Datu Dr Penguang anak Manggil.
MARUDI: Kaban Parliem Baram, Anyie Ngau ngasuh komuniti Cina ba sitak N.76 Marudi ngambika meri sukung ngagai chalun Gabungan Parti Sarawak (GPS), Datu Dr Penguang anak Manggil maya Pengawa Bepilih Besai Nengeri Ke-12 (PRN-12) kena 18 Disember tu.
Ku iya, sukung komuniti Cina enggau raban bansa bukai beguna amat dikena iya neruska pemansang ba menua pesisir.
Penguang nya chalun ngagai semua raban bansa, enda ngira bansa, agama enggau chara pengidup nya kebuah beri sukung ngagai iya maya muai undi kena 18 Disember, ku iya.
Ku Anyie, GPS ke diketuaika Kepala Menteri Datuk Patinggi Tan Sri Abang Johari Tun openg pedulika pengidup rayat lalu nya kebuah mayuh bengkah komuniti ba Marudi enggau Baram diasuh meri sukung ngagai pengari rayat GPS dikena nentuka pengidup rayat jemah ila.
Ku iya, lima taun ke udah Penguang udah mantaika diri ulih ngatur pengawa pemadu manah sereta mai ubah ngagai kandang Marudi, Bakong, Beluru, Tinjar enggau mayuh bengkah kandang bukai ba DUN Marudi enti dibangingka enggau 20 taun ke udah maya dipegai pengari rayat dulu suba.
Anyie mega madahka, pengelama 20 taun nadai berubah lalu kitai patut beterima kasih ngagai Datu Dr Penguang ke mayuh amat mai ubah sereta meda Marudi mansang berengkah ari Penguang nyadi pengari rayat.
Iya mansutka jaku munti nya maya ba siti pengerami makai malam begulai enggau komunti Cina ke diatur Kelab Penyukung Parti Demokratik Progresif (PDP) enggau GPS malam Hari Minggu ke udah.
“Kitai ngarapka bepilih besai ke sekali tu Marudi enggau mayuh bengkah kandang bukai nyadi kandang burak ngagai GPS.
“Maya PRN ke sekali tu kitai deka meda majoriti lebih ari 5,000 undi ngagai chalun GPS laban rayat Marudi agi begunaka pemansang ngena Datu Dr Penguang,” ku iya.
Sama bisi enggau maya pengerami nya chalun GPS, Datu Dr Penguang anak Manggil, Walikota Kunsil Pelilih Marudi (MDM) Kunsilor Edward Mendai, bala tuai mensia mayuh, tuai raban bansa, bala kapitan enggau Chairam Ngatur Pengerami Kho Thien Seng.
Oleh JIKU JUGUONG