KUCHING: Polis Sarawak udah ngatur pengawa nyekat pejalai antara Zon 1 enggau Zon 2 berengkah ari 1 ngagai 14 Ogos tu ketegal penyakit Covid-19 nyau majak berampit ba mayuh bengkah pelilih menua ba nengeri tu.
Sapit Komisioner Polis Sarawak, Datuk Dev Kumar madahka, atur ke deka diteritka nya nitihka gerah ari Komiti Nyaga Penusah Ngenyit Sarawak (JPBNS).
Ku iya, sida iya deka ngatur pengawa nyekat jalai raya ba Simunjan enggau Sri Aman berengkah ari tengah malam kemari. Zon 1 diberi status merah enggau kuning sereta Zon 2 status ijau.
“Ba maya ke diatu Zon 1 nya Bagi Menua Kuching, Samarahan enggau Serian lalu pejalai anatar pelilih menua ba bagi menua nya ke nyengkaum Pelilih Kuching, Padawan, Kota Samarahan, Simunjan, Serian, Bau enggau Lundu dikemendarka enda ibuh begunaka surat pemenadar polis.
“Pejalai ari Simunjan ngelawa Sri Aman ngena Feri Triso tauka nengah Jalan Serian-Sri Aman enda dikemendarka,” ku iya lebuh meri penerang ngagai pengarang berita kemari.
Taja pia ku iya, sida ke ngaga tauka ngatur pengawa chara rasmi sereta pengereja servis beguna dikemendarka.
Ku iya, sida iya meseti bisi surat pemendar polis sereta mantaika surat ke udah disain tuai opis enggau serikat tauka pengaji diri empu.
Ku iya, pejalai ketegal bisi pemati diri sebilik, sakit raya tauka ketegal deka meresa pengerai patut bisi surat pemendar polis ke ulih dipinta ba balai polis ke semak edur diri empu diau.
Ngagai sida ke bejalai nepan bilun, penumpang diasuh minta surat pemendar polis sebedau meli tiket penerebai.
Ku Dev Kumar, enti nyema tiket udah dibeli, sida mesti datai ngagai balai polis ke semak minta surat pemendar.
“Penumpang ke nadai surat pemendar polis enda dikemendarka nepal bilun lalu atur ke sebaka mega deka dikena ngagai bala penumpang bot enggau bas ekspres,” ku iya.