KUCHING: Bisi 10 iku lelaki rayat menua tu beumur antara 29 ngagai 73 taun ditangkap maya nyinuk nyabung manuk lebuh raban polis ari Opis Nasat Jenayah Indu Opis Pelilih (IPD) Padawan bejalaika pengawa meresa ngenyit ba Jalan Batu Kawa-Bau kena Hari Minggu ke udah.
Pemangku Kepala Polis Pelilih Padawan DSP Lim Jaw Shyong madahka, operasyen ke diketuaika Tuai Opis Jenayah IPD Padawan ASP Joshua Masing enggau Kepala Polis Balai Batu Kawa Inspektor Syarul Hafizi diatur pukul 3.30 ngalih hari pengudah bulih penerang maya nginau.
“Semua suspek deka ditasat nitihka Seksyen 3(1) Langkah-Langkah Pencegahan dan Penganiayaan Terhadap Binatang 1962 dan Seksyen 73(1)(g) Ordinan Veterinar Kesihatan Awam 1999.
“Enti ditemu salah, suspek tau diukum nyentukka ngagai RM2,000 tauka dijil enda lebih ari enam bulan tauka kedua-dua nya sekali,” ku iya lebuh meri penerang kena Hari Dua ke udah.
Ku iya, sekeda ari barang dikena maya bejudi ke dirampas nya nyengkaum seiku manuk mati, enam iku manuk idup, dachin, kutak ditulis entaruh, dua meja plastik, lapan kerusi plastik enggau perengka dikena bejudi sereta iya ke bukai nya ‘holo’ enggau daun terup sereta mata duit mayuh bengkah dominasyen penyampau RM115.
“Kelimpah ari nya semua suspek mega dipeda enda nitihka Atur Nyaga Pejalai Maya Nyuman (PKPP) iya nya enda nitihka takah fizikal ke ngasuh sida iya diberi kompoun sereta patut dibayar ba opis pengerai maya timpuh 14 hari,” ku iya.
“Semua suspek mega dikemendar pulai ngena jamin ari kourt penyampau RM500 genap iku orang. Pengudah ditasat lima iku ari semua suspek nya sama bela bisi rikut jenayah lama nitihka Akta Dadah Berbahaya dan Akta Rumah Judi Terbuka,” ku iya.
Oleh Zarina Abdullah