Nyadi tenggau,lalau nurun

ADAT BEBURUNG IBAN

MAYUH orang rebak baru diatu kurang mereti pasal pengawa bumai enggau atur sereta adat beburung kelia.

Kebendar iya atur beburung nya diambika lalau enggau tenggau pengawa bumai, nurun gawa, nurun pegi, nurun mansai, berikan (nyengkaum nubai), nurun nyabung, ngabang sereta mega nurun ngayau enggau nurun mulau.

Enda nya salah laban nembiak rebak baru diatu mayuh enda mereti pasal jalai beburung ti bepelasarka pengarap lama ke ngumbai sekeda petara ke deka meri pemanah tauka ngenataika penyai ngena pesuruh iya sekeda bansa burung munyi ti udah disebutka aku ba tusun kesatu atur beburung dulu ari tu.

NGELALA NYAWA BURUNG

Munyi ke udah disebut dulu, semina nyawa burung ke nyadi menantu Singalang Burung (ke ayan nyata ba tubuh burung Menaul tauka Lang (Brahminy kite dalam jaku English tauka nama saintifik Haliasatur indus intermedius ) aja ke tau diambi ka burung.

Sida ke nyadi menantu Singalang Burung tu nyengkaum Ketupung (nama saintifik Sasia abnormis) tauka dalam jaku English Rufuos Piculet); Embuas (Lacedo pulchella) tauka Branded Kingfisher; Beragai (Harpactes duvauceli) tauka Scarlet-rumped Trogon; Papau tauka Kelabu (Harpates diardi) tauka Diard’s Trogon; Bejampung (Platylophus galericulatus) tauka Crested Jay; Pangkas (Blythipious rubiginosus) tauka Maroon Woodpecker enggau Kunding Burung Malam – iya tu ukai bansa burung tang sebansa indu utai ke bebunyi nyaris kuning maya malam (night cricket) ke mega jadi enggau anak bunsu Singalang Burung, iya nya Endu Dara Chempaka Tempurung Alang. Nyadi burung Nendak ( copsychus malabaricus) tauka ‘White-rumped Shama’ tu laban ke baruh pendiau, nyangking ba tanju Kelabu ba puting setak rumah Singalang Burung.

Laban ke nyadi batang atur pengawa beburung, sereta mega nyadi Petara Bumai enggau semua pengawa ngayau sereta nyerang munsuh, Singalang Burung jarang bendar ayan nyata dipeda mensia. Enti bisi pan dipeda jauh terebai tinggi laban pendiau iya endang sigi tinggi.

Singalang Burung enggau bala burung bukai ke nyadi menantu iya endang sigi diau baka pendiau kitai mensia sengapa tu dalam dunya sida menya. Pendiau sida endang nadai jauh nyelaie ari pendiau bala Iban kelia, tang enti sida nerengkah diri ngagai dunya mensia, sida ayan dipeda ba tubuh burung ke diambi sida nama.

Dalam reti jaku kena beburung, sida burung menantu Singalang Burung tu sigi nyadi pesuruh siku-siku bansa petara di langit din lalu semua leka jaku ke dipansutka sida (ti diambi nyadi ka burung) nya endang nitih pesan petara ke diarika sida.

MAI PESAN PETARA

Siku-siku bansa petara selalu ayan sereta didinga nyawa iya dalam tubuh siku-siku bansa burung ke nyadi pesuruh iya ba dunya tu. Ambika banding, Ketupung selalu ayan dipeda tauka didinga bunyi iya ba dunya tu ba tubuh burung Ketupung (sasia abnormis) lalu ngenataika pesan iya ngena munyi nyawa iya ke bemunyi setik-setik sekali aja. Bakanya mega Embuas (lacedo pulchella) enggau genap iku bansa burung bukai dalam tusun menantu Singalang Burung nya.

Bala Iban sigi nemu nama kebuah bala sida burung ke tau nyadi ka burung nya jarang ayan. Laban nama sida ayan, sida tentu bisi mai pesan ari petara nitihka gaya penatai, penerebai sereta munyi sida. Iya ke bendar, munyi enggau sida ke ayan segenda nya ngayuka sida bisi utai padah, bisi utai pesan ari petara ngagai mensia.

Munyi ke udah disebut, Ketupung ke nyadi menantu tuai Singalang Burung endang nadai mayuh jaku, laban jaku seleka ke diayuka bunyi sasetik ari iya nya endang nyadika pemutus runding, iya nya enda tau enda dititihka.

Ambika banding, enti ninga nyawa ketupung besundang, iya nya nyawa bisi utai dipadah – nyawa tu dikumbai Jaluh (tauka Kikih), nyawa tu bisi utai besai dipadah, lalu mensia mesti ngetu ngereja pengawa ke benung dikereja sida maya nya.

Baka reti bala mensia ke deka nurun bumai tang ninga Jaluh bala sida tu mesti nikal pulai dulu lalu enda nyadi ke umai. Baka nya mega sida ke deka nurun nyabung, manah agi enda nyadi nurun laban nangika sida alah manuk enggau duit. Enti orang ke deka mansang ngayau bisi ninga Jaluh sida enda nyadi nurun laban enggai ka sekeda sida parai dibunuh munsuh lebuh ke besatup enggau munsuh.

Enti bala Iban bisi nyawa Pangkas enggau Papau Kelabu bisi bemunyi nyerarat tauka beturut, enda munyi bisi utai padah bisi utai dikenangi.

Munyi ari Pangkas (Blythipious rubiginosus) nya dikumbai Kutuk lalu enti ari Kelabu Papau, bunyi nya dikumbai Senabung. Nyadi munyi ke udah disebut enggau sekeda nama nya tadi baka reti terantang begau kitai Iban lebuh maya orang parai, iya nya munyi kena bepadah. Nya alai munyi nya enda sebaka reti enggau munyi selama jaga sida burung nya. Munyi tu endang ambika burung, mesti dititih, dikediauka, dibela nitih atur orang ke nemu beburung rambau Iban agi beburung kelia.

Agi ngenang pasal bunyi Jaluh, enti tudah ke ninga nya endang sigi udah tuai umur lalu udah lama bumai betaun, lalu bunyi nya didinga maya baru deka manggul tauka ngepunka pengawa bumai, nya burung jai, laban munyi nya ngayuka sida sebilik deka rapas pemakai taun dudi, reti nya enda bulih padi. Tang enti orang ke ninga burung nya agi biak umur, iya nya baru enggau orang bumai betaun, nya siti burung manah madahka umai iya deka manah, lalu bulih padi taun nya.

RETI PENEREBAI BURUNG

Penatai enggau penerebai burung mega besai bendar reti ba orang ke meda tauka ninga bunyi iya. Orang selalu nyemaka penerebai burung ari kiba ke kanan (raup tauka ngeraup) enggau ari kanan ke kiba (mimpin). Nitih penemu orang tuai, burung mimpin tu bisa tauka kering agi laban ngayuka jari kanan tu tanda pengering enggau pengeras.

Nyadi enti burung nya datai ari belakang orang ke meda tauka ninga bunyi iya dikumbai burung nyubuk. Laban burung nya minta peda, iya endang bisi utai padah. Bisi mega burung ke minta peda laban bisi utai padah, ngena jalai begagaka serangan baruh perabung tauka sadau rumah, inggap lama ba atas perabung, ba mua penjan tauka telenga atap. Bisi mega burung nya dipeda terebai tama rumah, nyengkaum terebai niti rumah.

Burung ke terebai niti rumah tu, enggau baka bansa burung. Enti iya siku ari bansa burung menantu Singalang Burung, tau ambika burung tang burung jai enti nyema nya Ketupung tauka Embuas. Bisi burung bakatu udah nyadi di menua kena pegai Bintangor, ke ngujungka rumah panjai nya angat. Meda bakanya, rumah nya lalu dibuai sida serumah nya.

Nyadi bebanding enggau burung bukai, Nendak meh ke selalu bisi ayan dipeda nyentukka diatu. Iya selalu bisi dipeda terebai sereta inggap enda jauh ari rumah panjai tauka ari tumpuk pendiau bala Iban. Suah mega iya dipeda orang ke gawa umai tauka kereja getah ngayanka diri enda jauh ari sida.

Nyawa Nendak dikumbai orang panggal, iya nya kena ngenyelapka munyi burung ke bisa agi. Baka reti ka panggal kena kitai gali, iya ngasuh munyi burung bukai nya enda bisa, nyadi chelap. Sema ka jaku, enti kitai bepanggal maya gali, kitai tetap nyamai agi sereta kurang agi penekul maya tinduk.

BISI RETI IYA EMPU

Genap munyi, ulah enggau penerebai burung endang bisi reti iya empu.

Tang dalam pengawa bekira ka reti munyi enggau ulah burung nya bepanggai ba tuju pengawa orang ke ninga tauka meda burung nya.

Ambika banding, orang nya mesti ngingatka maya (pagi, ngalih hari, sabung petang), endur utai nya nyadi awakka nyamai orang ke nemu burung mansik sereta netapka reti burung nya; sekalika nya burung manah tauka jai.

Munyi burung ke didinga orang nadai bepanggalka bunyi Nendak nya dikumbai sungkal, reti nya burung bisa lalu enti iya burung jai, iya tau ngenataika penusah tauka penanggul besai baka kena tinggang penyakit, rumah tauka langkau angus, sekeda penusah bukai nyengkaum kena tinggang pemati bala diri sebilik tauka pemati orang ke ninga tauka nyawa burung nya.

Nyadi nyawa Nendak, laban ke mina nyadi ka panggal burung bukai endang sigi enda bisa, lalu ngujungka iya nadai dikenangika bala Iban. Pia mega bala nembiak enggau orang besai tuai ke ngelala burung nya endang nadai kala ngachau tauka ngemediska burung Nendak. Iya sigi selalu bisi dipeda enda jauh ari rumah bemain ati diri. Nya alai selalu meh iya diteju pia aja laban iya nadai diambika burung enti mina dipeda tang nadai bemunyi.

Penemu beburung tu siti penemu ke dikumbai enda mudah dipelajar sereta tusah deka disagam sebarang. Kebuah pia, laban penemu beburung tu chukup besai reti dalam pengidup bansa Iban kelia.

Munyi ke udah disebut ba tusun penemu beburung ke dulu ari tu, bunyi tauka nyawa burung nya nyadi ka pesan tauka tanda sereta mega jaku tangkal ari siku-siku petara dunya lama Iban nyengkaum Singalang Burung empu ke nginjau menantu iya (Singalang Burung) ngenataika pesan sida ngagai mensia idup ba dunya tu.

Enti nyema nyawa burung nya ngenataika pesan bisa, orang ke nemu beburung patut nyagam reti iya enggau manah sereta betul tauka ngena laban takutka pemisa burung nya tau pulai ka pemati tauka penusah besai baka angus rumah, rumah angat reti nya ngujungka orang serumah nya balat kena tinggang pemati. Utai ke bakatu bisi ngujungka orang lalu muai rumah nya, pindah ke bukai tauka ngentak rumah baru.

Pemanah enggau penyai munyi burung tu mina deka ditemu enti udah bisi utai manah tauka jai nyadi udah bekau nya, laban jarang bendar pemanah enggau penyai ditemu tekala nya. Ambika banding, semina udah bekau orang nya bulih pemedis baka kena tegam baya (parai tauka enda parai), pantuk ular tauka penusah bukai, nya baru orang bekenangka burung ke kala didinga tauka nyadi ba orang nya. Utai ke nyadi ba iya nya seharitu tauka pagila lusa tang burung nya didinga tauka nyadi ba iya sehari dua tauka lama agi dulu ari nya.

Bisi mega utai manah tauka jai mina ditemu nyau kelama udah bekau ninga tauka kena laban burung nya. Ambika banding, orang nya tau tak ngenyit parai taja pan nadai ditemu penyakit. Bisi mega orang madah laban bisi jai burung taun dulu. Reti nya burung ke nyadi ba orang nya ditemu burung jai nyau kelama iya udah nyadi tauka didinga orang nya tauka sida sebilik.

Diatu pengawa beburung tu udah nadai agi dikena ba pengidup bansa Iban ketegal tebal agi udah masuk Kristian ka tambah mega bala orang ke nemu beburung nyau udah nadai agi. Taja pia, bala ke nyabung tauka deka nurun bejalai jauh agi bisi ngemata burung enggau mimpi, tang mina burung enggau mimpi jai aja dikena tauka dititih, iya nya enda nyadi nyabung tauka bejalai jauh.

Oleh TELESA EMPERAN