NGETAS RANYAI … Datuk Gerawat Gala ngetas ranyai tanda bejadi Pengerami Makai Malam Pra Gawai 2022.
MARUDI: Lebih 600 iku bala pengabang ari rumah panjai ba kandang Poyut / Lubok Nibong datai ngemenuhka Dewan Suarah Marudi maya Pengerami Makai Malam Pra Gawai 2022 ke diatur Komiti Pemansang Poyut Lubok Nibong (JPPLN) malam Hari Enam ke udah.
Pengerami nya dipeda richah amat nya pengudah dua taun nadai nyambut Gawai laban nitihka Standard Operating Procedure (SOP) ketegal pengelekai Covid-19.
Ketegal nya Sapit Menteri ba Opis Premier Sarawak, Meratika Pengereja, Imigresen enggau Projek Dato Gerawat Gala meri tabi puji ngagai bala pengatur pengawa ke diketuaika Pemancha Randie anak Bundan laban ngena inisiatif iya begulai enggau raban JPPLN.
“Kitai ngasaika pengaga laban gaya Covid-19 ba menua kitai lebih agi Sarawak nyau betamabah manah pengudah lama amat kitai udah enda ngatur pengerami baka tu,” ku iya lebuh bejaku ba mua lebih ari 600 iku bala pengabang ari rumah panjai.
Ku iya, taja pan kitai diatu udah nyingkang ngagai renggat endemik ke ulih ngasuh kita begempuru baru, tang meseti nitihka SOP baka ngena pemampul indung enggau mulut.
Gerawat ti mega Kaban Kunsil Nengeri (ADUN) Mulu beterima kasih laban Malaysia ngembuan mayuh bengkah raban bansa, chara pengidup enggau agama ulih sama bela enggau nyereta pengerami baka Taun Baru China, Hari Raya, Gawai, Krismas enggau pengerami buklai enti dibandingka enggau menua bukai enda ulih ngatur rumah tebuka.
“Nya meh penyelai menua kitai lebih agi Sarawak ke alai perintah kita meransang pengawa ngatur rumah tebuka dikena ngerapitka kaul ngambika ulih begulai sejalai taja pan enda sebaka bansa, agama enggau chara pengidup ngambika penyerakup ba nengeri tu seruran ditanka,” ku iya.
Ku Gerawat, taja pan di Sarawak bisi mayuh bengkah raban bansa, agama enggau chara pengidup tang iya ke enda sebaka nya seruran dipebasaka ke ulih ngasuh segulai sejalai.
Ngena peluang maya pengerami nya Gerawat meri terima kasih ngagai semua pengundi ba kandang Poyut / Lubok Nibong laban udah meri sukung ngagai iya maya Pengawa Bepilih Besai Nengeri (PRN) bulan Disember taun ke udah.
Ku iya, rayat meri pemenang ngagai Gabungan Parti Sarawak (GPS) nyau deka ba semua palan endur ngundi di Poyut / Lubok Nibong.
Taja pan Kaban Parlimen Baram Anyi Ngau enggau ADUN Telang Usan Dennis Ngau enda ulih nyereta pengerami nya tang seduai iya sama bela meri geran Projek Mit Menua Pesisir (MRP) penyampau RM15,000 enggau RM5,000 ngagai JPPLN.
Kelimpah ari nya Gerawat empu mega meri geran MRP penyampau RM30,000 ngagai JPPLN dikena mantu sida ngatur program tauka aktiviti.
Maya pengerami nya mensia mayuh diperindang dua iku artis Iban iya nya Ricky Andrewson enggau Phoebe sereta Sima anak Lait enggau Denniel anak Buly dipilih nyadi Lady And Man of The Night.