![](https://utusansarawak.com.my/wp-content/uploads/2022/09/image-55-1024x587.png)
Tusun Ke-32
NITIHKA pansik teori Infraed (IR) Light for Ghost Hunting, Sains tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpaha ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh (dimusnah @ be destroyed), tang ulih bebali (transformed). Sida Saintis sigi amat enda pechaya bisi Antu; laban sida nyebut nya “energi negatif / black energy” – ukai ghost / antu, pia mega sida bansa bukai nyebut “gene / jin”, ukai Antu tauka “hantu”. Berindik ari teori Antu @ energi negatif tu enda ulih dibunuh (dimusnah @ be destroyed) tang ulih bebali (transformed); nya mih kebuah maya Manang belian munuh Antu Buyu, jelu tauka utai bukai ti dipasuk Antu nya sigi amat mati dipantap tauka ditimbak Manang, bisi bangkai dipeda, tang Antu ti tama dalam tubuh jelu tauka utai bukai nya tadi, pansut lalu pindah ngagai endur ti bukai lalu bebali (transformed) nyadi asap, api, ai tauka utai bukai. Nya alai, enti sema barang pesaka kita bisi nyelai tauka kena pasuk Antu, anang muai, nunu tauka mechahka barang nya; laban Antu endang enda ulih bunuh. Barang pesaka kita nya amat angus, pechah, tengelam, tang Antu ti tama utai nya tetap agi idup lalu bebali nyadi utai bukai.
ANTU SABUT
Kenu ku orang tuai, enti kitai bisi ninga munyi mensia nyabak di dalam babas, di kampung tauka ba sebarang endur ti nadai diuan mensia, nya mih bansa antu ti dikumbai sabut. Enti kitai bisi ninga sabut ba menua nya, sigi bisi mensia ti nguan menua nya, parai enda lama udah kitai ti ninga sabut nya. Sabut suah nyadi ari munyi nyawa jelu tauka burung.
Dalam kandang taun 1980, maya nya Rantai bejalai nyuluh ikan kediri ba Sungai Teras, pati Sungai Kabah. Maya nya musin buah rian labuh. Enda jauh ari endur iya ti nyuluh nya, dia mih langkau Sakan ti alai iya mulung buang rian. Apin lama udah berengkah nyuluh ba sungai nya, tekenyit amat iya ninga munyi orang nyabak.
“Apuu.., nama kebuah Sakan nya nyabak malam-malam baka tu? Kada enda kena tinggang buah rian, unggal nya,” pia ku Rantai bejaku kediri, nanya diri empu. Maya nya endang udah jauh malam, urung pukul 10.00 malam. Ninga munyi nya, tengau iya tunga ke langkau Sakan, peda iya buang kuang kebat terebai ari langkau Sakan nya.
“Apuuu…, burung nya ti nyabak tadi pia! Enda kala aku ninga burung nemu nyabak munyi nya, baru iya mih tu,” ku Rantai bejakau kediri baru. Tekenyit bechampur geli-geli mih ati iya, ninga sabak burung nya munyi sabak mensia. Gamal burung nya semak sebaka enggau burung menaul tauka burung puk.
Tengau iya baru ga ke ili, peda iya burung nya tadi benung nepan ba dan anak engkabang. Engka pedis ati tekenyit ninga sabak burung nya, dia iya lalu nyapai duku lalu nyimpung burung nya. Putus dua sereta enggau dan engkabang, tubuh burung nya disimpung tudah Rantai.
Enda lama udah nya Sakan ditemu sakit mutahka darah, lalu ngujungka iya lesi bebadi maya umur urung 30 taun. Engka burung kuang kebat nya sigi nemu Sakan endang bisi penyakit, lalu parai, pia ku penemu sida ke tuai-tuai. Ukai reti nya, kuang kebat tauka sabut nya ti munuh Sakan. Nya mih penyelai antu sabut. Baka ni ku burung nya nemu nyabak chun-chun munyi sabak mensia, nyau duie-duie? Ku sida ke tuai, burung kuang kebat nya nemu nyadi antu, lalu nyabakka semengat orang ti deka parai. Iya ke bendar, antu (evil spirit) tama lalu nguna tubuh burung nya, ngenataika pesan ngagai mensia. Taja pia, engka amat ga antu nemu semengat lalu ngelala semengat mensia ti tabin lalu deka parai, laban antu nya mega roh (semangat) sebala enggau tubuh semengat (roh) kitai mensia. Nitihka penemu manang dalam agama adat bansa Iban, semengat kitai mensia kekadang diau jauh ari tubuh kitai mensia empu, tang nitihka penemu agama Kristian, semengat (roh) kitai mensia diau dalam tubuh mensia empu, enda mudah beserara ari tubuh, seagi-agi kitai mensia enseput lalu agi idup. Baka ni ku penemu kita bukai dih, wai? Dini endur semengat kitai mensia?
ROH ANTU SABUT NGENA MUNSANG
Rantai Lidom mega kala ninga sabut ti nyadi ari jelu munsang. Malam nya iya nyuluh ba endur selama mega. Maya nya musin bungai rian. Empai bangat lama udah bejalai iya pan ninga bunyi sabak anak mit, nyau kela-kela. Enda salah-salah munyi sabak anak mit ti diberi indai iya mandi, tunga ke puchuk kayu. Tengau iya ke atas, peda iya dua iku munsang benung betunga mua.
“Apuu…, nya utai ke memunyi! Nyadi antu sabut, munsang nya nih! Lagi dek ensepi,” pia ku Rantai bejaku kediri. Iya pan nyimpan seigi seterum penabur ke dalam rumbang senapang iya. Diiching iya betul-betul antara pala dua iku munsang nya, lalu dikachitka iya. Pummmmm….! Peda iya talang-talang siku aja labuh ke tanah. Iya pan nyintak duku latuk, lalu ditetak iya pala munsang nya. Pala nya ditikauka iya ke dalam babas, tubuh munsang dibai iya pulai.
Datai di rumah lalu diasuh iya tunu bala anak enggau bini iya. Nanya mih sida nya, nama kebuah munsang nya nadai pala. Rantai madah, pala munsang nya kelalu redak kena perejin leka seterum, lalu enda ulih guna agi, lalu dibuai iya. Udah mansau ditunu lalu dipanduk, nya baru sida sebilik sereta bala menyadi iya ari bilik bukai berenah makai lemai. Maya makai lemai nya, Rantai enda enggau sida bukai nyeput kerat munsang nya. Ku iya, iya sigi enggai makai munsang. Bau kenas, enda tentu nyamai ke lauk.
Udah ambis dagin munsang nya diempa, dikelauk sereta diipung bala iya, nya baru iya madahka sida nya pasal utai ti bendar.
“Munsang nya nyadi antu sabut. Nyabak kekela. Nya kebuah aku enggai enggau kita makai dagin nya. Tang enda ga ngawa, anang irau. Nadai pemali makai dagin iya. Aku ke enggai, laban ti udah geli ati meda ulah jelu nya tadi,” ku Rantai, seraya ketawa lekik-lekik.
Nadai utai nyelai ga nyadi tegal sida ti makai dagin munsang nya. Utai ke nyelai iya nya, baka ni jelu enggau burung nya tau nyadi antu sabut? Kala kita ninga antu sabut, wai?
Bepelasarka cherita nya tadi, sekali agi teori Sains Fizik enggau Sais Spiritual, endang amat nyelai tang amat nyadi mega. Munsang ti nyabak nya tadi ukai nyadi Antu, tang Antu ti tama lalu nguna tubuh jelu nya. Nya mih munsang ulih bebali nyadi Antu. Udah ke mati ditimbak Rantai, munsang mati tang Antu ti tama tubuh jelu nya tetap pansut ari tubuh jelu nya lalu pindah ngagai endur bukai.
Cherita tu ditusi Rantai Anak Lidom, Rumah Intai, Skim Puru, Nanga Tada 2012.
(Betampung ba Tusun Ke-33 minggu nyin ila)
Nya mih cherita ti nyelai tang amat nyadi di dunya ti di gaga Petara (Tuhan). Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai (misteri) di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizinNya” aku deka datai ba endur kita nya.
Oleh HARRY USUP UMBAR