PENGINGAT… Reveren Father Joseph Sebastian begambar nyadika pengingat begulai enggau bala indu misi
sereta staf berubat pengudah nyereta Misa Kudus ba Gereja Roman Katolik St’s Peter & Paul’s Church Mukah
kemari.
MUKAH: Bisi 21 iku indu misi enggau staf berubat diberekat maya Misa Kudus ke diatur ba Gerija Roman Katolik St’s Peter & Paul’s Mukah pagi kemari.
Slot spesial nya dikena meri apresiasyen ngagai sida iya beserimbai enggau hari Indu Misi Sedunya ke diatur ninting taun kena 12 Mei.
Sigi endang baka ke ngelama tu bala sida ke sembiang nya duduk ba kerusi mua lalu maya diberekat Rektor Gerija, Reveren Father Joseph Sebastian sida duduk ma mua altar.
Lebuh meri jaku ajar paderi nya mega meri apresiasyen sereta terima kasih ngagai semua indu misi ketegal peduli amat enggau bala orang ke sakit maya berubat.
Iya mega besampi ngambika semua indi misi seruran dilindung ngambika sida iya ulih meri servis pemadu manah ngagai mensia mayuh.
Misa Kudus ninting minggu nya diatur nitihka Prosedur Operasi Standard (SOP) baka ke udah ditetapka, ngena penutup mua enggau idung dikena nyaga diri taja pan kitai udah ba renggat berubah ngagai endemik.
Nitihka penerang, theme Hari Indu Misi taun tu nya ‘Nurses a Voice to Lead Invest in Nursing & Respect right to secure Global Health’.