![](https://utusansarawak.com.my/wp-content/uploads/2022/07/image-58-1024x639.png)
Tusun Ke-22
NITIHKA pansik teori Infraed (IR) Light for Ghost Hunting, Sains Fizik (Theoretical Physicist – Albert Einstein & Sains Spiritual), ujan nyala endang tanda Antu Bunsu Petara tauka Antu amat-amat bisi datai; laban sida nya roh @ tauka disebut Eletromagnetic Energy – Negative Energy, semina ulih diau ba utai ti chelap, enda angat tauka mambam. Engergi Negatif @ Antu, roh jai enda ulih diau ba endur ti angat. Kelimpaha ari nya, sida tu mega rindu diau ba endur ti petang sereta sunyi. Nya mega kebuah, Antu endang selalu ngayanka diri maya malam hari laban maya nya dunya chelap. Antu @ energi negatif enda ulih dibunuh (dimusnah @ destroyed), tang ulih bebali (transformed).
ANTU MAYAU SBENGKAH BANSA ANTU
Taja suah dikeduan antu, tang nadai ga tudah Billy tu kala kena sebarang penusah ti berat. Engka amat munyi ku apai iya Lidom, antu sigi deka ngachau sereta nguji kitai, enti kita nyakap iya. Iya sigi suah ninga bunyi antu. Iya mega suah dikeduan antu.
Dalam kandang taun 1991 suba, Billy baru udah seminggu gawa ba Shiping Dock Yard seberai Hospital Lau King Howe suba. Udah pulai ari kereja pukul 4.30 lemai, iya pan mandi ba tanju. Ba tanju nya bisi ai paip, sigi endur orang mandi. Benung iya mandi, iya tedingka bunyi nyawa orang betelekik ketawa, kekadang munyi nyawa anak mit, kekadang munyi nyawa orang indu ga tunga ke babas enggau madang getah. Enda jauh ari iya ke mandi nya, kira-kira sepemeda mih. Sepenikau enggau batu mih.
“Bah…! Nama sida nya nengkilaka aku mandi? Jai amat ulah mensia nya nengkilaka orang mandi! ” ku iya bejaku kediri.
Iya endang nyangka orang bukai bisi meratika iya ti mandi. Munyi ke jauh, kekadang munyi ke semak ga munyi utai nya. Ama nya munyi ke ketawa, ama nya bekedumu, munyi ke berandau enda temu leka jaku. Kelama-lama nyau lain asai ati iya. Asai ke nyeregu bulu pegu. Apuu, nyelai amat utai tu! Kada enda antu? Pia ku iya bejaku kediri. Udah nya lalu, iya pan besampi.
“Enti kita nya antu badas, tulung pandung mih aku tu. Aku tu merinsa. Kereja nadai tentu menuku, enda tentu bulih duit. Tang, enti kita nya antu jai, rari kita nya. Anang ngachau aku. Aku tu mandi. Nadai kebuah kita nya nengkilaka aku tu mandi,” ku Billy.
Udah tembu mandi, iya pan beradu deka ngelayang ke seberai ngena feri ti bepengkalan ba tisi Hospital Lau King Howe, Sibu. Udah meli lauk, iya pan pulai ke seberai nepan feri nya baru urung pukul 5.30 lemai nya. Tambang feri maya nya semina 20 sen setrip ngelayang ke seberai. Feri mit nya semina ulih mai motosikal, basikal enggau tubuh mensia aja.
Datai iya ba rumah ti endur iya diau ba Dock Yard nya, ninga orang bepadah ngasuh ngulu sida ti bedaraka tinso 138, ti baru dibeli sida lemai nya. Datai dia, berengkah mih pengawa sida ti bedara nya, lalu makai ngirup mih sida dia.
Urung pukul 9.00 malam, iya pan pulai ari endur orang ke bedara tadi. Iya pan nutup pintu lalu gali besedia deka tinduk. Benung iya baru deka lelap, peda iya pintu bilik iya nya nyau sedandang tebuka baka ke ditumpu orang. Peda iya tama utai baka mayau, sabit-sabit bulu rekung lalu nyekak rekung iya. Nyau kasa-kasak tudah Billy ba tisi anak iya ti gali ba pendinduk sida menyanak nya. Asai ke deka luput, dichekak utai nya.
“Bah, nama utai tu, dih?” ku iya bejakau dalam ati. Iya pan nyau lemi tulang asai. Buka iya chekak nya, enda ga ulih buka. Utai nya endang baka jelu mayau, mesai mayau mega. Balat amat chekak iya. Umbas tat asai. Nyau kelama-lama, puas iya ti engkuda baru chekak utai nya ngelepaska diri. Iya pan tinduk. Maya tinduk nya iya pan bemimpi digagai antu. Empat iku antu ngagai iya nengah tanah, nengah emperan, nengah sungai.
Pagi hari seiti Billy bisi berasai tabin, batuk-batuk lalu mutahka darah. Iya pan nganjung diri ke klinik hospital, lalu masuk ward. Maya ti diperesa doktor, nadai ga iya ditemu tabin raya, tibi tauka utai bukai. Semina rekung iya ti agi pedis udah ti dichekak jelu mayau nya. Berengkah ari nya iya pan berasai enda tentu pengerai, kena penyakit asma datai ke sehari tu. Nya mih utai ti nyelai amat nyadi ba iya.
RANTAI ANAK LIDOM DITANYA ANTU
Cherita tu nyadi kena 18 Oktober 2010. Maya nya Rantai Anak Lidom bejalai begigaka jelu sebelah babas. Nginau sereta nyuluh mih ku jaku. Angkat ari langkau ti endur iya bemalam ba Ulu Seteras, lalu ngulu Sungai Rantau Panjai. Datai din urung pukul 6.30 lemai, sara ke nganti hari ke malam, iya pan duduk ba tebing ai. Enda lama udah nya, ninga bunyi utai kisik-kisik. Sangka iya burung ensing ti udah ditangkap iya dalam uyut ti dima iya. Nyau kelama-lama lain-lain ga bunyi utai nya.
“Dut dut dut dut…..!”
“Kada enda rusa nya? Lagi sepi asai dek!,” ku iya bejaku kediri.
Dianti iya pansut, nadai ga utai nya pansut ari babas. Endur tunga utai ke memunyi nya, tembawai langkau sida Jangga, ba ulu Sungai Rantau Panjai. Puas ke ninga utai ti nyelai munyi nya iya pan besampi kediri.
“Nya aya Jangga, Akam, enti dek nya nyadi antu, meri aku ubat dek. Sial amat aku tu nimbak. Jarang amat bulih utai,” ku Rantai.
Udah nya, engka ninga sampi iya, utai nya pan ngetu memunyi. Iya pan bejalai nyuluh ke ili, semalam-malam nya. Urung pukul 10.00 malam, iya pan datai ba sebuah tembawai. Nya tembawai lama orang, tembawai sida indai Mulok. Datai dia, iya pan bejalai lubah-lubah nengah emperan menua nya. Ninga utai nya memunyi baru.
“Dut dut dut dut….!”. Munyi-munyi rusa.
“Nya iya, engka amat rusa nya,” ku iya bejaku kediri lalu sedia deka nimbak. Anti pansut, enda ga utai nya pansut ari babas. Iya pan majakka pejalai diri. Enda lama udah nya, tak nyerauh munyi utai ngangau. Munyi ke nyebut nama iya.
“Kini dek Hantai (Rantai)!” ku sada kangau orang nya.
“Apuuu, nama antu tu ngangauka aku. Endai, nama nya munyi nyawa Indai Jerine. Enda patut ga nya iya. Tentu nya antu! Kini antu indu nya tau nitihka aku kitu? Nama antu nya munyi nyawa orang indu?” ku Rantai mutap kediri.
Udah nya iya pan majakka pejalai diri lalu bediri ba jul batu, agi deka ninga sereta beratika munyi kangau orang nya. Ninga ngangau baru ga, munyi nya tadi. Tang iya enda nyaut, laban iya endang nemu nya ukai bini iya ti ngangau nya. Udah nya, nyau enda liat ga ati tudah Rantai tu tadi, lalu disepu iya mimit penemu gayung antu ti dikemisi iya. Jera antu nya, nadai kebuah iya deka ngachau aku, ku iya bejaku dalam ati. Enda lama udah nya, dinga iya nyau munyi guni ke tepangka ba bandir, munyi orang ke rari tunga ke atas datai ba Pulau Suda ba menua nya. Engka alah bulu antu nya kena penemu iya. Ku iya, engka antu nya sigi antu ti buyan. Deka nguji ngachau, ngerau orang, tang engka iya enda ngelala orang nya. Engka sangka iya mensia sebarang Rantai Anak Lidom nya!
Pagi nya iya agi ingatka ulah iya enggau antu nya. Getah ke ditangkal iya pagi nya, enda diambi. Engka antu nya ngipa deka bebalas, ku pikir iya. Iya mai Janggu nguluka iya ngambi getah nya. Hari nya mega semua sida ke diau tiga buah langkau ti begenturung ba ulu Sungai Seteras nya, bisi tesiumka bau utai, bau tunu babi. Seiku nyangka seiku ga bisi bulih babi. Tang ke bendar, nadi seiku sida ba tiga buah langkau nya bulih lalu nunu babi. Rantai empu ti bisi ulah enggau antu malam nya pan enda nemu nama kebuah utai ba kandang menua nya bau tunu babi?
Seminggu udah nya, iya pan geli-geli bejalai ke ulu kin baru. Enda nyamai endar dikanggauka antu munyi nya, ku iya. Iya agi nangi-nangi, engka antu nya deka bebalas, nyepi diri udah pedis. Taja pia, nyau udah seminggu enda ga iya nangi agi ke menua nya. Enggai nyadi enda kia ga, laban sigi menua diri, kebun iya empu. Nyentuk ka hari tu, nadai ga utai agi didinga iya. Orang bukai pan nadai ga nusi diri kala digerau utai ba senentang menua nya, kebun getah iya nya.
(Cherita tu ditusi Billy Anak Lidom, Rantai Anak Lidom, Rumah ntai, Skim Puru Nanga Tada, Kanowit)
(Betampung ba Tusun Ke-23 minggu nyin ila)
Sekeda ari artikel dalam gempung cherita Nyelai Tang Amat (NTA) tu, udah kala dichelak nyadi bup ti benama Pengabang Ari Panggau Libau; lalu deka befokus ba senentang pengidup pendiau bansa Dayak di Kalimantan enggau Iban Sarawak tauka bansa Dayak ti bukai di Sarawak. Pechaya tauka enda, bepanggai ba pemacha empu. Engka bala pemacha bisi utai tanya tauka deka ngirum infomasyen enggau gambar ti releven ngagai aku tau ngiga aku ba lumur WhatsApp tu: 013 8325146 tauka SMS 0111 401 9115. Kelimpah ari nya, enti bala pemacha bisi tetemuka cherita tauka utai ti nyelai (misteri) di menua kita, pasal Antu tauka Bunsu Petara tauka pasal Tuhan God Almighty, tau mega call aku, puji Tuhan, enti “diizinNya” aku deka datai ba endur kita nya.
Oleh HARRY USUP UMBAR