A Langur eats leaves while resting on a tree during a cold day in Dachigam wildlife sanctuary, on the outskirts of Srinagar, January 4, 2008. REUTERS/Fayaz Kabli (INDIAN-ADMINISTERED KASHMIR)
JEMAN kelia bisi bala kitai Iban lima iku diri menyadi, lelaki magang. Sida lima iku tu agi biak, lalu nadai agi apai indai enggau begulai.
Sida empat iku ti biak agi nya apin nemu gawa ngidupka diri, lalu semina ngarapka menyadi tuai sida ngereja semua utai baka ngereja utai berat agi baka beambi kayu, enggau mayuh bengkah pengawa rumah berat.
Menyadi tuai sida tu pan nemu ngasu, nemu nyumpit sereta nemu bebubu, nyala sereta semua pengawa bukai begigaka lauk dalam babas enggau ba ai. Tudah ti mit nya mina nemu minching labu kena nyauk ai.
Lebuh sida lima menyadi deka enggau orang nurun ke babas ngereja nyatu, bala Iban bukai enggai mai sida. Naka meh pengasih tudah meda orang nyeliah bala sida.
BALAT SUNTUK
Bala sida tu suntuk bendar laban nadai belanja kena bebelika utai sida, ka tambah ti nadai padi diempa. Orang bukai ba menua nya semua nadai deka nulung, tauka mantu sida, siku pan nadai meh deka nyaup.
Nya alai ku menyadi tuai sida, ”Merinsa bendar ga kitai tu, laban siku nadai meh bala mensia deka nulung, deka ngulu kitai ke babas, tusah ati aku berundingka tu.
”Tang enda ibuh ga enti sida nadai deka enggau kitai. Uji kitai lima diri menyadi turun ngereja nyatu dalam babas. Anang enda nguji meh kitai nyangka ukur bisi ulih.”
Bala sida lima tu lalu nurun deka ngiga nyatu, ngiga kubal. Datai sida di kampung, deka makai tang nadai lauk. Sida lalu nadai betemu enggau jelu, nadai meda burung.
”Enda ibuh,” ku jaku menyadi tuai sida, ”enti kitai nadai bulih babi, nadai bulih rusa, kitai tau ngiga upa ke lauk. Upa pantu, upa wi (rutan),semua tau ambi ke lauk magang. Bala kitai anang milih, asal bisi utai ke lauk aja.”
Sida empat nya sama enda memunyi, laban agi mit , lalu bisi meh nya agi takut dalam kampung.
Lama bendar sida menyadi begiga dalam kampung, tang lalu nadai bulih utai apa nama. Sida nadai bulih nyatu, nadai bulih kubal. Upa pantu, upa wi, upa aping ka lauk pan nadai bulih. Perut nyau enda nemu pengelapar, nyau engkerau.
Tusah bendar meh ati sida menyadi, kelebih iya ke tuai laban iya nemu diri udah nadai nemu chara agi, ni jalai ngidupka diri enggau bala adi iya. Perut iya empu nyau asai ke dikeruk empa pengudu lapar. Perening ke atas, perening kia-kia nadai ga meda buah babas nyangka bisi. Tang dini nya bisi, laban ukai maya buah.
Malam nya sida lima iku diri menyadi diau ba serunggu gaga ari daun dalam puak kampung, ti ulih gaga menyadi tuai sida enggau berumban sebedau sabung petang.
BALA IRAU ATI
Menyadi tuai sida nyau mutap-mutap kediri laban kelalu tusah, sereta irau ati nadai bulih utai diempa. Lalu ku iya, ”Malu bendar kitai tu nadai bulih nyatu. Enti kitai pulai ke rumah, tentu diketawa bala kitai serumah. Tentu rangkai ngeli sida ketawa.
”Nya alai pagila, uji kita empat tinggal ba langkau tu. Nyadi aku tu deka bejalai ke babas ngiga nyatu, sereta lalu ngiga lauk ke empa kitai. Nadai tan enda makai utai.”
Hari udah bekau nya, menyadi tuai sida lalu nurun ari serunggu ke babas ninggalka sida empat iku ba langkau serunggu sida.
Siku iya aja meh ti nemu agi, nya alai iya lalu ngejangka menua endur sida belangkau serunggu nya, lalu terus ngelelang diri ke dalam agi ngagai kampung.
Nyau sehari-hari tudah tuai udah bejalai, tang lalu nadai bulih utai. Iya nadai nemu nyatu, nadai nemu kubal. Upa ke lauk, ni bansa upa, pan nadai ga bulih. Tusah bendar meh ati tudah, hari pan nyau malam. Ni pengirau ati iya ke bala adi iya ti tinggal din tadi ti lalu nadai makai utai dua hari ti udah. Tang taja perut iya lapar, nadai ga tentu berasai lemi tulang, laban iya selalu ngirup ai lebuh meraka sungai mit.
Hari nyau sabung petang, bisi ga iya berasai ikak, berasai lelak. Tang sempat ga iya mantap daun kayu enggau ramu bukai kena iya ngaga langkau serunggu rumban.
Bala utai ti udah dipantap iya nya tadi lalu irit iya tunga ngagai pun kayu sekayu, ti alai iya lalu deka belabuh ngaga langkau serunggu dia. Peda iya bisi wi siti, lalu dibatak iya kena ngaga langkau.
Lebuh iya matak wi, dia iya bisi ninga nyawa orang bejaku.
”Apu! Nama utai tu?” ku nyawa orang nya dinga iya.
Dia iya lalu malik, meda bisi rumah orang dia. Lalu ku saut iya, ”Aku tu.”
Udah nya orang empu rumah lalu bejaku baru. Ku iya, ”Niki, wai niki! Lalu niki ngagai rumah kami tu.”
Ninga munyi nya, orang bujang – kitai diatu ngena nama Bujang – nya lalu niki. Datai iya dia, meda rumah orang nya sepintu, selawang aja. Orang dia lalu nyambut penatai iya, lalu ngenah, meri iya makai. Nama agi pengaga ati tudah tuai, perut nyau enda nemu agi pengelapar, tang iya mina makai pemanah iya penyampau, laban ingatka ajar apai seduai indai sida suba enda ngasuh makai mantai semantai enti lebuh baru datai ba bilik orang.
Nyau tembu makai, sida lalu duduk berandau di ruai. Orang empu rumah pan lalu nanya pasal pejalai orang bujang nya.
”Aku bejalai tu ngiga nyatu, ngiga kubal.”
”Dini alai bala orang bukai enggau nuan deh?” ku orang nya nanya.
”Kami lima iku diri menyadi, tang sida empat iku tu agi biak, lalu agi beli. Sida iya agi bedau tinggal ba langkau serunggu dili dia. Aku siku aja meh ti bejalai ngiga nyatu, tang tudah aku tu lalu nadai bulih nyatu. Lauk pan nadai bulih. Bala kami menyadi tu naka penyuntuk, nadai utai dempa.”
Ninga munyi nya, sida lalu bejaku madah, ”Enti pia, anang nuan tusah ati, laban nyatu di menua tu sigi mayuh. Nasit bendar nuan bemalam di rumah tu, laban kami tau ngajar nuan.
”Di ulu sungai tu mayuh bendar nyatu, tanah kiba, tanah kanan bisi magang. Nyatu nya tau diambi nuan magang.”
Gaga bendar meh ati Bujang ninga jaku orang madah pasal nyatu mayuh di menua nya.
NGANCHAU TIKAI
Nyadi orang nya tadi agi nampung jaku iya baru. Ku iya, ”Lalu nambahka nya tadi, aku tu tuai rumah ditu, lalu aku tu Bunsu Empeliau. Aku nemu menua ditu. Enti nuan deka ninga ajar aku, mayuh nyatu ulih nuan ditu ila.”
Indai tuai orang lalu nganchau tikai. Udah nya sida lalu tinduk. Bujang nya tinduk ba atas panggau gantung ba ruai Bunsu Empeliau.
Tumu pagi siti, sida pan dani ga. Udah badu makai pagi, Bunsu Empeliau bejaku baru enggau Bujang.
Ku iya, ”Kami deka turun. Nuan anang mindah, manah nuan diau di rumah aja sehari tu. Bini aku bisi nyendia, lalu ninggalka asi enggau lauk ke nuan. Utai nya tau diempa nuan magang.”
Sida nya lalu nurun. Udah sida nyau, tak tegepang bendar meh Bujang meda rumah tak tau nadai agi. Iya mina meda batang kayu siti ti tinggi bendar. Nyau gegiau peninggi. Dia iya lalu nemu diri empu mina bepegai ba dan kayu nya. Iya pan lalu bepeluk ba dan kayu nya.
Balat meh penakut iya, naka pengerawan laban kayu nya tinggi bendar. Endang tak enda nginsit ari nya iya sehari-hari nya, lalu mengkang merap dan kayu nya.
Nyau lemai hari, tekenyit baru ga iya lebuh meda batang kayu nya bebali nyadi rumah baru. Lalu iya pan nemu diri duduk di ruai. Maya nya bala sida Bunsu Empeliau datai pulai turun. Sida niki ke rumah lalu tama ngagai bilik.
Udah sida tembu makai lemai, sida lalu tinduk magang. Pagi hari siti, udah tembu makai, Bunsu Empeliau lalu bejaku enggau Bujang.
”Ngena nuan mulaika diri sehari tu, ngiga sida menyadi nuan. Udah nya ila, kita tau datai ngiga nyatu di menua tu. Tang sebengkah aja utai deka dipesan aku ba nuan. Kenyau ari tu, nuan enda tau nyumpit, enda tau munuh Empeliau. Nuan mali makai Empeliau, datai ke uchu ambu, ichit wit nuan jemah ila.”
Udah nya Bujang lalu nurun ari rumah Empeliau. Datai iya ba tanah, lalu malik ke atas, meda rumah nadai agi dia, mina pun kayu aja bisi dipeda iya.
Iya pan lalu mupuk mulaika diri ngagai langkau palan endur sida menyadi empat iku nya diau nganti iya. Nama enda pengaga sida meda Bujang bisi pulai baru.
BULIH AMAUI NYATU
Bujang lalu ngulu sida menyadi bekereja nyatu ngagai menua ti dipadah Bunsu Empeliau. Lebuh sida datai ba ulu sungai, dia sida meda amat mayuh bendar nyatu dia. Nyau bebesai batang nyatu, bisi semerap, bisi lebih semerap empa pemesai sereta mega balat chair ai getah iya.
Ka tambah nyatu, kubal pan mayuh mega. Nyau seneka ati milih ni ti deka dikereja dulu.
Lama bendar sida menyadi pereman bekereja dia. Sida bulih bendar nyatu. Maya sida ngangkut mai pulai ke rumah, ukai keti (kati) tang nyau bepikul-pikul ulih sida. Jual sida nyatu nya nyau bulih duit bulih ringgit beratus-ratus enggi siku-siku.
Alit bendar ati bala sida serumah bukai, ti enggai kasihka sida menyadi lima iku tu meda sida bulih bendar nyatu.
Bala sida bukai nya lalu nanya sida. ”Mayuh bendar nyatu ulih kita. Dini endur kita bulih nyatu nya?”
”Eh, ulih kami mupuk-mupuk bekereja di ulu dia meh,” ku saut sida menyadi. Sida enggai nusui ngagai orang alai endur sida bulih nyatu.
Kenyau ari nya, sukur sida nurun ngereja nyatu, mayuh bendar kaban deka enggau sida nurun. Menyadi bunsu sida enggai mai orang bukai. Tang ku Bujang, ”Anang pia, enda manah kitai malas orang ti jai enggau kitai. Awakka sida sama enggau kitai ngereja nyatu.”
Udah nya, sukur sida menyadi nurun ngereja nyatu endang sigi bulih. Semua kaban sida deka magang nitih sida.
BUNSU EMPELIAU
Bujang, menyadi tuai sida, selalu bisi mimpi. Lalu dalam mimpi iya meda Bunsu Empeliau madah ke iya, endur menua bisi nyatu, mayuh kubal tau dikereja.
Nya alai sekumbang ti udah nemu alai mayuh bisi nyatu, sida menyadi sereta enggau bala bukai sigi selalu bulih nyatu, bulih kubal.
Sida menyadi lima iku nya enda jai enggau orang bukai baka orang ti jai enggau sida. Tegal pemanah budi sida enggau orang sida bulih utai bulih jereki, lalu idup lantang ari bala orang bukai. Menyadi tuai sida Bujang lalu dipadu orang nyadi tuai orang menua nya lebuh iya nyau tuai agi.
Bepun ari Bujang ti udah begulai diau sereta ninga ajar enggau lalau ari Bunsu Empeliau, nya alai bala sida menyadi lima iku, bala anak, uchu ambu ichit wit sida lalu mali Empeliau, nyentuk ka seharitu. Tebal agi bala peturun Bujang enggau menyadi iya tu diau ba sebelah menua Batang Rajang tunga ke ulu kin.