![](https://utusansarawak.com.my/wp-content/uploads/2022/08/Caption-3-e1661302621909.png)
Tusun Ke-11
NYUNDANG PINANG
NYAU udah tiga hari Sedinang datai diau di menua sida di Tuchung Biau Balai, Ke Dedinggai Nadai Nenjang, di Batang Buluh Balau ke Belai Lega Langkang tak lalu nadai ga Sugi tama ke bilik. Dia Sedinang pan lalu berasai irau ke di atau kandang kerigai. Dia ati iya ke beraie enda nyamai. Tak nyau malu mih iya ke di lempedu kandang kamai. Dia dih iya tak nyau bisi ati deka pulai ngagai mengandai tangkai menimang. Iya pan lalu bejaku enggau Ibu Indai Rimbu enggau timpu dabung lantang.
“Au dih kau ibu. Nya alai aku tu ibu, bejaku udu kelalu changka, bisi bejaku jai ke enda betabi sereta nadai basa. Aku ibu, ku jaku aku ibu, betunang enggau Jenawang Bujang Mekang tang nadai ga iya diidang aku pinang pansut ke ruai. Ku jaku aku belakika Wat Bujang Sugi tang sehari pan iya nadai ga udah diseridi dibela aku makai. Tu mih aku ibu, ati enggi aku ibu, balat beraie datai ketiga lemai ngaum kemari. Nya alai ibu, aku diatu tak betati deka pulai,” kemah ku Sedinang bejaku enggau Ibu Indai Rimbu.
“Enti munyi nya, aku madah dih Endu, ngagai lantang aku Sugi. Dini pan nuan tau pulai kediri-diri nengali kampung puang?” ku jaku Indai Rimbu.
Iya pan lalu bejalai ngagai Sugi pansut ke ruai bejaku enggau Sugi.
“Au Dum, au gayu dih lantang anak iru aku. Nama pendiau nuan dih Dum tak mamau lain amai? Nuan dikangau kami enggai ga nuan ke merantau tama makai. Au dih Dum aku Sugi, kati ku nuan dih Dum tak enda nemu Sedinang deka pulai ngagai apai iya Sentukan Buban Pemalan Tiang Chandi baruh punggang rumah menchegi ke lanji-lanji baruh hari gentilang remang?” ku Ibu Indai Rimbu.
“Au, au indai. Apai seduai indai, ngambi, seduai ga mih nganjung iya pulai. Aku ga enggai enggau iya nemuai ke belundai nyurung mansang ke betandai nyundang pinang,” ku saut Sugi.
“Au dih Dum, kati ku nuan ngasuh iya kediri-diri seorang-orang nengali kampung puang?” ku indai iya.
“Kapa iya enda lesi nengali hari. Kapa iya enda tumbang nengkadah bintang,” kemah ku jaku Sugi.
Dia Indai Rimbu pan lalu nyabak pulai ke bilik dalam ruang. Sedinang bedau ga nganti pemulai iya ari ruai.
“Au Endu. Nadai mayuh jaku iya tadi, Endu. Kami dua aya nuan ngambi, kami dua ga nganjung nuan pulai, ku jaku iya,” ku Ibu Indai Rimbu.
“Enti munyi nya ibu, anang kita nganjung aku pulai. Kapa aku enda lesi nengali hari. Kapa aku enda tumbang nengali bintang,” ku Sedinang. Dia Sedinang pan lalu begari. Perengka enggi diri dibai semua abis magang. Engka gari iya nadai ditinggalka iya agi; dibai iya enggau kiri jari ngengkang.
Dia dih tudah Ibu Indai Rimbu lalu bejalai ngagai Wat Sekempat Punggang Pemanggai, Seragunting Nyaing Kechendai. Nya ga adi biak Endu Dara Semanjan.
“Au dih Dum, aku tu nadai panjai jaku. Ngasuh nuan nganjung Sedinang pulai ngagai menua iya di Panggau Ragai Ke Dedinggai Nadai Nenjang enggaika anak orang kediri-diri nengali kampung puang,” ku Ibu Indai Rimbu.
SUGI ENDA NGEMENDARKA WAT SEMPEKAT
Wat Sekempat pan nadai mayuh jaku lalu begari. Jam nya, malik dih Sugi besabung tentang.
“Au dih Sekempat Punggang Pemanggai. Kemaya nuan tu bebini ngambi Sedinang Dara Lengunai? Dini pan nuan tau nganjung iya ke nemuai nyundang pinang. Nuan ila tusah besai, ka disangka aku butang,” ku Sugi, Ke Berani Ati Agi Mit, Pedang Panjang Sintak Sandang Mali Salah Selit, Rekaya Sapit Laja Tau Tilit, Mayuh Gundit Seribu Rambang.
Sugi pan lalu ngangauka Endu Dara Sedinang lalu bejaku enggau timpu dabung jarang.
“Au dih Sedinang. Aku mih nguluka nuan ke nemuai nyundang pinang tang ga tua apin sehari tu Sedinang. Aku, lebuh aku tinduk di retuk papan simpung nyerumba linda sabung lindung malai ratai bunga belitung, dia aku tegepang Sedinang, di lempuang gagang chantung. Aku kena lantar pesilar ular tedung ke mantuk ngepung aku di punggung pun pinggang.
“Nya alai, aku Sedinang ke gali di linti papan ban, malai ratai bungai tanam panggal tekal lepisan, dia aku mejamka suluh mata kanan, dia aku bebali jai mimpi dih Sedinang ke mentuie tinduk malam. Mimpi asai ke bejalai nengah tatai melunggang emperan. Dia aku asai ke lantar pesilar tedung bulan. Rari aku ke tingkah tanah nyapan, tegah jugam jelu beruang. Nya alai pagila, baru tua ke nemuai nyundang pinang,” pia ku jaku Sugi tang Sedinang endang udah mupuk bejalai niti penyurai rumah panjang.
“Au dih kau Sugi wai. Ku nuan nya kerampu jelu jugam tang ga nuan agi ka ngundang gerunggang alang papan enggi Endu Semanjan di baruh lebungan perabung pinang. Bula dih nuan Sugi beampa puang, banggar nuan mambar bedilang,” ku Sedinang ke lalu majak bejalai. Orang sekayu rumah panjai pan nyau pansut ke ruai magang-magang.
“Au dih Sedinang wai, balat dih pengeru ati nuan Sedinang, nunda paku ke di leku tanjung bekumbang. Tak beati kering nuan Sedinang, nyelangking di untak tulang. Au mih Sedinang, bejalai mih tua sehari tu kau Sedinang tang nuan nganti aku,” kemah ku jaku Sugi.
SEDINANG ENDA PEDULIKA WAT SUGI
Sedinang tak enda nyaut lalu nadai malik ke belakang. Iya pan nurun tangga lalu mupuk bejalai belundai lubah nyingkang niti sentali jalai ulang. Dia Sugi pan lalu gawa makau rajut ke dibalut seluput danan ngerang, rat rusak baka ngeli anak remaung madung lubang. Iya gawa makau tanduk nyamuk tau ke tajuk bangkung panjang, gawa makau ngeli empelasi tak mua penyelai tujuh kali ngelung bekumbang. Iya makau tanduk punggung kesa mesai tekaran, makau atau tungau ke sepinggan bulan. Nya ga ubat berani Sugi laki Sedinang. Iya mega makau ubat kebal nyengkal di senggal ruang belakang, kebal penutup nangkup dadup dada ngeruang.
Udah badu iya makau rajut, iya lalu mupuk masukka gari nadai jai ke dibai chukup magang. Dia iya ngangauka Ibu Indai Rimbu ngasuh ngibun panggau iya ke begurau tuntun pinggang laban iya ke ka nemuai enggau Lengunai nyundang pinang.
Sugi nyau nangkin berangin isau lansau nampuk rian kijang, nangkin berangin pedang panjai bejabung balat gelegetang. Tak lalu san iya sumpitan sumpit tapang. Tangkin iya temilah saka limau mampang. Udah nya, iya lalu mupuk bejejalai niti sentali rumah panjai sehari tajai burung terebang. Nya baru turun iya tangga tampun numpu pun nangka lamun ke bebuah beketayun tuntun berang. Indik iya menalan nyapan masai tutuk telian ujan jarang. Nya alai iya lalu mansa keramba tuchum ngulum ketawa baka ke tau nanya enggau tempenga dabung jerantang. Iya niti sentali jalai ulang, nyidi jalai ai bandung keri tebu tengang, nyemerai tebing seberai lalu muntang tebing seberang. Bukit tait turun tiki, lembang pelakang lalu pelenggi. Sungai panjai sungai diulu sungai diili. Tak lalu nadai ga iya nemu Endu Sedinang.
Meda baka nya, nyau bejalai tegar mih Sugi kesempiar untak tulang. Bejalai laju mih iya ari peluru leka senapang. Nyau datai ga iya di Tuchung Menyaung Titi Andau, begamal puau-puau pintas senulau bulan mandang. Dia dih iya lalu ngetu nikal ngagai pendai masai alai mandi sekali besungga undang. Iya ngarau nyuaka labung enggau simpai sara luyang iya ngagai nembiak.
“Au dih Dum. Uji kita nganjung simpai enggau labung aku Dum, ngagai ibu kita Semanjan. Asuh taruh iya teguh, simpan di manduh benda bujang. Asuh kunchi iya di peti ke menanyi lung meranggang,” ku Sugi.
Lalu beguai-guai ga sida nembiak papak perenggang niki ke rumah lalu tama ngagai bilik Endu Semanjan sereta niki ke sadau. Datai di sadau, peda Semanjan tak benung nyabak sinu nguan timpu papan gerunggang munyi tuntung burung mendu ke nusu jemu rajang tetunggang. Iya tak nyabak kaung-kaung munyi burung tebali lelang.
“Au dih ibu. Tu mih labung aya kami Sugi laki Sedinang, asuh iya taruh teteguh di manduh benda bujang, asuh iya kunchi nuan di peti ke menanyi lung meranggang,” ku nembiak papak perenggang.
Lalu beguai-guai Semanjan ngambi ngepan nya ari nembiak. Ambi iya labung Sugi, penyadika iya api mau rerendang lalu ditunu iya ke nyeregu angus ngarang. Tak lalu ambi iya simpai enggi Sugi, telentangka iya lesung kayu purang lalu ditutuk iya redak nadai berampang.
Pulai ga nembiak ke seberai tanah seberang lalu bejaku enggau Sugi ke bedau nganti nembiak ke pulai.
“Au aya. Simpai nuan tadi aya ditutuk Semanjan nadai berampang. Labung nuan ditunu iya ke nyeregu angus ngarang,” ku nembiak papak perenggang.
Dia Sugi tak enda nyaut tang lalu mupuk bejalai nitihka Sedinang. Nya alai nyau sepagi-pagi, sehari-hari ke terunji bekalih terang, iya seruran nyidi bekau kaki Endu Sedinang.
“Banggar mih Sedinang tu mambar bedilang. Bebegah mih Sedinang tu minta puji ke begela banggar mati,” kemah ku putap Sugi. Iya tak lalu enda tetitihka Endu Sedinang.