????????????????????????????????????
PENGAWA nyediaka landskap sesebuah taman rekreasi rama nya sebengkah perengkaguna ke disediaka Piak Bekuasa Tempatan (PBT) lebih agi ngagai komuniti ba sesebengkah endur.
Pengintu landskap ke menuku sereta bekualiti ulih ngelantangka ati orang ke ngelawa tempat nya.
Taja pia pengintu landskap di tebal alai taman rama nya mengkang ba tikas ke sedang iya pemanah.
Sesebuah taman rekreasi rama patut disikap enggau perengkaguna ke tau ngemuaska ati orang ke datai senipak enggau pekara ke nyadi diatu.
Bekaul enggau pekara tu pengintu landskap di Taman Tasik Marudi ditemu orang ke datai ketegal nyediaka landskap ke meri pengasai ati ke tenai, pematak samulanyadi ke manah, endur ke strategik enggau temuai ulih besenam sereta belelak.
Taman Tasik Marudi ke duduk di atas bukit lalu ngembuan mayuh bengkah perengkaguna ke disediaka olih PBT di taman rama tu baka trek juging, taman main anak mit, jematan gantung, agu enggau ke bukai.
Taman Tasik tu ngipak amat ungkup orang ke datai tauka alai diri sebilik belelak, ngelapangka runding, tempat ngelantangka ati tauka besenam nuju pupu raban bansa ke cheregas sereta bepengerai.
Taman Tasik tu bisi nyediaka jematan, seruyuk enggau mayuh agi perengkaguna bukai nyadika palan alai begulai enggau pangan diri sereta kelebih agi maya ujung minggu.
Penyelai sepiak Taman Tasik tu bisi Kubu Hose duduk di atas tuchung bukit nuju ke sungai Baram nengah pemanah endur nya nyadika pun pemansang penyerakup mayuh bansa etnik.
Kubu Hose tu digaga dalam taun 1883 lalu nyentukka diatu nyadika sebengkah peninggal perintah Brooke di Baram lalu mengkang reregah nyentukka sehari tu nya nyadika tanda ke beguna amat dalam pekara bebaik di Baram antara mayuh bengkah raban bansa.
Kubu Hose tu nyimpan sejarah ke beguna ketegal ditu penatai lumba perau ke dikumbai Baram Regatta.
Baram Regata mengkang diteruska ke alai pengerami Baram Regatta tu matak temuai ari menua kitai ditu empu enggau mega temuai ari luar.
Tau dikumbai enda kala ngindik menua Marudi orang enti nadai singgah ke Taman Tasik Marudi enggau mega ngagai Kubu Hose ke nyelai amat dalam mayuh bengkah aspek enggau sejarah iya.