![](https://utusansarawak.com.my/wp-content/uploads/2022/08/image-1-1024x574.png)
BUJANG BERANI IBAN … Endang seruran sedia napi munsuh ti udu ngachau sida maya berimba menua baru di Sarawak kelia.
Tusun Ke-45
LEKA jaku, Iban / “Sea Dayak” dikena sida pemansik antropologis nyebut seraban bansa ti bejaku ngena jaku Iban (Ibanic speaking people). Leka jaku “Ibanic” ditengkebang Alfred B Hudson (1970), Professor Emeritus, University of Massachusetts, Amherst, Department of Anthropology. Nitihka pansik analisis “HVS-I region (12 April)”, nunjukka Iban @ Ibanic Group nadai bida ari raban orang asal menua “indigenous people”. Kenu ku sida pemansik antropologis, bepelasarka cytochrome b gene, bansa Dayak @ Ibanic Group, endang seraban enggau orang asal menua (Orang Asli) di menua bukai. Nya alai, Iban nya seraban ari peturun Dayak Borneo ti datai ari menua Yunnan di China enggau Kemboja baka ti udah disebut dulu agi ari tu. Kenu ku sekeda penulis Orang Putih, leka jaku “Iban” datai ari jaku bansa Kayan “Hivan” ti mai reti orang ti udah pindah ari menua bukai tauka orang ti udu bejalai kin kia. Bisi mega sida ke tuai madah, bansa Iban bulih nama “Iban” ari cherita Tindin “Bragah Ngindang” seduai Entinggi “Keti Aur Tulang”. Amai tauka enda, dua iti teori nya, ukai pekara ti berat lalu nyadi batang kelikuh bansa Iban Sarawak. Utai ti bendar iya nya, bansa Iban Sarawak endang seperugan, saum aki ini enggau bansa Dayak Borneo, lalu bisi tanda amat bepelasarka jaku @ Ibanic languages ti dikena IbanSarawak ke diatu. Ngenang pasal penatai Iban ke Sarawak, penatai aki ini Iban Sarawak ke diatu endang enda sebaka jalai, enda mega sebaka taun kenyau ari taun 1675, nitihka pansik antroplogis. Maya ti ngiga, berimba menua baru endur bumai betaun, Iban endang seruran charut enggau bansa Ukit, Baketan, Seru, Beliun, Lugat, Lusum sereta mayuh mega etnik orang asal (natives) ti mit-mit ke bukai, tang “Iban fears no other tribes”.
IBAN ENGGAU MELAYU MENUA PAKU
Udah Tindin seduai Rusak parai, anak telesak peturun seduai nya idup senang lantang dalam pemaik di Batang Paku nyentuk ke jeman Saang seduai Busu; kenyau Entingi sereta bala nembiak Baketan iya pindah ke Julau enggau Kanowit.
Maya Uyut ti bensumbar “Bedilang Besi” seduai Awan nyadi tuai di Paku Ulu enggau Paku Ili, seduai ngaga sempekat enggau adat nirika rumah panjai.
1. Semua rumah panjai mesti digaga nebing sungai, ambika mensia
mayuh nyamai mandi, nyauk ai lalu bejalai kin kitu ngena perau.
2. Orang ti empu tanah ti endur berumah nya enda tau nagang bala
kaban belayan ba rumah nya nirika nampung rumah panjai nya.
3. Semua sida ti ba rumah panjai nya enda tau nanam kayu buah
lebih ari lima depa ari bilik rumah sida nya.
4. Enti rumah panjai nya nyau nyadi tembawai lalu ditinggalka
sida pindah, semua pun buah ti ditanam ba senentang bilik sida
nya deka diempu bala anak telesak orang ti nanam pun buah
nya.
Uyut “Bedilang Besi” nya tuai kayau ti pama, kering sereta tebilang jeman nya. Kebuah pia, laban iya mayuh bala anak, anak menyadi sereta menantu ti endang bujang berani ti kempang ati. Kena iya nyambut pemenang maya ti ngayau ngelama tu, Uyut nirika Gawai Burung di Lubok Jalu di ulu Nanga Sungai Lingit di Ulu Sungai Anyut. Ba gawai tu iya ngaga replika Burung Kenyalang (Replika Burung Kenyalang nya ditabanka rumah Senunok ti angus taun 1944).
Uyut ‘Bedilang Besi” mih tuai bansa Iban ti keterubah nukar chara asal maya ti ngirup tuak bujang berani maya Gawai Antu. Uyut enggau anak iya sereta menantu iya enggai ngirup ai tuak nya, enti enda disua ngena adat Timang Jalung. Nya alai, ari peminta Uyut tu mih Timang Jalung agi dikena orang ngintu Gawai Antu ke sida bujang berani ti udah danjan telempai ba pintu Sebayan.
Berengkah ari Uyut ‘Bedilang Besi’ nyentuk ngagai ichit wit iya ti ngangkatka nama iya Uyut II (Apai Linggir “Mali Lebu”), Iban Paku agi bemunsuh enggau Iban Sebuyau enggau Iban Balau. Sida ti bemunsuh tu ukai ari dendam peturun aki ini ti dibai sida ari Batang Kapuas dulu kelia tang mih laban ari sabung perintah Raja James Brooke kenyau ari taun 1841. Pekara ti bendar iya nya bansa Iban Sebuyau enggau Iban Balau endang nanahka perintah Rajah Brooke tang Iban Paku ngelaban tegal ti enggai dipegai perintah Raja Brooke. Kelimpah ari nya, Dayak Iban Paku mega tampak bemunsuh enggau raban bansa Seru, Beliun, Baketan laban sida tu ti dulu ngachau lalu munuh bansa Iban sebelah kampung enggau langkau umai.
Lebuh Jantan, uchu Awan, nyadi Tuai Iban Paku Ulu, iya endang ukai tuai bujang berani. Nya alai iya irau amai ati laban ti dikelingi basa Seru, Beliun enggau Baketan ti selalu tasah di Julau enggau Kanowit lalu pindah ke Paku. Nya alai, hari seiti iya mai nembiak iya ti benama Sapitan nurun lalu meratika munsuh, engka bisi deka ngayau menua sida di Paku Ulu.
Seduai bejalai nurun bukit, niki bukit, nujah emperan neresa babas, mansa kampung lalu niti ninting ulu Sungai Puan enggau ulu Paku. Enda lama udah nya hari pan nyau jauh lemai lalu petang. Seduai pan ngiga endur ngaga langkau arau endur bemalam ba Bukit Buluh. Tumu pagi nya seduai pan mupuk baru ari Bukit Buluh niti tinting antara Sungai Gerenjang enggau Sungai Krian enggau Sungai Randau nuju Bukit Tangga Sadau lalu ke Bukit Medang. Ari nya seduai bejalai baru nuju Bukit Lubang Remaung ti alai seduai bemalam baru kedua malam.
Malam nya Jantan tinduk enda jauh ari lubang gua. Maya ti tinduk nya iya bisi mimpi meda seiku indu benung duduk semak iya.
“Ari ni penatai seduai tu, unggal,” pia ku indu nya.
“Kami duai Sapitan tu datai ari Ulu Paku. Nya mih kami tu pulai ari Bukit Buluh laban ti deka meratika pengelikun menua kami tu. Engka bisi munsuh deka ngachau menua kami,” ku timbal Jantan.
“Oh pia…! Anang irau nuan, unggal. Nadai seiku munsuh ulih tama menua Ulu Paku tu ari diatu nyentuk ke ila. Aku tu mih Antu Bunsu Remaung ti nyaga menua Ulu Paku tu ari munsuh,” pia ku timbal indu nya tadi. Jantan pan tedani. Agi belala berandau enggau indu nya. Asai ke ukai mimpi, ku iya bejaku dalam ati.
Amai ga mimpi Jantan nya. Kenu ku orang tuai, udah Linggir “Mali Lebu” ti ngayau Baketan di Sugai, Julau bala munsuh nya deka bebalas lalu ngayau orang Paku. Ba tengan jalai ke Ulu Paku bala bujang berani munsuh nya tadi kena rampit penyakit gemulut. Mayuh sida mati lalu sida ke agi idup nikal mulaika diri. Pengamat ti kedua iya nya; lebuh perintah deka ngayau Linggir “Mali Lebu” di Ulu Paku taun 1843 enggau taun 1849 bala Rajah semina ulih ngampil naka Nanga Anyut, iya nya di ili menua Jantan maya nya.
BAKETAN, SERU ENGGAU IBAN
Lebuh Mawar nyadi Tuai di Bangat enggau Ili Layar, Baling nya seiku bujang berani ti regas amai di Ulu Skrang. Baling suah ngayau bebalas ba bala Baketan Skrang ti udu ngachau bala Iban ti ngasu beburu di kampung. Nya alai mayuh bala Baketan Skrang rari ke Kanowit lalu diau sebelah menua Sungai Ensiring, Sungai Mujok enggau Sugai di Sungai Julau. Udah Baling parai tuai, anak menyadi iya Nyaru anak Bakar nganti iya. Nyaru agi bedendam lalu ngayau bansa Baketan Paku di Nanga Deran. Kayau Nyaru tu nyadi maya jeman Uyut “Bedilang Besi” nyadi Tuai di Paku Ili enggau sungai Anyut. Maya nya Iban Ulu Paku nadai tuai udah parai Blaki ti dibunuh bansa Seru. Maya nya anak Blaki ti benama Bayang seduai Ugap, agi biak amai deka nyadi Tuai. Nya mih kebuah, maya Awan di Padeh deka ngambi Lada ti agi nembiak gamal, ulih diterima Bayang seduai Ugap sereta bala kaban belayan seduai, nyengkaum aya sida Uyut “Bedilang Besi”. Ku iya, menua Ulu Paku mesti ditanka ari ti dialahka bansa Seru ari Krian ti selalu ngayau kin. Maya nya Uyut “Bedilang Besi” ninggalka bala anak menyadi iya nya laban ti nguaika bini iya Nangku anak Tuai Iban Paku Ili enggau Sungai Anyut.
Udah ti ngalahka Baketan Nanga Sungai Deran, Nyaru pindah ari Ulu Skrang ke Paku nitihka anak iya Libau. Maya nya Nyaru seduai Libau sama ukai tuai, sebedau anak Libau ti benama Kaya jadi enggau Sawai anak Lada seduai Awan. Sawai nya peturun aki iya Busu, apai Uyut “Bedilang Besi”. Menyadi Nyaru ti benama Rabiah nya indai Mujah “Buah Raya” ti pindah ari Paku lalu nyadi tuai bansa Iban di Kanowit ti tebilang.
Udah Kaya parai, anak iya ti benama Jantan nyadi Tuai Ulu Paku. Udah iya nyau tuai bendar, Jantan ngasuh semua anak iya ninggalka bilik iya magang awakka tau nyadi Tuai ba rumah panjai ti bukai nebing sungai Ulu Paku baka tu: Libau “Buban” bedau nguan sebilik enggau Jantan di Nanga Samu. Saing nirika rumah panjai di Jukun. Laus seduai laki iya ti benama Lanchang patut diau di Nanga Buong, lalu Kadir seduai Langan patut diau di Danau.
Udah Jantan parai tuai, anak iya Libau “Buban” nyadi Tuai di Ulu Paku. Libau ukai bujang berani baka apai iya, tang iya rurus ati sereta landik megai nembiak iya. Lebuh Libau nyau tuai bendar, Kadir, Danau enggau Langan beserara ari pangan diri. Kadir enggau bala nembiak iya diau di Penom. Danau diibun anak iya ti benama Unchi. Langan nirika rumah panjai di Meroh, semak Ulu Paku. Kira-kira maya nya mih anak Libau ti benama Kaya II enggau Ugat bebini. Kaya II agi sebilik enggau apai iya lalu Ugat nguaika bini iya lalu sebilik enggau entua iya Langan di Meroh. Menyadi indu sida ti benama Jata belaki jadi enggau Kadir anak Orang Kaya Linggang di Rimbas. Udah iya belaki, Jantan ninggalka bilik apai iya lalu diau kediri ba rumah panjai nya mega laban aya iya Saing pindah ari Jukun ke Batu Genting.
Referen maya & kolobrasyen: Tetuan Alexander Mering – Kabupaten Sintang (Bachelor of Law, UNTAN, Pontianak, Indonesia) & The Encyclopaedia of Iban Studies, Volume III, Joanne and Vinson H. Sutlive. The Sarawak Journal 1994-The Source of Iban History, Benedict Sandi.
(Betampung ba Tusun Ke-46 minggu nyin ila)
Nya mih, sekeda cherita penatai enggau pemindah bansa Iban makin ngansak sesemak ke Utara, ari menua Batang Sadong, nyentuk ke menua Batang Krian-Sebelak di menua Saratok ke diatu. Ari menua pelilih menua Serian, Betong, Saratok Iban majak ngiga menua baru tunga ke Utara. Arapka Iban patut nemu asal penatai diri empu endang seperugan sebedau bepechah berimba menua baru di menua bukai. Artikel ti deka nyadi bup tu ila, endang deka befokus ba senentang perugan Dayak @ Ibanic Group aja, ukai reti kitai ngelaung tauka enggai begulai enggau bansa Dayak bukai, tang mih awakka mudah agi dipansik laban mit agi rampa. Bansa Dayak bukai awakka sida empu ga mansik. Nitihka pansik Litericha enngau Sains Spiritual, Dayak @ Ibanic Group tu ukai semina kala diau begulai enggau Bunsu Petara (Dewa) – Sengalang Burung tujuh iku diri menyadi, Orang Panggau Libau enggau mayuh bansa Antu, dulu kelia; tang bansa Dayak Borneo @ Ibanic Group mega datai ari peturun Bunsu Petara (Dewa, Dewi) ti bechampur enggau mensia dunya (1) Bunsu Petara (Dewa) + Mensia (2) Antu + Mensia + Bunsu Petara. Ila kita meda lenak agi, amat tauka enda utai tu. Pia mega, bala tuai Iban Sarawak dulu kelia endang dipilih Bunsu Petara, atas pemendar ari Petara (Tuhan, God Almighty). Pechaya tauka enda, bepanggai ba pemacha empu. Engka bisi ga pemacha deka nemu pasal referen artikel tu, endang enda ulih dirintai ditu laban kelalu mayuh, lalu deka ditulis dalam bup maya dichelak ila. Nya alai, Iban patut nemu asal penatai peturun diri empu, ambika kitai ulih serakup lalu begempung enggau bansa bukai di Sarawak mega. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115.
Oleh HARRY USUP UMBAR