DIPENYADI… Datuk Rosey Yunus ngengahka sengayuh tanda bejadi Regatta Niah 2022 sereta diperatika Kaban Parlimen Sibuti Lukanisman Awang Sauni ba Niah Waterfront kena Hari Enam ke udah.
NIAH: Regatta Niah 2022 datai baru sereta muka lambar baru pengudah empat taun nadai diatur nyengkaum dua taun ketegal pandemik Covid-19.
Sapit Menteri Pemansang Indu enggau Nembiak Mit Datuk Rosey Yunus madahka, regatta ke sekali tu ukai semina ngerapitka kaul mensia mayuh tang mega meri ruang enggau peluang ngagai mensia mayuh nyungkakka sosieokonomi.
Mayuh kedai nyual pemakai, ai irup enggau pemeri sereta homestay ba kandang nya mega nyau abis disua bala temuai ke mayuh amat datai ari luar ngagai Sepupok Niah laban deka meda sereta ngasaika pengerami Regatta Niah 2022.
“Kebuah regatta nya rami amat laban bisi kerejasama ke manah amat ari sida ke diau ba endur nya sereta ngasuh regatta nya mega ngerapitka kaul mensia mayuh.
“Nya siti peluang ngagai sida ke diau ba endur nya nyereta pengawa dagang chara mit,” ku iya lebuh bejaku maya pengerami bejadi Regatta Niah 2022 ba Waterfront Niah kena Hari Enam ke udah.
Rosey ti mega Kaban Kunsil Nengeri (ADUN) Bekenu madahaka, Regatta Niah 2022 bisi nyediaka Mangkuk Raja Sungai ke diperebutka bala penyereta kelimpah ari nerima perais RM10,000.
“Diatu kitai nyebut senentang ‘Ruang Bilik Malaysia’ laban bisi meda mensia mayuh datai ari mayuh bengkah endur enggau chara pengidup lalu nya siti pekara ke manah manah amat senentang regatta tu,” ku iya.
Maya regatta nya Rosey mega ngelepaska luma kayuh 15 lelaki sereta nyuaka perais ngagai sida ke menang ba kategori nya.
Kelimpah ari penyereta endur nya empu ke bisi nyereta Reggata Niah 2022, peyereta bukai baka ari Bintulu, Kapit enggau Sibu sereta menua Brunei Darussalam mega bisi datai.
Aktivti bukai ke bisi diatur kelimpah ari lumba perau enggau bot laju nya eksibisyen ijinsi perintah enggau swasta, kedai bejual pemakai enggau Panggau Rayat ke bisi nyedika pekit Kumang Regatta, bodybuilding, karaoke enggau Gendang Melayu.