![](https://utusansarawak.com.my/wp-content/uploads/2020/08/Pic3-2.jpg)
![](https://www.utusansarawak.com.my/wp-content/uploads/2020/08/Pic3-2.jpg)
Tusun Ke-16
NAKA ke diatu utai ti udah dipansik aku bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ tau dibagi ngagai tiga raban iya nya: i. Kuasa mistik Petara (God, Almighty, Tuhan, Allah Taala) ii. Kuasa mistik Antu Bunsu Petara (Dewa Dewi) iii. Kuasa mistik Antu [Sitan, Jin, Iblis, Sihir, enggau ti bukai ) Ba Tusun Ke-16 tu aku mai kita nampung pansik pasal Kuasa Dunya Mistik Antu Bunsu Petara. Sekali tu, aku agi nampung pasal kitai Iban ti agi megai agama adat tauka disebut sekeda orang pengarap lama.
Pengarap tu mudah dikelala ari kereban ti disebut piring enggau pengawa gawai. Nya alai, kitai Iban ti agi megai pengarap nya, enda tau enda minta bantu Lemambang tauka Manang. Sapa Manang? Ba Tusun Ke-1 – 3 aku udah mai kita ngelala Manang. Sapa Lemambang?
LEMAMBANG SAMPANG GADING
“Retak Dai bebini jadi enggau Kelintak Darah menyadi Lemambang Sampang Gading. Seduai beranakka Serapoh ti nurunka bansa Dayak ti bejaku ngena Jaku Iban di Kalimantan dulu kelia. Serapoh nya petunggal sekali Keling ari Si Gundi ti menyadi Retak Dai. Kenu ku jerita tuai, Sampang Gading nya Lemambang Sengalang Burong ti ngajar Lemambang bansa Iban pasal Pengap @ Timang.
Dalam jaku English Manang ti disebut sida ‘bard’ [a poet, tradisionally one reciting epics and associated with a particular oral tradition – dalam jaku Melayu disebut sida penyair: orang ti nyadaka leka man ti bisi bekaul enggau jerita tuai] Semua bansa di dunya tu bisi ngembuan Lemambang kediri empu ti bisi kaul enggau pengarap lama sereta Antu Bunsu Petara bansa sida empu. Dalam jalai pengidup agama adat Iban Lemambang nya orang ti landik nengkebang lalu nyadaka leka main ti disebut Pengap enggau Timang.
Leka main nya ngundan ayat ti dikena sida ngangauka Antu Bunsu Petara datai ngagai Gawai ti diintu orang ti empu pengawa nya. Pengap enggau Timang nya sebengkah cherita dalam tukuh leka main ditusui Lemambang pasal pengawa Antu Bunsu Petara ti nyediaka diri ngabang ngagai Gawai lalu baka ni chara sidan datai ngagai dunya mensia.
ASAL PENATAI LEMAMBANG
Iban lelaki tauka indu sama tau nyadi Lelambang. Taja pia, Lemambang indu lebih landik ba sabak bebuah lalu disebut Lemambang Sabak. Sebaka enggau Manang mega, Lemambang selalu bulih pengawa lalu bulih gelar nya ari mimpi sida. Taja pia, enda ga semua Lemambang dipaduka Antu Bunsu Petara ari mimpi sida. Sekeda sida nya belajar ari Lemambang bukai ti udah landik.“Menyadi Maar, Lau Moa Anak Numpi pindah ke Batang Skrang, pati Batang Lupar lalu nguaika bini iya ba menua nya.
Nyau betaun-taun diau di Skrang Lau Moa pan nyadi tuai bansa Dayak di menua nya lalu orang ti keterubah iya berimba menua di Nanga Skrang lalu diau mendam dia. Iya mih apai sida Lemambang ti benama Geringu, Sumbang, Sudok enggau Malang. Sida tu mih Lemambang ti belajar Pengap Gawai Burung ti tulin ari Lemambang Sengalang Burong empu ti benama Sampang Gading. Mayuh peturun Lau Moa agi diau mendam di menua Skrang, Saribas enggau Kalaka datai ke maya hari diatu. Lau Moa mega apai Chaong ti beranakka seiku Tuai Kayau Iban ti berani sereta tebilang benama Tindin “Pimpin Bragah Ngindang” ti mungkar menua Batang Paku.”
TIMANG ENGGAU PENGAP
Tentu pemacha agi ingat pasal bansa Dayak, Iban Borneo ti datai ari peturun Sengalang Burong seduai Bejie [bepun ari Telichai]. Kaul peturun anak telesak kaban belayan ti baka nya makin rapit-serapit sepengudah uchu Sengalang Burong ti benama Sera Gunting medung ke aki iya di Tansang Kenyalang.
Sera Gunting mih mensia keterubah mai adat Iban ke dunya mensia ti ditampung kitai Iban nyentuk ke sehari tu.Pia mega sebedau pindah ke langit Keling ngajar sereta ngelalau aya sereta bala petunggal iya pasal adat gendang rayah enggau Gawai kena ngangauka sida enti deka minta tulung, minta pandung sida Antu Bunsu Petara tu.
TIMANG TAPANG
Kenu ku Dr Chemalin Osup Pengap nya kena Lemambang ngangauka Antu Bunsu Petara ngabang lalu minta tulung sida. Timang pan baka nya, tang lebih agi dikena Lemambang ngasuh sida Antu Bunsu Petara nya muru Antu. Ambi ke chunto, Timang Tapang, tuju nya ngangau sereta minta tulung Antu Bunsu Petara muru Antu Rembia ti selalu ngachau mensia lebuh ngulihka manyi ba tapang nya.
Nya mih kaul kitai mensia enggau Antu Bunsu Petara. Nitihka jerita tuai Antu Bunsu Petara enggai meda kitai Iban ngereja pengawa ti jai. Reti nya semua tuju Gawai ti diintu Iban patut bisi tuju manah betuaika Lemambang tauka Manang.
Pia mega, munyi aku dulu suba, sekali agi ku madah, tuju aku mai kita macha tauka mansik pasal dunya misteri tauka mensia mistik, ukai aku deka mai kita nyembah ANTU tauka ANTU BUNSU PETARA tang tetap nyembah Petara (God Almighty, Tuhan Allah Taala) taja kitai ngena chara ti bebida.