TUSUN KETIGA
NYA baru kitai gaga ria, rami rindu
Nyereta antu’ bala pengabang.
Kami ke datai tu ari gelenggang Batang Kemidan Gegayak,
Deka ngerumpang genturan papan lantak,
Alai sida Apai Pandak Seregatak ngurung indu burung merak.
Nya alai, ke tu, enda tau enda terumpang genturan papan lantak
Enda tau enda ayan indai sengayan burung merak
Ke benyawa pekak-pekak, nampak berak-berak;
Laban kami ukai datai sengapa, sangkai saja.
Kami endang meruan mai kunchi
Ulih meli di mengeri Pontianak.
Tang anang mega kita tak lalu besak.
Laban ke serak tu,
Enda kami lalu ngenggam iya enggau pesingan tangan tunjuk anak.
Kami semina deka nanchang kaki iya enggau gemiri benang burak
Ka ngelapung patung iya enggau upung marik pirak.
Dudi ila, lebuh lambu kami datai ditu
Baru kitai berami, umba pengeragak-ragak
Nantai bebendai, mai ketawak, nempap dumbak raban gendang.
Kami ke datai ari batang gelenggang Kemidan Nyapan, tu
Deka ngerumpang ladang simbang papan dibalan,
Alai sida Aki Engkarung Ridan ngurung indai burung sengayan.
Nya alai ke tu, enda tau enda terumpang dih simbang papan dibalan,
Enda tau enda nampak sida indai merak, burung sengayan,
Laban kami ukai datai pia, sangkai saja.
Kami meruan mai kunchi ulih kami meli ari mengeri Pantai Labuan.
Tang anang mega kita, guai teguran.
Ke serak tu, apin kami mai lalu ngerinan,
Mina kami deka ngungki kaki iya enggau gemiri benang redam
Ngungkung rekung iya enggau upung marik merejan.
Dudi ila nyereta antu’ bala iban,
Baru kami mai iya pulai ngagai penyurai rumah nyeruran, enggi kami.
Datai din, diimbai kami enggau rawai, tajau Sandakan
Nyendi pelawan menaga bujang.