BETEMU baru kitai ba ruang pemerindang ke minggu tu. Minggu tu kitai begulai enggau siku artis baru ke madahka penatai diri ari Serian. Cornelius Lim beumur 30 taun rinduka pengawa belagu kenyau iya ari mit suba. Kala enggau orang masuk pekit belagu lalu peneleba nya ngujungka iya makin berani ngerikot single Bidayuh ke benama Rentep. Taja tudah tuai bebansa Cina tang landik bejaku Bidayuh. Dulu ari tu, Cornelius Lim kala nyadi vokalis siti band sebedau ngerikot Rentep.
RENTEP
Pengerindu betukar nyadi pemenchi !! Baka nya mih cherita dalam lagu Rentep. Rentep dirikot dalam jaku Bidayuh Sadong. Tiun enggau leka lagu tu digaga Cornelius Lim empu begulai enggau pangan iya, Jenny Jem. Reti Rentep ba jaku Bidayuh Sadong nya tengelam. Ba kontek lagu, Rentep ngenang pengingat pait maya bepangan ke lalu nadai pengujung. Kebuah pia laban sulu ati enda mutus ati rinduka pangan diri tauka “curang”. Ngambi bisi nyadi ke kenang jemah ila, Cornelius Lim ngaga semua kenang enggau pengingat nya dalam lagu. Pengingat pait maya bepangan ku Cornelius Lim enda nyalah-nyalah baka virus: enda badas enti disimpan kelalu lama dalam laban iya tau ngerusak runding enggau pengerai diri.
VIDEO MUZIK
Ditanya sentang klip video Rentep, Cornelius Lim madahka klip video nya digaga Hallvard Media Works ke datai ari penemu director enggau producer Vanden Michael.
“Pengawa ngambi gambar klip video Rentep bejalai enggau chukup lanchar dalam pengelama dua hari. Kami milih palan ke semak enggau Bandaraya Kuching. Taja bedau tentu teleba belakun ngadap kamera tang director Vanden Michael mayuh mantu aku enggau raban ke bukai. Aku meri besai terima kasih ngagai raban ba klip video nya; Ella Michael Hallvard Band enggau Remyson James Ramian,” ku Cornelius Lim nyaut tanya iya ti keterubah.
Video muzik Rentep pengelama 5 minit 49 second bisi ba youtube lalu mensia mayuh tau mending sereta meda klip video tu sebarang maya ba youtube.
PENGARAP
Cornelius Lim ngembuan tone vokal ti terang sereta tajam enggau range vokal ti tinggi.
“Ngena peluang tu aku meri besai terima kasih ngagai semua orang ti udah mantu aku ngaga lagu tu, ngerikot ba studio enggau ngaga klip video Rentep. Aku mega sebaka enggau artis baru ke bukai ngarapka diri ulih diterima ba industri muzik Dayak di Sarawak tu. Iya ti bendar sebedau tu aku suah mai lagu Iban ba mayuh bengkah pengerami. Terima kasih mega ngagai model Ella Michael enggau Remyson James Ramian laban udah bebendar nembuka video tu. Ngagai kita ti deka nemu enggau silik agi pasal single aku Rentep tu, kita tau ngelawa youtube,” ku Cornelius Lim ngujungka randau kami sebuat.
ELLA MICHAEL
Ngenang tanggung pengawa iya ke nyadi siku ari model ba Rentep, Ella Michael madahka klip video nya nerima sambut ti chukup manah ari bala pangan iya sereta enggau peminat lagu Iban ke bukai. Taja pan sekeda enda rindu meda “watak” iya dalam video nya, iya ngasaika diri udah mujur ngelakunka “watak” nyadi pangan Cornelius Lim. Ba video nya Ella Michael milih lelaki bukai lebuh meda Cornelius Lim nyau enda “normal” agi pengudah ke sakit.
“Watak aku ba klip video nya amat ngemediska ati orang ti meda. Kebuah pia laban aku enda ngamatka danji diri idup panjai begulai enggau Cornelius Lim. Aku berubah ati lebuh meda iya udah enda “normal” baka maya kami duai baru bekelala. Nya mih chabar enggau “climax” ti bendar ba klip video nya. Enti ba dunya nyata, kes ke bansa tu nyangka amat bisi nyadi tang nya bepanggai ba siku-siku kitai. Taja pan pia, aku meri besai terima kasih gagai producer enggau director klip video tu iya nya Vanden Michael,” ku Ella Michael meri penerang pasal klip video Rentep.
TERIMA KASIH
Kitai ngelaluka penatai semua orang ba industri muzik tu. Sapa ke bisi pengerindu enggau penglandik tetap bisi peluang ngerikot lagu lalu nyadi artis rikot. Ngena peluang tu kitai arapka peminat lagu Bidayuh ulih nyukung Cornelius Lim. Kitai mega arapka Cornelius Lim dudi ila ulih ngerikot lagu Iban nitihka singkang artis Bidayuh bukai ke udah chukup mujur ngerikot lagu Iban nyengkaun raban Acid Rain, Timothy Gee enggau ke bukai.
Terima kasih ngagai semua pemacha Utusan Sarawak ti enda leju macha ruang tu. Terima kasih mega ngagai semua peminat industri muzik di Sarawak laban enti nadai peminat tentu mega nadai penanyi. Ketegal nya, peminat enggau penanyi sama-sama begunaka pangan diri. Sama-sama mih kitai ngemansangka industri tu ngena jalai bekunsika penemu ti badas; ti tau mai pemansang runding enggau pengawa. Maju seni ke semua.
Dikarang: Mr. Tubai Pengerindu