GEDONG: Kerusi Sitak Kunsil Negeri (DUN) Gedong beratika semekih empat sukut antara Gabungan Parti Sarawak (GPS), Amanah, Parti Sarawak Bersatu (PSB) enggau Parti Bumi Kenyalang (PBK).
Semekih empat sukut di kerusi Gedong nya Datuk Patinggi Tan Sri Abang Johari Tun Openg chalun (GPS), Kamal Bujang (Amanah), Mohamad Sofian Faris Sharbini (PSB) enggau Tomson Marcus Ango (PBK).
Pemesai Menijer (RO) Pusat Ngantung Nama Chalun DUN Gedong Abdul Khalid Manap nebah pekara nya di palan alai ngantung nama chalun Dewan Masyarakat Gedong maya 10.30 pagi pengudah tembu ngantung nama chalun pukul 10.00 pagi kemari.
Datuk Patinggi Tan Sri Abang Johari Tun Openg ari Parti Pesaka Bumiputera Bersatu (PBB) nyua pom 9.02 pagi.
Iya ditangkan Tomson Marcus Ango ari (PBK) nyua pom 9.04 pagi, Kamal Bujang (Amanah) 9.11 pagi.
Seraya ari (PSB) Mohamad Sofian Faris Sharbini urung 9.14 pagi.
Dulu ari nya, penatai Abang Johari di Dewan Masyarakat Gedong disambut nengah panjung ‘Hidup Abang Jo, Hidup GPS’.
Abang Johari tama balai aum sebedau 9.02 sambil diiring penchadang, Datuk Mohd Naroden Majais lalau disukung Penghulu Iban Islam Kawasan Ulu Simunjan, Mohd Najib Arbi.
Tu keterubah iya Abang Johari bediri di DUN Gedong pengudah pindah ari DUN Satok ke dimenang iya ngelama sembilan renggat bejurut nya ari taun 1981, 1983, 1991, 1996, 2001, 2006, 2011 enggau 2016.
Naroden nyadi ADUN Gedong kenyau ari 1991, bedau lama ke udah lalu meri jalai ngagai Abang Johari bediri di kerusi nya. Penyampau pengundi berejister di DUN Gedong 7,208.
Opis Kunsil Pengawa Bepilih Besai (SPR) sebedau tu netapka semina chalun, penchadang enggau penyukung chalun tau tama ngagai PPC ngenyukka keretas chalun.
Seraya nya, penyukung parti politik ke diari chalun enda ditagang tama, baka nya mega sebarang aktiviti begelumu enggau pengawa berarak penyukung chalun ke bediri enda ditagang di sebarang endur sepemanjai hari ngantung nama chalun.
Opis Kunsil Pengawa Bepilih Besai (SPR) netapka hari bulan muai undi PRN Sarawak ke-12 kena 18 Disember enggau undi tumu kena 14 Disember.
Oleh JEAKQLEYN YACHO
