AUM MEDIA … Datuk Amar Douglas Uggah Embas (tengah) lebuh dirandau pengarang berita pengudah pengerami bejadi Aum Pengari Sekali Tiga Taun PBB Mambong ba Hotel Penview kena Hari Enam ke udah.
KUCHING: Parti Pesaka Bumiputera Bersatu (PBB) sigi enggai berunding sereta tetap deka ngengkahka chalun parti bediri ba sitak Parlimen Puncak Borneo sereta terus deka ngetanka kerusi nya maya Pengawa Bepilih Besai Ke-15 (PRU-15) ke deka datai.
Ku Sapit Presiden PBB Datuk Amar Douglas Uggah Embas, kerusi Parlimen Puncak Borneo nya kerusi ke beguna amat dikena madahka tuju perintah nengeri ba Dewan Rakyat.
“Nama utai ke udah dipejuraika senentang compromise? Aku udah ngasuh semua raban parti ba endur tu (DUN Mambong) ngaga pengawa enggau naka ulih dikena nentuka chalun PBB menang maya Pengawa Bepilih Besai Ke-15 (PRU-15) ke deka datai,” ku iya madah ngagai media pengudah pengerami bejadi Aum Pengari Sekali Tiga Taun PBB Mambong ba Hotel Penview kena Hari Enam ke udah
Lebuh ditanya sekalika PBB deka meri jalai ngagai Datuk Willie Mongin baka Pengawa Bepilih Besai Nengeri (PRN) ke udah deka terus ngetanka kerusi Parlimen Puncak Borneo, Uggah madah ba maya ke diatu nya kerusi PBB.
“Nya kebuah aku ngasuh semua raban parti tadi kami meseti ngereja pengawa enggau naka ulih dikena nentuka semua chalun PBB menang maya Pengawa Bepilih Besai Ke-15 (PRU-15) ke deka datai,” ku iya.
Lebuh ditanya sekalika Kaban Parlimen Puncak Borneo Datuk Willie Mongin udah kala minta nyadi raban PBB, Uggah madah iya nadai ninga sebarang berita senentang Willie ngaga pengawa ke baka nya ba maya ke diatu.
Sebedau tu Kaban Parlimen Puncak Borneo Datuk Willie Mongin kala nyebut iya besedia deka bekerejasama enggau Parti Gabungan Sarawak (GPS) ngetanka kerusi nya maya PRU-15 ke deka datai.
Ku Willie, iya komited deka ngetanka kerusi nya laban deka neruska agenda pemansang enggau pengelantang pendiau rayat.
“Aku nejuka nya ngagai bala tuai parti laban sida bisi meda pemujur pengawa ke udah digaga aku mantu mensia mayuh ngelama tu.
“Taja pia, aku ke ngempu kerusi ngarapka sida iya meri peluang enggau ruang ngagai aku ngetanka kerusi nya ngambika ulih bekerejasama enggau GPS.
“Aku mega besedia deka ngetanka kerusi ngarika GPS enti diberi ruang enggau peluang dikena nentuka agenda ngemansangka Sarawak,” ku iya.