KUCHING: Kurang ari dua minggu agi, mensia mayuh ke diau mendam ba Sarawak terus diperansang sama enggau nyereta Pekit Nyediaka Video Pandak Nemu Rabies Tikas Nengeri Sarawak Taun 2020.
Pekit nya disereta chara pechuma sereta nyediaka perais RM5,000 ngagai champion, RM3,000 lumur dua enggau RM2,000 lumur tiga sereta perais saguati RM1,000 diberi ngagai empat iku agi penyereta nyengkaum setipikit.
Genap iku penyereta ulih nganjung lebih ari siti nitihka siti ari genere baka drama, sketsa, komedi enggau dokumentari.
Penyereta semina nyediaka video antara dua ngagai tiga minit pengelama nitihka theme ‘Be Aware of Rabies’ ke nyengkaum enda kurang ari tiga lima skop kimpin rabies baka tanda enggau simptom, pengawa ke patut digaga pengudah diketup, program vaksinasyen, jaku padah enggau iya ke dikarap senentang resa ari rabies.
Sekeda ari endur ke ulih dikena ngulihka penerang nya ngena laman sesawang Opis Menteri Pengerai Malaysia; www.infosihat.gov.my, www.myhealth.gov.my enggau Opis Servis Veterinar; http://www.dvs.sarawak.gov.my Orang ngempu video ke menang pekit nya deka dipadahka sereta dibantaika maya ‘World Rabies Day’ ke dipelabaka deka diatur kena 28 September 2020 di Kuching.
Penyereta meseti ngajung video enggau pom nyereta ngagai videorabies@gmail.com enda laun ari 11 September 2020 pukul 5:00 lemai.
Atur enggau pom nyereta ulih diambi ba sereta pelilih menua, Opis Pemadah Malaysia Sarawak ke semak tauka ngelawa https://drive.google.com/drive/folders/1H0zioOImfb8SuFX6InekkwuAy_kzVFyQ?usp=sharing
Sebarang sapa deka nemu lebih silik agi tau ngelawa lama https://www.facebook.com/japensarawak tauka nanya Administarsyen Opis Media enggau Komunikasi Korporat, Opis Pemadah Malaysia, Sarawak ngena lumur 082-319 785.