KUCHING: Bisi 40 studen baru nyereta Program Randau Alumni Kolej Komuniti Kuching (KKKg) ke diatur ba balai mayuh guna empai lama ke udah.
Empat iku bala panel nya alumini tauka sida ke kala belajar ba KKKg ke dikangau datai bekunsika penelaba sereta meri jaku ajar ngagai bala studen baru ke berengkah belajar kena 1 September ke udah.
Tuju program ke diatur Unit Psikologi enggau Unit Latih Industri sereta Alumni nya dikena meri inspirasyen ngaga bala studen baru, muka runding ngambika ulih besemekih kelimpah ari meri peransang ngambika mujur ba pelajar.
Nitihka seiku ari panel nya Elfy Fariza binti Sharkawi, studen patut lebih proaktif sereta sabar napi penguji maya sida begelar graduan ba Institusyen Pelajar Tinggi (IPT).
Ku iya, penguji enggau penanggul nya sigi adat ngagai seiku studen enda ngira sekalika ba tikas setipikit, diploma enggau degree.
“Semua nya deka nyadi pengingat ke manis pengudah tembu belajar ila,” ku iya.
Iya ke kala belajar ba kolej nya ngmbi kus Setipikit Fesyen enggau Pakayan madahka, studen patut rajin betanya ngagai lecturer ngambika nemu senentang subjek ke diajar lebih dalam.
Kelimpah ari nya Mohd Rashid bin Ali mega bekunsika singkang pejalai akademik iya ke enda nyulut maya ngambi peresa Sijil Pelajaran Malaysia (SPM) tang mujur bulih pengawa ba siti serikat arkitek ke tebilang ba Kuching.
Iya ngasaika diri untung amat laban ulih nyambung pelajar TVET ba Kolej Komuniti Kuching laban nya iya keterubah ngasuh iya nemu senentang arkitek, design, pelin, rumah enggau iya ke bukai.
“Aku meransang semua studen ngena peluang tu enggau manah maya ba kolej ngulihka penemu sereta meri fokus ngambika ulih nyulut sereta nyambung pelajar ngagai tikas ke lebih tinggi agi pengudah graduasyen,” ku iya.
Mohd Rashid seiku studen ngambika kus Setipikit Nero Pelin ba taun 2010/2011 sebedau nyambung pelajar ngagai tikas Diploma Arkitekture ba Politeknik Port Dickson.
Panel bukai ke dikangau datai nya Mohammad Fitri bin Khasidin seiku studen ngambi kus Setipikit Fesyen enggau Pakayan sereta Hamirul Ridzwan bin Hamiden ke kala ngambi kus Setipikit Nero Pelin Arkitekture mega sama bela bekunsika peneleba diri ke mujur dikena meri inspirasyen enggau peransang gagai studen ngambika bala studen nemu singkang tuju diri empu pengudah graduasyen.
Program ke diatur pengelama setengah hari nya dijaga Shah Nazim bin Shahar ke nyadi moderator maya program nya.
Sama bisi enggau Sapit Direktor Akademik Nurul Dafiqah binti Kamarulzaman, Chairman Gerempung Alumni KKKg Suria binti Deresa enggau Pemesai Psikologi ti mega menijar ngatur program nya Siti Aliza binti AjisTumi.