SIBU: Bisi 53 iku raban indu nyereta kus kulinari ke diatur Women Skills Training (WST) Opis Indu enggau Ruang Bilik Sarawak (JWKS) Sibu.
Kus nya dibagi ngagai dua sesyen, sesyen keterubah berengkah ari 9 ngagai 10 September ke disereta 25 iku penyereta lalu sesyen kedua bisi 28 iku penyereta berengkah ari 11 ngagai 12 September.
Semua penyereta diajar ngaga Chocolate Moist Cake With Salted Egg enggau Choc Topping, Korean Garlic Bread enggau Sunflower Bun.
Tuju ngatur kus nya dikena nyungkakka ekonomi raban indu ba Pelilih Sibu kelimpah ari nambahka penemu enggau pengelandik bekaul enggau kulinari.
Ba maya ke sama iya mega dikena mantu raban indau ngambika nyereta pengawa dagang sereta ulih nyadi entrepreneur JWKS.
Program kedua nya ditanggung Perintah Sarawak ngena JWKS pengudah Atur Nyaga Pejalai (PKP) ke alai program keterubah diatur ba Serian kena 19 enggau 20 Ogos ke udah.
Pengudah tu kus ke sebaka mega deka deka diatur ba JWKS Sarikei kena 17 enggau 18 September sereta ditangkanka enggau ba Bintulu kena 30 september ngagai 3 Oktober.
Sebarang sapa deka nemu senentag kus nya tau nanya JWKS Sibu ngena lumur 084-251316, 084-314927 tauka 084-314649.