MARUDI: Sapit Speaker Kunsil Nengeri (DUN) Sarawak ti mega Kaban Kunsil Nengeri (ADUN) N.78 Mulu Dato Gerawat Gala meri bantu ai kutak enggau ai mineral ngagai raban polis enggau Rela ke nyaga palan nyekat pejalai ngelawa Rumah Merikan, Poyut/Lubok Nibong.
Kelimpah ari nya iya mega meri bantu seunit kipas, ai kutak enggau ai mineral ngagai raban polis enggau Rela ke nyaga palan nyekat pejalai ba Lot 382 Jalan Cempaka, Kampung Cina, Marudi.
Rumah Merikan nyadi kandang atur pejalai ditagang berengkah ari 13 ngagai 26 April lalu semua rumah ba Jalai Cempaka, Kampung Cina nyadi kandang atur pejalai ditagang berengkah ari 19 April ngagai 2 Mei laban ditemu bisi kontak semak enggau kes positif Covid-19.
Semua bantu nya disuaka ngagai Chairman Komiti Pemansang Poyut/Lubok Nibong Tuai Rumah Jimbau anak Ena ke ngarika Dato Gerawat Gala sebedau diberi ngagai semua sida ke gawa ba dua bengkah endur nya.
Kelimpah ari nya Gerawat mega nangkan sida ke diau ba genturung pendiau enggau rumah panjai seruran bejimat sereta anang enda nitihka prosedur operasyen standard (SOP) laban penyakit berampit Covid-19 agi ngelekai.