![](https://utusansarawak.com.my/wp-content/uploads/2022/07/image-100-1024x1373.png)
Tusun Ke-24
NITIHKA pansik teori Infraed (IR) Light for Ghost Hunting, Sains Fizik (Theoretical Physicist – Albert Einstein & Sains Spiritual), ujan nyala, endang tanda Antu Bunsu Petara tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpaha ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh (dimusnah @ be destroyed), tang ulih bebali (transformed). Sida Saintis sigi amat enda pechaya bisi Antu; laban sida nyebut nya “energi negatif / black energy” – ukai ghost / antu, pia mega sida bansa bukai nyebut “gene / jin”, ukai Antu tauka “hantu”. Berindik ari teori Antu @ energi negatif tu enda ulih dibunuh (dimusnah @ be destroyed) tang ulih bebali (transformed); nya mih kebuah maya Manang belian munuh Antu Buyu, jelu tauka utai bukai ti dipasuk Antu nya sigi amat mati dipantap tauka ditimbak Manang, bisi bangkai dipeda, tang Antu ti tama dalam tubuh jelu tauka utai bukai nya tadi, pansut lalu pindah ngagai endur ti bukai lalu bebali (transformed) nyadi asap, api, ai tauka utai bukai. Nya alai, enti sema barang pesaka kita bisi nyelai tauka kena pasuk Antu, anang muai, nunu tauka mechahka barang nya; laban Antu endang enda ulih bunuh. Barang pesaka kita nya amat angus, pechah, tengelam, tang Antu ti tama utai nya tetap agi idup lalu bebali nyadi utai bukai.
MENSIA DI DUNYA NYELAI
“Nama kita ngachau anak mensia tu? Badu agi kita ngachau seduai dua iku diri menyadi tu. Kasihka seduai” ku aku madah ngena jaku ke alus sereta penuh basa.
“Enda kami ngachau seduai. Kami semina nguna tubuh iya, kena kami ngenataika pesan ngagai mensia. Kami enda ngachau kita tauka mensia bukai. Maya kami tama tubuh seduai, semengat seduai kami simpan lalaika kami dulu enggau selamat. Aku nemu nuan deka mai orang muru kami ari seduai. Amat nya?” ku Roh nya nanya.
“Amat. Aku udah minta nanya apai indai seduai iya tadi, apai enggau indai seduai iya setuju, aku deka nulung anak seduai diri meyadi tu. Seduai empu pan setuju. Badu kita ‘roh berantu’ tama tubuh lalu ngachau pejalai pengidup seduai”. Naka ulih aku nguna jaku basa ti alus
“Bai nuan kitu orang ti pengabis pandai tauka bekuasa ba dunya kita ditu, muru kami, pan kami enggai badu tama tubuh seduai tu. Kami enda takutka sida tu. Enti iya berani muru kami, bisi balas iya ila, ” ku saut ‘roh berantu’ nya. Munyi sera endang ukai bunyi sera nyawa nembiak lelaki nya. Apuuu.., sumbung udu munyi jaku antu tu, ku aku bejaku dalam ati.
“Kati kita enda takutka Petara ti Tuhan kami?” ku aku nanya.
“Kami takut. Kami pan nyembah Iya,” ku Antu nyaut.
“Kati kita enda takutka Tuhan Jesus Kristus, alai kita berani tama tubuh mensia baka tu? Nembiak dua iku tu nembiak Tuhan Jesus, nembiak Petara mega,” ku aku.
“Kami udah minta pemendar ari Tuhan Jesus,” ku saut Antu.
Terang amai sebut jaku Iban iya. Apuu…, pama amai ‘roh berantu’ tu. Kati Jesus tau ngemendarka sida tu tama tubuh mensia. Enda ku pechaya Jesus deka meri pemendar. Bula antu tu, ku aku bejaku dalam ati.
“Kati kita enda ngachau laki tauka bini seduai menyadi tu dudi hari ila?” ku aku nanya baru.
“Enda kami ngachau. Kami nguna tubuh seduai aja,” ku saut Antu.
“Nama tuju kita tama tubuh seduai tu?” tanya aku baru.
“Nya ‘rahsia’ kami,” saut Antu.
“Aku tu orang penulis lalu deka nusi ngagai orang mayuh pasal penyelai utai ti nyadi ba seduai diri menyadi tu. Ulih?” ku aku.
“Anang,” ku Antu nya.
ROH BUNGAI NUING
“Aku nadai tuju jai, aku semina deka mansik pasal pengidup seduai. Aku mega deka mansik baka ni kita ‘roh berantu’ tau ulih tama tubuh seduai tu, ” ku aku nampung randau kami duai. Munyi ke ngapil minta pemendar aku. Lama iya enda bejaku. Aku pan lama ga tegenung, meratika mua nembiak lelaki nya sambil bepikir. Ninga iya enda bejaku agi, aku pan nanya baru.
“Sapa nuan tu?” ku aku nanya ba
“Aku tu Bungai Nuing,” ku saut iya.
“Kada enda bula nuan tu? Kada enda nuan ‘nyamar’ ngaga diri aja?” ku aku.
“Enda aku ‘nyamar’,” ku saut iya.
Temati kutu ku ninga saut iya. Baru aku nemu diri udah berandau enggau Bungai Nuing. Ngelama tu semina macha dalam jerita tuai aja. Amat Bungai Nuing nya, kini? Engka amat Bungai Nuing ti enggau aku berandau tadi, laban iya berandau enggau aku ngena Jaku Iban. Sebedau nya ‘roh berantu’ nya bejaku ngena jaku English, Latin enggau jaku China. Tambah mega aku nyau teingatka cherita nembiak lelaki tu ti kala diasuh Bungai Nuing ngambi gambar iya benung iya ngajat.
Agi musin Gawai Dayak taun 2009 kena 6 Jun, pukul 9.00 pagi nyentuka ke pukul 4.00 pagi 7 Jun 2009, dua iku diri menyadi tu tadi enda mukai-mukai dikuasa ‘roh berantu’ baka selama. Tang sekali tu seduai madahka diri bisi meda bala orang Panggau (peda gambar) ti ngabang ke rumah panjai sida. Maya nya mayuh utai nyelai nyadi, nyentuk ke sekeda sida serumah begawai nyabut pengabang ari Panggau Libau. Maya nya mih Bungai Nuing meri batu delima mesai tunjuk ngagai nembiak lelaki nya tadi. Batu delima nya diibun petungal iya Jackson John datai ke sehari tu.
KALA DIBAI BETEMU ENGGAU JESUS
Sigi nyelai sekeda mensia dalam dunya tu, makin lama makin mayuh utai nyelai ditemu aku sekumbang ti diau sereta bekaul semak agi enggau mensia dua iku tu sereta kaban belayan seduai. Kekadang mujur ga aku ngepunka randau ruai enggau indu dara bajik tu. Sekali, iya becherita ba aku, iya kala dibai yang iya nya betemu enggau Jesus Kristus.
“Baka ni gamal Jesus peda nuan?” ku aku nanya enggau penuh basa sereta alus. Lelubah iya becherita sambil merening mua aku.
“Lain agi ari gambar ti dilekatka bala kita ba dinding nya. Iya amat bebuk panjai naka tandan bau, besumit sereta beragum, tang sigat sereta manah agi gamal. Mua iya burak sereta perenching. Kala mega aku dibai yang aku nya betemu enggau Santa Maria. Sigi amat bajik gamal Sante Maria, indai Jesus Kristus nya. Burak perenching mua iya,” ku iya nusi jerita.
Untung amai mih indu dara tu kala betemu enggau Jesus Kristus enggau indai iya Maria. Kelimpah ari nya, indu dara bajik tu bisi ngembuan benda mit (guchi) diberi yang iya. Dalam guchi nya bisi ai, lalu tau dikena ngubat mensia, lebih agi anak mit ti tabin nyelai.
Makin lama ti bepikir sereta mansik utai ti nyelai baka nya, sekali hari seiti, enda sengaja ga aku ngepunka randau ruai enggau apai indu dara bajik tu. Entah, baka ni alai randau kami duai nyau datai ba mimpi iya maya agi bujang kelia.
KALA DIBAI MEDA MENUA SEREGA
“Maya agi bujang kelia, aku endang enda kala tinggal sembiang Hari Minggu tauka Missa. Aku mega suah enggau orang seminar (sembiang bebala mayuh) ba mayuh bengah gerija di serata menua Kanowit, Song enggau Sibu. Kala mega aku bemimpi dibai bala melikat ke serega. Sengaja sida nunjukka aku pemanah menua serega.
“Amat manah ga rampa menua serega peda aku. Enda aku kala meda rampa menua ngemanah nya. Enda lama udah nya, sida pan mai aku ngagai menua neraka. Apuuu…. balat ga pengangat menua nya. Berasai angat mua aku kena banding api ti bechura kuning nya. Nyau beterising gamal orang dia nyabak. Pedis gamal sida nya peda aku. Melikat madahka aku, sida nya kena tunu api neraka tegal penyalah sida ba dunya suba. Bisi mega aku meda orang ti semampai dibalut daun api, tama pansut, tama pansut ari api nya. Melikat madahka aku, sida nya bala antu sitan,” ku iya.
Panjai sintak seput iya ngambiska genteran cherita iya nya. Nya mih keterubah aku betemu enggau mensia ti kala meda serega enggau neraka. Engka maya iya tinduk melikat datai lalu mai semengat iya matau menua serega enggau neraka!
BETEMU ENGGAU ORANG PANGAU LIBAU
Dalam mimpi mega apai indu dara bajik tu kala dibai orang betemu enggau orang di Panggau Libau. Dini menua Panggau Libau tu? Engka nadai kitai mensia kala datai ba menua nya, enti enda bemimpi.
“Datai ba sebuah rumah, aku pan dilaluka sida ba rumah panjai nya. Aku madahka diri deka betemu enggau Keling seduai Bungai Nuing. Siku indu dara ti bajik gamal pan datai lalu madahka diri anak Bungai Nuing. Iya pan mai aku tama ke dalam bilik sida lalu diasuh iya milih pengaruh ba sebuah chapan. Udah aku milih mayuh macham pengaruh, aku pan mungkus semua pengaruh nya ngena daun biru, lalu tedani. Baru aku nemu aku tadi bemimpi. Enda lama udah nya aku pan tinduk baru lalu ngarapka diri bemimpi baru mai daun biru nya, tang sekali tu aku ukai bemimpi datai ba rumah orang panggau nya baru. Aku bemimpi asai ke ngulu sebengkah pengerami. Mayuh amai mensia ba endur nya, peda aku. Enda mukai-mukai aku pan tepedaka indu ti ngasuh aku milih pengaruh dalam mimpi aku dulu tadi. Indu dara nya baka ke ngiga aku lalu nyuaka aku bungkus daun biru. Udah nya aku pan tedani lalu nemu diri bemimpi, nadai daun biru ba jari aku. Dua tiga hari udah nya, enda sengaja aku tetmuka selambar buk kira-kira sejengkal pemanjai dalam bungkus ruti kerupuk ti diempa aku. Aku enda ingat, sapa meri aku sebungkus kerupuk nya. Beguai-guai aku madahka indai aku pasal buk nya. Indai ngasuh aku nyimpan buk nya memanah, engka nya mih pengaruh ti diberi orang Panggau Libau dalam mimpi aku. Nadai utai nyelai nyadi udah nya. Laban ti lama udah ngemeranka adat Kristian, enda aku ngintu buk nya ngena piring. Nadai ga utai apa nama nyadi udah nya,” ku iya.
Ba pengujung randau ruai kami duai, apai indu dara tu madahka diri kala diasuh orang nyadi Paderi gerija Katolik, tang enda diasuh apai indai iya. Taja enda nyadi Paderi iya agi meruan kering ba pengarap Kristian, lalu nyadi Tuai Sembiang sida serumah. Ku iya, semina kuasa ngumbai sereta ngemaduka ujan ti agi bisi ba iya.
Nya mih, seribu satu macham kuasa ti nyelai ba dunya tu, tang iya amat bisi nyadi. Nya mih penyelai, utai misteri dalam dunya ti ditengkebang Petara Siku aja.
Naka ke diatu, taun 2022, aku seruran rindu mansik dunya misteri ti bepun ari Jaku Petara (Tuhan), tang aku endang nemu, semua nya endang enggi Iya magang, endang enda ulih ditemu, enda ulih pansik kitai mensia seratus peratus. Taja pia, udah manah mih, enti kitai sama udah ngelala sapa Petara, Bunsu Petara (Dewa), Antu, ti nyelai tang amat.
(Betampung ba Tusun Ke-25 minggu nyin ila)
Sekeda ari artikel dalam gempung cherita Nyelai Tang Amat (NTA) tu, udah kala dichelak nyadi bup ti benama Pengabang Ari Panggau Libau; lalu deka befokus ba senentang pengidup pendiau bansa Dayak di Kalimantan enggau Iban Sarawak tauka bansa Dayak ti bukai di Sarawak. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau giga aku ba lumur WhatsApp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai (misteri) di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizin Iya” aku deka datai ba endur kita nya.
Oleh HARRY USUP UMBAR