![](https://utusansarawak.com.my/wp-content/uploads/2022/10/image-31-1024x776.png)
MIRING... Bansa Iban endang mayuh kena sida nyembah Bunsu Petara sida empu, minta pengelikun.
NTA Tusun Ke-35
Nitihka pansik teori Infraed (IR) Light for Ghost Hunting, Sains tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpaha ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh “dimusnah @ be destroyed”, tang ulih bebali “transformed”. Sida Saintis sigi amat enda pechaya bisi Antu; laban sida nyebut nya “energi negatif / black energy” – ukai ghost / antu, pia mega sida bansa bukai nyebut “gene / jin”, ukai Antu tauka “hantu”. Berindik ari teori Antu @ energi negatif tu enda ulih dibunuh “dimusnah @ be destroyed” tang ulih bebali “transformed”; nya mih kebuah maya Manang belian munuh Antu Buyu, jelu tauka utai bukai ti dipansuk Antu nya sigi amat mati dipantap tauka ditimbak Manang, bisi bangkai dipeda, tang Antu ti tama dalam tubuh jelu tauka utai bukai nya tadi, pansut lalu pindah ngagai endur ti bukai lalu bebali “transformed” nyadi asap, api, ai tauka utai bukai. Nya alai, enti sema barang pesaka kita bisi nyelai tauka kena pasuk Antu, anang muai, nunu tauka mechahka barang nya; laban Antu endang enda ulih bunuh. Barang pesaka kita nya amat angus, pechah, tengelam, tang Antu ti tama utai nya tetap agi idup lalu bebali nyadi utai bukai.
Batu Tibang di Ulu Pasai Siong
Nyait endang ngadang penatai bansa Iban ke Sungai Pasai endang enda ulih tagang sapa-sapa. Sida tu seraban bansa ti rengkar sereta udu ngayau malas uti bunuh sapa-sapa ke ngachau sida dulu. Sebedau seraban Iban nyepal jauh agi ke ulu Sungai Sekara, Nyait ngemeranika diri nguji betemu enggau tuai raban bansa Iban ti kira-kira sebulan udah nirika rumah panjai ba nanga Sungai Sekara. Datai din iya lalu dikelaluka Tuai Rumah Changgai. Bisi ga ati Tuai Rumah Changgai kesal mimit. Kada enda mayuh bala iya udah sedia ngelingi rumah tu, ku ati iya. Udah ambis randau nanyaka penatai pangan diri seduai sama-sama enda nyima ati. Tuai Rumah Changgai enda ga nangi agi. Iya nemu penatai Nyait ukai mai ati ti jai.
“Bisi pejalai aku, unggal. Tang enda ga bangat berat ,” ku Nyait ngepunka randau seduai. Kekatat mimit munyi jaku iya sambil ngaru pala. Mata iya enda tetilap gining-gining kin kia.
“Au mih. Sebut dia mih, anang takut,” ku Changgai meransang Nyait mantaika tuju penemuai iya nya. Nyait mega nya berani-seberani. Nadai nangi agi iya bejaku taja tadi ati iya rawan mimit asai ke niti dan perawan jurai. Iya takut enggaika Changgai tak ringat lalu ngambu iya munsuh. Bebendar iya nusun leka jaku alus enggaika bisi nebak ati tuai bansa Iban nya.
“Kami bansa Beliun gaga bendar ati meda penatai kita ba Sungai Sekara tu, unggal. Nyamai kami udah tu ila. Bisi orang begulai sejalai nguan menua tu. Nyamai bala kami ila bisi orang bansa bukai enggau begulai sejalai. Kami bansa Beliun sigi enda bumai, kami semina idup makai linut mulung, pentu enggau empasa. Kami semina ngaga redas aja endur kami nanam empasa. Sama bempu sungai tu mih kitai, ungggal. Besai menua tu. Kampung puang agi mayuh bendar empai diperimba,” pia ku Nyait.
Gaga bendar ati Changgai ninga jaku tuai bansa Beliun nya. Kumbai iya pedis ati Nyait meda bala Iban nyau majak datai berebut enggau bansa Beliaun endur bumai. Berengkah ari sehari nya Changgai enggau bala nembiak iya nadai nangi berimba bumai betaun ngelingi sungai nya. Pia mega kampung jerung dia endang agi mayuh bendar babi, rusa enggau jelu jangkit. Tak sepeneka ati mih bala Iban ngasu beburu ba kandang menua nya. Amat nadai ga sida kala charut enggau bansa Beliun. Tang dini dih bisi, bala Beliun ga nyau ambis pindah. Semina tinggal bala nembiak enggau anak Nyait aja. Sida tu mega nyau berengkah irau ati lalu ngingatka jaku Penghulu Nabong. Nyau kesit-kesit ati sida deka pindah tang sida takutka Nyait. Sida enggai ga ninggalka iya kediri-diri. Sida mega enda kempang mai Nyait pindah, takut dikumbai iya buyan. Tang Nyait udah nangkan sida enggau jaku. Enti sida deka pindah iya enda nagang.
“Enti kita buyan aku ga enda buyan. Aku enda takut taja aku enda berani ngelaban bala Iban ngena duku. Pia mega enti kita takut enggau aku ngetanka tanah kampung ti endur kitai beridup tu, aku enda ga mejal kita. Aku enda ngetanka kita enti kita deka pindah ari Sungai Sekara tu. Bala Iban endang enda alah tagang kitai datai lalu ngerumpang kampung puang di menua kitai tu. Aku udah madahka kita suba. Alai mih….! Titihka Nabong…” ku Nyait bejaku enggau tuai-tuai bilik nembiak enggau bala anak iya. Ninga munyi nya mayuh bendar nembiak iya ninggalkan Sungai Sekara. Iya mega enda nagang anak iya ke udah belaki bebini nitihka laki tauka bini sida pindah. Ujung-ujung tinggal Nyait enggau bini iya ti benama Menit aja. Maya nya umur Nyait udah manggai 60 taun. Nyau tuai tang agi kering gawa sebelah tanah.
Setaun nampun di bukit sebulan nanjan dilangit. Taun beganti taun. Bulan beganti bulan. Hari beganti hari. Nyau enda berasai apus ga bulan, apus ga taun. Nyait enggau bini iya nyau enda diau ba rumah panjai ti endur iya mendam enggau kaban belayan sereta menyadi iya suba. Semua bala menyadi enggau anak telesak iya udah pindah magang-magang nitihka Nabong. Enda nyamai diau kediri ba rumah panjai. Seduai nyau rindu agi diau di langkau umai. Langkau umai seduai tegap amat ba tuchung bukit ti enda tentu jauh ari tebing entigis Sungai Sekara. Umai seduai nya mega dikelingi rumah panjai bansa Iban tunga ke ulu ke ili ti baru datai ari ili Sungai Pasai. Mayuh sida tu datai ari ulu Kanowit enggau Julau. Ambis mih tanah bansa Beliun diempu bala Iban, ku Nyait muchau kediri. Makin pedis-sepedis ati iya. Puas iya berundingka chara dikena mantupka pemedis ati diri. Tang nama dih daya? Tatka aja mih nganti peluang bebalas pia ku ati tudah Nyait. Kada mih bisi peluang?
Bulan Jun iya nya bulan Januari tauka Bulan Satu ba kalender bumai betaun bansa Iban. Bulan nya mega sida berengkah ngabas tanah deka endur bumai. Sebedau manggul sida begawai Batu. Maya nya sida merekat batu enggau semua pekakas dikena bumai ti bukai. Sebulan-bulan nya bala Iban begawai ba rumah sebuah ba rumah sebuah enda ngetu-ngetu. Empa bala Iban begawai ukai main-main. Beram bangup enda alah raup. Tajau tuak enda alah tatak. Enda alah tiu iku jani, rusa, lelabi enggau ikan gemian dalam babas ti diulihka sida sebedau ke begawai nya. Pansuh peneka nyiuh. Salai peneka makai maya sida ke begawai. Udah pulai ari rumah sebuah, mansang baru ngagai sebuah rumah ga bansa Iban begelumu datai ngabang ngagai pangan diri. Pia mega ba Sungai Sekara maya bulan nya. Rami amat menua nya. Mayuh amat bansa Iban ngabang ngagai Sungai Sekara. Ngena peluang tu Nyait deka mantaika pengeringat ati diri ti benung bepedi. Kati ulih kini Nyait seiku nyerang bala Iban ti nyemayuh nya? Nyau baka bala pengabang, kenu ku jaku sema banding orang tuai dulu kelia. Enti iya deka nyerang bala Iban maya sida ke udah bebendar ngirup tuak sampai mabuk tentu ulih. Mabuk magang bala pengabang enggau orang ke empu rumah maya nya, kini? Baka ni chara Nyait malas dendam? Ku iya madahka adik iya Nabong suba iya enggai ngena pengering tauka duku. Baka ni dih?
Pagi nya tumu tudah tuai nurun ke tengah laman. Ngelama tu iya tumu ngindik tengah laman laban deka meri manuk iya makai. Suah mega iya tumu ngindik tanah laban deka ngabas bubu, lebih agi entu bisi ujan malam nya. Tang ke sekali tu lain agi pengawa iya. Iya tumu laban deka nampung pelajar seduai iya anak nyumbuh ti diberi iya nama Koyad lemai nya. Lebih seminggu iya udah ngajar anak nyumbuh inang iya nya ngajat. Anak nyumbuh nya udah jinak bendar laban ti ari mesai legan anak nyumbuh nya diinang iya. Diatu udah besai bendar tubuh iya. Enti baka anak mensia udah berangkat bujang anak nyumbuh nya. Kelimpah ari Menit bini iya, anak nyumbuh tu mih nyadi kaling iya kia-kia ngelama tu. Enti iya gawa di umai sigi dibai iya belama tudah anak nyumbuh nya. Enda kala iya ninggalka pangan iya nya kediri-diri di langkau.
“Aram berengkah baru tua pagi tu, Koyad. Bah …, titihka aku baka ngelama tu,” ku Nyait bejaku enggau anak nyumbuh nya. Anak nyumbuh nya rising-rising ketawa gaga ati nitihka rentak tempap jari sereta singkang kaki Nyait. Bahu enggau jari iya mega didingut nitihka liuk jari Nyait. Pandai amat ga anak nyumbuh nya nundaka gaya linguk tubuh mensia ke ngajat nya. Nyait nyingkang ke kanan, ke kanan ga iya nyingkang. Nyingkang ke kiba Nyait, nyingkang ke kiba ga anak nyumbuh nya. Meda Nyait engkechit, tinggi agi ga kechit iya. Iya nguji deka nunda munyi nyawa Nyait ti ngeluluka bunyi engkerumung tang enda datai. Tak semetak-semetak aja munyi nyawa iya, enda salah-salah munyi nyawa indu engkeruak ke ngumbai anak. Nyait ketawa lekik-lekik kediri meda ulah kaban iya nya. Sengah-sengah Nyait malik ke belakang beratika singkang anak nyumbah nya. Udah lelak seduai pan sama-sama ngetu lalu duduk ba lumpung kayu seiti sambil bepuput ngena daun pelat.
“Landik amat dek nunda aku nih, Koyad! Baka nya mih. Anang malu-malu. Udah tu lagi dek kediri ga,” ku Nyait sambil merening mua anak nyumbuh nya ti ngerinyik ngayanka ngeli baka ke ketawa nyaut jaku iya. Udah neguk ai tebu segayung Nyait ngambi selumpung kayu tekalung ti udah dititi iya kulit. Kayu tekalung nya rangkai sereta lempung bendar. Nyaris bendar munyi kayu nya lebuh ditekung ngena pemalu kayu. Nyait betabuh ngena lumpung tekalung sambil nebah nyawa ngeluluka bunyi gendang. Tagun-tagun pala tudah anak nyumbuh nya sedia deka ngajat.
“Bah…! Ngajat, dek Koyad…! Heee….iis ! ” ku Nyait meransang anak nyumbuh nya. Ninga bunyi tabuh Nyait tak ngena, anak nyumbuh enda berasai nyau kechit-kechit. Iya angkat lalu entepaka jari iya sambil nyingkang nitihka rentak palu lumpung tekalung nya tadi ti bekabih sereta ngampir bendar munyi tabuh ajat bunuh bujang berani. Tuchum-tuchum lelegup tudah Nyait meda gaya ulah anak nyumbuh nya mantaika ajat bunuh nitihka ajar iya ngelama tu.
“Apuu…. amat pandai dek, Koyad. Ngenung bala Iban meda dek lagi,” ku Nyait meransang bakih iya nya. Bula enda ketawa sereta gaga sida iya lagi meda dek. Tentu sida enda kala meda nyumbuh pandai ngajat, ku ati Nyait andal dalam ati. Sebedau nurun ngabang malam nya Nyait enggau bini iya kisuk bendar nyikap anak nyumbuh nya ngena pekayan tradisi Iban. Ketapu tudah nyumbuh nya digaga iya ari wi ti belanjangka bulu burung menaul burik. Baju burung anak nyumbuh nya digaga iya ari chebik kain beludu ti disangkingka leka marik ti digaga ari leka rampu enggau leka entekai. Pia mega sirat anak nyumbuh nya digaga iya ari laluh kain beludu tadi. Tuchum-tuchum kediri Nyait meda gaya pekayan anak numbuh nya. Bini iya enda memunyi tang nitih aja nama utai diasuh Nyait. Bisi ga mua iya lisnsum-linsum mimit meda Nyait masukka pekayan nya ba tubuh anak nyumbuh nya.
Udah makai lemai nya semua pengabang ba Rumah Jelenggai sama jenuh ngetatka kenyang. Sida berandau sambil betumika pangan ngena ai tuak baru. Sekeda benung kisuk betungkunka api damar ba tempuan dikena nenggau ruai. Kira-kira sejam udah nya, Tuai Rumah Jelenggai ngasuh sida serumah nesau semua bala pengabang begelumu ngagai ruai iya. Malam nya Tuai Rumah Jelenggaii bisi nirika gawai ranyai dikena malas uti sida ari Rumah Changgai. Nyau semak semua tuai rumah ba Sungai Sekara bisi datai. Bala anak buah Tuai Rumah Changgai ari Nanga Sekara mayuh amat datai. Sekeda pengabang bisi mega datai ari Batang Pasai enggau Pasai Siong. Rami bendar sida malam nya. Richah munyi mensia berandau sambil bepakaika utai.
(Cherita tu ditusi19Serit Anak Nuing ba Batu 19 Jalai Oya-Sibu, Sungai Pasai, Sibu, 1989)
(Betampung ba Tusun Ke-36 minggu nyin ila)
Nya mih pun cherita ti nyelai tang amat nyadi di entigis Pasai Sioang kira-kita jeman Raja Charles Brooke dulu kelia. Nitihka pengingat Serit Anak Nuing, sebedau bansa Iban datai berumpang menua Sungai Pasai tu kelia, menua nya endang agi diuan bansa Beliun. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen & gambar ti releven ngagai aku tau giga aku ba lumur whtssp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai “misteri” di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizinNya” aku deka datai ba endur kita nya.
Oleh HARRY USUP UMBAR