekaul status iya dalam Parti Bersatu, Ali madahka, pekara nya deka diperunding nangkanka tu ila enggau Presiden Parti.
“DUN Krian tu nyelai, rayat ditu ngemeratka personaliti chalun ari bengkah parti ke diari iya,” ku jaku semetak Ali.