MUNSUH RAJA BROOKE ... Kar menua Sarawak ti nunjukka palan perang ba tasik Linggir Malu Lebu ngelaban Raja James Brooke.
Tusun Ke-58
IBAN, MELAYU NGELABAN PRINTAH RAJA JAMES BROOKE
TAUN 1849 Linggir begulai nyadi Tuai Kayau bala Bujang Berani Iban enggau Melayu Saribas (Spaoh) ngayau ke Igan, Paloh enggau Matu. Kayau Linggir tu malas kayau Perintah Raja Brooke ke Paku taun 1843; lalu iya mega enggai lebu udah ti puntan ngayau ke astana Raja James Brooke maya nya. Nya mih kebuah iya ngayau rayat Perintah Raja Brooke di Nanga Rajang nya. Tengah jalai sida pulai ke Saribas, sida deka nyerang Pasar Sarikei, kira-kira tiga puluh batu ari Nanga Rajang. Datai sida dia, menua nya udah likun amai dijaga laban munsuh sida ti udah tasah di Nanga Rajang tadi mayuh ti udah rari kia. Nya alai sida pan enda nyadi ngalahka menua nya. Sida nikal lalu nyerang Duri semak Nanga Rajang nya. Sebedau nya Duri mega udah dikayau bala Iban Saribas enggau Batang Lupar ti betuaika Dana “Bayang” ari Padeh enggau Datu Patinggi Udin ari Rantau Anak di Layar.
Nya mih maya Raja James Brooke ngena peluang mai bala iya ngipa sida Linggir “Mali Lebu” pulai ngayau nya ba Nanga Saribas. Raja James Brooke mega minta bantu Kapten Farquhar ari Kapal Nemesis ngatur ipa sida dia. Nitihka penerang ari Orang Kaya Janting bala Linggir enda tau enda pulai nengah Nanga Kalaka tauka Nanga Saribas. Nya alai Kapten Farquhar ngatur Raja James Brooke ngena perau Singa Raja enggau anak menyadi iya, Charles Brooke ngena perau Raja Wali mai empat puluh buah perau Dayak Iban Balau, Dayak Bidayuh, Dayak Selakau ari Lundu enggau Melayu Kuching ngempang Nanga Kalaka enggaika munsuh sida nya rari kia.
Kapten Farquhar empu ngena kapal Nemesis. Bala Raja James Brooke ti bukai ngena kapal mit Albatros enggau Ranee sereta empat puluh buah perau sedadu tasik British enggau perau Dayak Iban Lundu ngipa ba Nanga Saribas. Sebuah perau beinjin laju dipilih sida ngikup lalu meratika penatai munsuh sida; diengkah sida ba Tanjong Sirik. Tengah malam kena 31 Julai 1849 bulan kembung kekadang dilindung remang mimit, kekadang terang ga ngenampakka ai tasik. Sebarang utai ti semak nyengala amai dipeda mata.
“Apuuu…, mayuh amai perau nyin!,” pia ku seiku ari bala Raja ti ngikup ngena perau beinjin laju nya. “Tentu bala Linggir nyin.”
“Iya mih nya. Apuuu…., lebih seratus buah perau nyin! Aram kitai jampat, madahka Tuan Raja.”
PERANG BETING MARU
Tekala nya deriba perau laju sida nya pan berumban nguingka luan perau nya lalu bekejang ari endur nya. Sida nya endang diasuh Tuan Raja ngemata aja, enti perau munsuh bisi ayan, sida nya deka beguai bepadah ngagai bala Raja lalu ngasuh sida sedia negah munsuh lalu muru sida ngagai Nanga Saribas awakka sida besatup enggau bala besai ke ngipa dia. Datai bala pengayau Linggir di Nanga Saribas sida pan betempuh enggau bala Raja ke ngipa dia ngena kapal Nemesis, Albatros, Ranee enggau empat puluh perau ti ngundan bala pengayau bala Iban Balau, Dayak Iban Lundu enggau sedadu Raja di Astana Kuching (Sarawak)
Munyi letup buluh maya nunu perejin meriam enggau senapang patah sedadu British enggau Raja Brooke nachahka perau pengayau bala pengayau Linggir. Udah sebuah, sebuah da ga perau nembiak Linggir karam udah ti kena tachah peluru besi meriam. Beterauh bala munsuh perintah Raja Brooke nya tasah. Sida ti kena tubuh, anang ke tubuh, tulang pan patah. Ukai main ga peluru leka meriam nya. Enti ditimbang, engka enda iya kurang ari tiga ngagai empat kilogram pemerat seigi-seigi. Maya nya mayuh bendar perau sida karam ti ngasuh sida udu bendar tasah. Sida ke agi idup naka ulih nyemeraika tebing. Sedadu perintah Raja Brooke balat bendar nimbak tang perau sida Linggir empu nadai kena laban leka mariam.
“Alauuu…! Titihka aku, serang kapal nyin…!” pia ku Linggir meradakka nyawa iya. Meda utai balat bendar nyadi, iya pan mai bala bujang berani iya nyerang kapal skunyir Nemesis. Datai ba kapal nya Linggir enggau bala iya pan belabuh niki kapal nya. Sekeda sida niki nengah tali sauh. Sekeda nengah tangga besi ba dinding besi skunyir. Maya sida niki nya mih bala sedadu perintah Raja nyerang Linggir enggau bala nembiak iya ngena kayu, sangkuh, duku enggau batang besi. Pedis amai sida deka niki kapal nya.
“Ahhh…, rugi amai bala Bujang Berani Iban enda ulih niki kapal nya. Enggai nyadi tiki dinding kapal nya. Enti ulih tama kin, rindu amai bedengah bala sedadu perintah Raja nya,” ku Linggir muchau dalam ati.
“Alauuu…, nikal kitai…! Enda ulih tiki kapal tu,” ku Linggir. Iya nyebut jaku nya, udah ti tepedaka bala nembiak iya ti mayuh pedis dipalu sereta ti ruruk bala sedadu Raja ngena sangkuh maya sida ti nyau deka datai ba mua kapal. Nyepi diri lalu enda ulih niki kapal nya, mayuh nembiak Linggir rari tunga ke Nanga Layar.
Lebuh Linggir enggau bala iya deka ngalahka kapal Nemesis tadi, ipar Linggir empu ke benama Chabu labuh ke ai tasik lalu enda sempat niki ngagai perau agi. Iya lalu rarat dibai arus ai sebelah tasik. Nyau kelama iya udah nyemerai alai iya nemu apung balu ke alai iya nepan. Ngena nya iya rarat ngagai maya ai pasang ke mai iya ke tebing baru. Pagi seiti bala sedadu Raja ba kapal Nemesis tepedaka iya empakap ba apung nya. Sida nangkap iya lalu mai iya pulai ke dalam kapal. Datai ba geladak kapal, tuai kayau Melayu seiku ba kapal Tuan Raja seduai Kapten Henry Keppel deka munuh iya. Orang putih dua iku nya enda ngasuh orang munuh iya. Pedis ati ninga tuai Melayu nya deka munuh iya, Chabu pan numpu dada laut nya ngena tumbit iya. Tuai bansa Melayu Kuching nya luput, nyau deka parai. Chabu pan dikurung Raja dalam sebuah bilik dalam kapal nya.
Ari semua perau sida ke pulai ngayau tu tadi semina perau Linggir empu enggau perau Abang Apong seduai Abang Gamong ulih tama Batang Saribas lalu mulaika diri ke menua. Perau sida bukai karam sereta tasah magang. Taja pia, mayuh ga bala sida nya ulih nyemerai lalu sangkai ba tebing ujung Tanjung Maru. Ari nya sida ke rari nya bedarat nuju ulu Sungai Undai pati Rimbas.
TAWAK BUNSU REMAUNG NEGUNG
Udah sida napi mayuh macham leman penusah, nya baru nembiak Linggir di rumah panjai mangkung tawak ngena “Pangkung Kumbai” kena madahka jalai pulai ngagai menua diri ngagai mensia ke mayuh udah karam perau malam nya. Tawak ke dipangkung sida nya digelar sida “Bunsu Remaung Negung” ke agi dikembuan peturun Linggir di Krangan Pinggai, begulai enggau senapang ari kapal perang British H.M.S Dido, Paku di Saribas.
Udah ti mujur tama Batang Saribas, Linggir enggau Abang Apong enda seretai, lalu jauh ari pangan diri. Meda perau Abang Apong jauh tinggal, Linggir mai bala nembiak iya ngetu lalu niki ke pantai sebelah babas nganti bala Abang Apong seduai Abang Gamong. Linggir mega ngasuh nembiak iya bejaga-jaga, engka bala sedadu perintah Raja Brooke ngagai sida. Amai ga, hari seiti kena 1 Ogos 1849 bala Perintah Raja Brooke berengkah ngayau ke Batang Paku baru tang sida alah lalu mayuh bala Raja Brooke kena dengah bala Bujang Berani Dayak Iban enggau Melayu Saribas.
Taun 1850, udah perang Beting Maru, Perintah Raja James Brooke nirika kubu James ba bila dua Nanga Skrang enggau Sungai Batang Lupar. Kenu ku Raja James Brooke, kubu nya deka nyadi palan sedadu Perintah Brooke nagang bala Bujang Berani Iban ari Skrang ti betuaika Libau “Rentap” begempung enggau bujang berani Saribas ti betuaika Linggir “Mali Lebu” seduai Aji lalu angkat ngelaban Perintah Raja. Sapa orang mansa kubu nya, enda tau enda ngeripot diri ba pemesai Perintah Raja Brooke ba kubu nya. Enti enda ngeripot diri lalu nadai surat pemendar ari kubu nya, sida deka diserang bala sedadu tebing tasik ‘Sea Scout” Raja Brooke. Sedadu Raja Brooke nya raban Dayak Iban ari Sebuyau, Sadong enggau Banting ti lama udah nunduk lalu nanahka Perintah Raja Brooke.
Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia & The Encyclopaedia of Iban Studies, Volume III, Joanne and Vinson H. Sutlive.) The Sarawak Journal 1994 – The Source of Iban History, Benedict Sandin.
(Betampung ba Tusun Ke-59 minggu nyin ila)
Nya mih pun kaul Iban enggau perintah Raja Brooke di Sarawak berengkah ari taun 1841. Berinduk ari nya mega bansa Iban berengkah bepechah ari sabung Raja James Brooke. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR