Pengerindu disada ngena renung

Apin lama ti udah penulis tekenyit bendar lebuh nembiak tengan umur ngenyit nyada renung ba siti pengerami melah pinang di mengeri besai Kuching ditu. Pengerami nya nyatup indu dara ari Kuching enggau lelaki ari menua Song di sitak Kapit.

Pengelandik nembiak nya ngerintaika leka renung ti nyantil pengerindu enggau penyayau entara dua iku mensia endang amat ngemegahka ati semua mensia mayuh ti sama bisi begulu ngeramika atur melah pinang ba siti hotel tebilang di Kuching ditu malam nya.

Kitai bansa Iban endang sigi ditemu sereta dipuji kaya ba pengawa enggau main asal. Renung ti siti main asal ti agi mengkang dikemeran nyentukka seharitu. Nyadi renung tu bisi dua bengkah bansa. Iya ti balat agi dikemeranka mensia mayuh datai ka saritu iya nya renung semain. Siti agi renung ke jarang agi didinga tauka dimainka bala kitai nya renung sakit.

Ba pelilih menua Saratok emggau Debak bisi dua-tiga puluh taun ke udah tu, renung sakit agi bisi dikerejaka bala lemambang taja pan iya jarang bendar. Kebuah pia, laban bala kitai di menua nya nyau udah bela masuk pengarap Kristian lalu udah lama muai pengarap lama. Nya alai main asal baka renung sakit pan jarang dikereja kelimpah ari ke endang nadai tentu mayuh bala lemambang ke nemu berenung ka orang sakit.

APAI DINGGU

Ba menua kami di Batang Malupa, pati Krian, semina siku lemambang ke udah tebilang laban suah berenung ka orang sakit. Niang lemambang nya ti ditemu orang ngena nama kangau iya Apai Dinggu sigi ditemu orang suah ngereja renung sakit. Iya enda kala ngerikut renung sakit ba RTM tang bisi ngerikut sampi dalam taun 1955.

Nitih cherita, niang lemambang Apai Dinggu bisi sekali diambi orang berenungka siku apai tuai orang ke sakit ba rumah panjai Lubuk Bundung dalam Malupa. Nyadi orang ke sakit nya niang Mansur a.k.a Apai Ipit menya ke maya nya baru ditemu orang ba kerapa menua ili udah bekau ke tesat dalam pengelama lebih sapuluh hari. Udah bekau ke berenung nya, enda ga iya pulai gerai baka selama tang iya agi ulih idup dalam kurang lebih dalam lima bulan.

Nyadi sebengkah renung ke dikumbai renung semain nya siti bansa main asal ke agi mengkang dikemeranka bala lemambang kemaya hari tu. Mayuh kitai Iban udah nguji ngerikut ba RTM renung semain. Nyadi nyawa ke suah ditabur ba RTM lalu dikelala mensia mayuh baka nyawa Segaya anak Geraik (ari Betong), Bidin anak Sanggu (ari Nanga Ulai, Debak), Ngelai anak La enggau Baja (ari Awik), Jamit (ari Ulu Krian), Lindung ak Lanchang (ari Ulu Krian), aya aku Dundang anak Enchana (ari Sungai Belung, Malupa), Jelemin Jantan a.k.a Apai Jandek (ari Kedap) enggau niang Saban anak Imung a.k.a Apai Badey ari rumah panjai Kedap dalam Malupa. Semua sida tu udah ninggalka dunya injau kitai tu magang tang mengkang dikingat laban ke landik berenung.

Laban pengawa belagu nya ukai main asal kitai Iban, renung semain tu meh tau diambi kitai nyadi ganti lagu. Kebuah pia, laban iya ulih dibanding kitai enggau lagu opera bansa ribai kelia, laban iya sama nyeritaka asal, pengasai sereta enggau mayuh bengkah pengirau ati, penyenang, penyamai, pia mega pasal penusah enggau penanggul bukai dalam dunya pengerindu, belaki-bebini enggau pengidup bujang-dara kitai mensia. Iya tau dikumbai pengerintai asal dunya pengerindu kitai Iban.

Sebengkah main asal ke balat agi dikemeranka kitai Iban ba Batang Saribas enggau Batang Krian, renung mega nyidi pemutus ati, pemenchi, unak enggau duri dalam dunya pengerindu. Iya mega siti chara tauka jalai sida ke bujang ngenataika asai ati ngagai sida dara perembam dalam awakka tau malas lalu sama-sama ngerasuk diri dalam dunya pengerindu.

TUNDI BUJANG DARA

Nyadi lebuh ke berenung, lemambang nya lalu milih jaku ke setimbal awakka manah munyi didinga. Iya mega ngaga gulung sera nyawa awakka nyaris sereta manis ba pending bala peninga mayuh.

Renung semain mayuh agi nyerita pasal pengawa enggau tundi antara sida ke bujang enggau dara ba rumah panjai. Ambi ka banding, lemambang selalu mungkal tauka ngepun renung semain enggai genteran ke madah ka diri lembau deka berenung munyi tu: ‘…lembau berenung tang nyau alah gulu bala anembiak ti begempuru duduk berimbai, sereta laban nyau alah pangkang sida apai orang ti ngerigang duduk ngelulai..’ Udah nya baru iya ngerintai lalu nyebut leka renung ke nyadi batang renung iya lemai nya.

Orang ke berenung nya ulih milih ba senentang ni iya deka ngepun renung iya. Ambi ka banding, iya milih ari pun indu ke nyera laban baru betubuh bisi munyi tu, ‘ nyera tetenguk deka makai upa rutan jelai enggau raba assam binjai..’ Udah nya iya pan lalu ngerintaika laki indu nya ke lalu belabuh bepenti-pemali. Nyadi ba pengarap asal Iban kelia, mayuh amat penti pemali ke enda tau dikereja laki indu ke betubuh bisi nya.

Iya lalu nampung renung iya nya tadi ke nyeritaka indu nya lalu beranak indu. Udah anak iya nya manggai tiga bulan, iya lalu diberi mandi ba sungai ke nandaka iya udah sebulu enggau babas sereta ai ba menua nya. Udah umur iya manggai ngagai enam belas taun, apai iya lalu ngaga padung endur iya tinduk. Renung iya bisi nyebut munyi tu, ‘…padung ke belikau nabau ngeraran emggau sengkilung tedung bulan…’ Indai iya pan lalu mubuh ka minyak kena ngemauka padung nya, ‘….mubuh belabak minyak jayau jematan…’ awakka padung iya manah bau disium bala sida bujang ke datai ngayap kia.

Semua bala sida bujang ba genturung menua nya lalu berebut deka ngayap ngagai indu dara nya laban empa pemanah bau padung sereta mega empa pemajik iya empu. Ditu lemambang nya lalu enggau naka ulih ngena pemandai enggau pemanah nyawa iya ngerintai enggau leka renung ke naka pemanah iya ke tau mega ngasuh ati orang ke ninga nya lantang, ketawa, gaga sereta mega tau mega nyayat ati sida ngasuh tusah, gagau, lembau enggau sinu. Lebuh ke ninga lemambang ke landik, mayuh baka sirut nyabak bala orang ke ninga empa penyinu ati ni.

Udah nya lemambang pan manggai ba endur iya ke ngenang serebana indu dara nya lebuh orang bujang nyau nadai datai ngayap iya agi. Indu nya serabana ka diri nyau tusah ati, sereta lembau kediri munyi tu, ‘ indu dara udah merampau, nguan genturan papan linsu begulai enggau perambu gulung kibung….’

Bepun ari nya iya enggau siku ari indu sida serumah ke serambau lalu pansut turun ka babas enggau tuju deka ngiga tubu munyi tu, ‘…ngiga tubu ngagai siti munggu langgung bedarung…’ Udah seduai bejalai cukup penyauh ari rumah sida, dia seduai berunding sereta setuju deka munuh diri. Seduai lalu ngiga tubai. Udah tetemu ka tubai seduai lalu nutuk tubai ba cuban kayu. Lebuh seduai udah ngetu nutuk tubai sereta lalu udah bulih cukup ai tubai ambi ka irup seduai, dia seduai lalu deka ngirup ai tubai nya. Lebuh seduai baru deka nuntum ka cuban ngagai mulut, dia dua iku bujang ke sigat amat lalu bisi ayan ba mua seduai, segenda bediri ngimbai seduai ngena ngepan kitai Iban. Bujang nya lalu ngerampas cuban ai tubai ari seduai sereta lalu nikau iya jauh. Ditu lemambang ngena pengelandik iya berenung sereta ngena jalai renung ke mayuh gerinek enggau gerananing nyawa.

NINGA PEMANAH LEKA RENUNG

Angkat ari nya lemambang lalu nyeritaka orang bujang ke mai seduai pulai ngagai menua seduai sereta lalu deka ngambi seduai ka bini. Ba rumah panjai indu dara nya tadi apai indai seduai lalu belabuh tudah ati laban seduai nadai pulai lalu dikumbai lenyau. Orang ba rumah bujang dua iku nya naka iya pengaga ati lalu selamatka seduai.

Enti bisi awak, pemacha anang enda nguji ninga ka renung semain ke ditabur ba radio. Kita tetap deka rindu ati ninga pemanah leka renung sereta mega nyawa bala sida aya ke berenung nya. Lalu ari semua sida ke berenung, siku sida ke balat ngasuh ati rindu, nadai lebih ari niang Segaya anak Geraik menya. Ukai ketegal nyawa iya manah, tang laban leka enggi iya bisi nyelai ari enggi sida bukai, sereta mayuh leka ke ngasuh ketawa geli ati.

Sekeda bala lemambang ke udah pegari nama berenung dalam radio nyangka mayuh udah parai.

Nya alai enti bisi awak, anang enda belajar berenung semain ngichaka dudi hari ulih rekoding ba radio. Tentu bala sida Edwin Manggah, Bana Jimbat sereta bala sida Mujap enggau Bunyau gaga enti kita bisi pengelandik nya.

ULIH TELESA EMPERAN