![](https://utusansarawak.com.my/wp-content/uploads/2022/08/Caption-1.png)
Tusun Ke-9
NANYA ENDU SEDINANG
NYA alai jaku sida iya bedau putus laban apin nanya Endu Sedinang. Nya alai tak lalu angkat Indai Bangau Mantai lalu niki ke sadau Endu Sedinang Dara Bagau, diau di panggau biau ribut kemarau maya nebang. Iya niki ke berangin tinggi ke kediri-diri nadai nenjang. Dia iya meda Sedinang duduk degi-degi petangan ujung jari iya benung negika menyeti bali tengkebang. Iya duduk dugau-dugau, ujung tunjuk indu iya nyelaku punggang kumbu muau ke bebuah ngambi likau nabau melelenang. Iya benung nyulam enggau jadam benang gudang, benung gawa nyubak enggau bulu landak sesetak tengelang labang.
Meda Indai Bangau Mantai, Sedinang lalu ngetu gawa. Dia seduai lalu berimbai kerigai rusuk marang.
“Au dih aka, nama dih chap surat kirum raja? Nama dih abar putar berita? Nama kebuah nuan kitu, nama kereja?” ku Sedinang.
“Au adi. Aku datai ditu nadai panjai jaku. Nya alai lemai kemari Ibu Indai Rimbu seduai Aya Apai Rimbu bisi datai ari menua sida iya di Tuchung Biau Balai, Ke Dedinggai nadai nenjang, di Batang Buluh Balau ke Belai Lega Langkang. Seduai iya udah ditanya sida apai pejalai. Seduai iya ke nemuai ngagai penyarai rumah lantang kitai, seduai iya minta bini; nanya nuan ke bini Sugi enggau iya serasi betambak singkang,” ku Indai Bangau Mantai.
“Au mih kau aka. Enda mih aku aka. Enda aku muai jaku sida apai, enti sida iya ngasuh, aku nguai ngagai menua orang,” kemah ku jaku Endu Sedinang nyaut enggau tekup dabung jarang.
“Enti nuan deka adi, nuan deka dibai sida iya pulai ke bejalai nyurung mansang enti hari udah tawas teringkas siang,” ku Indai Bangau Mantai.
“Barang iya mih, anang ga Sugi ngayahka aku beduan ngayahka orang. Enti iya ka nupi aku, ba pengawa jai sama enggau lantang, aku ka,” pia ku Endu Sedinang.
ENDU SEDINANG SETUJU
Nya mih naka jaku Indai Bangau Mantai. Iya lalu pulai ke bilik pansut ke ruai. Nya alai iya madahka Sedinang nadai jaku. Dia orang mayuh lalu betempap jari magang-magang. Orang tak nying begau munyi ke mulau bala nyerang. Sida sama ketawa gaga di sekayu peretang rumah raya, ninga jaku nyau sama balat besenentang.
Nya alai hari pan nyau lama malam udah kelam sabung petang. Orang mayuh nyau pulai ngagai bilik diri empu dalam ngeruang. Sida Aya Apai Rimbu pan lalu nindukka diri kelemumuk ngedang belakang. Tak enda berasai dih alai hari tawas teringkas siang. Tak lalu niki Indai Bangau Mantai ngagai Endu Dara Sedinang ngasuh iya begari sereta besikap serangkap genap chukup magang; ngasuh iya ngaduka perengka diri ke dara chukup semua nadai ketimpang.
Nya alai Sedinang pan lalu begari masukka beringin kain keberaya ke bebuah manah gaya penarah jera tupai kendawang. Iya masukka kain teruba iya ngebat ke nyingkat nanchang jempulang. Nya kain teruba iya gawa mangku tangga ridan pengerang, anak kain kumbu Brunei enggi Sedinang Dara Pandai, peda bebuah manah amai, bekaki tau bejalai, bejari landik megai, benyawa pandai ngumbai, ngangauka mengandai tangkai menimang. Tempap Sedinang serungap rawai dagang lalu pelingka iya sengkiling ringgit wang. Udah nya, araka iya tumpa penanggam tapa jari ngengkang sambil lengan kanan iya tanggam ripan gelang gudang. Dilepika iya sekali sanggul lintang lalu lepi sekali sanggul gantung baka tangkung burung kenyalang. Peda sanggul silai Sedinang tak baka pemansai laka disingkang. Entakka iya tisir pirak bekegetak baka gerejak tiang empang. Bedimbu Sedinang ngelalaika tusu ngelampu kembang lalu beselampai Sedinang Dara Lengunai enggau menyeti bali belulai, manah urai pantak kechendai tabur mau magang. Udah nya, aduka Sedinang mua tampak enggi iya baka pandang senayak bulan mansang. Idung manchung enggi iya baka puchung ke tebantun tensang. Nyau aduka iya kuyu gemu baka telu manuk indu kepayang mekang.
ENDU SEDINANG NITIHKA PEMULAI ENTUA
Nya mih naka kelulu gaya perengka Endu Sedinang ke genap nadai penimpang. Endu Dara Sedinang pan pulai nyereta Ibu enggau Aya Apai Rimbu. Nya baru tak suma ga iya nyingkangka bulang ujung kudung, iya ngejangka gerunggang papan guntung di baruh penjuang tulang perabung, baruh kurung rumah nyementang. Suma keledanja nyingkang Sedinang Dara Pandai bejalai ngejangka meligai panggau besai iya ke dedinggai nadai nenjang.
Tunjan iya tangga papan numpu sengkan guchi beluyang. Indik iya bilik baik baka tasik ngumbang Rajang, bilik besai baka Brunei ke seberai Nanga Limbang. Dia Ibu Indai Rimbu pan lalu malik enggau jebulik mata nentang. Dia Ibu Indai Rimbu nyau enda nyamai diau baka kena pulau bala nyerang. Iya tak nyau peluh ngum baka ke mangkang unggun pandang bedilang. Iya tak nyau kasak-kasak baka pekaban ikan juak mabuk anak tubai tengang. Iya tak nyau getar-getar baka ngunggar ampuh pasang meda pemajik Endu Dara Sedinang ke tak nadai endur mantah, nadai endur mejah. Tak naka pemajik mensia mansang. Dia Sedinang pan lalu duduk enggau Ibu Indai Rimbu besaruk denjang seringgang, duduk berimbai enggau mentua iya empu di kerigai rusuk marang.
Sida tiga pan nyau beati deka bejalai belundai nyurung mansang, tak nyau tebuka bedaru pintu bandir tapang. Indik sida tempuan nyapan baka sampan ban dagang lalu niti sentali rumah panjang ke nyau datai ba ruai sida Bujang Paku Lawang, Pemantang Chapin Timbau, Pat Bulat Pengeruang Tukau. Dia sida meda iya gali lading-lading baka tinting maring muang. Iya ke tinduk nyadai di panggau tengah ruai, kereban mikai udai lama ditebang. Dia iya tak lalu ngebakka bungkur iya enggau selanggur bali tengkebang lalu bejaku iya munyi tu enggau Endu Dara Sedinang.
BUJANG PAKU LAWANG NANYA ENDU SEDINANG
“Oh kini nuan Sedinang, perengka nuan enda jena baka, baka ke maya mansang ngabang? Kini penemuai nuan Sedinang belundai nyurung mansang?
“Au dih Sedinang wai, enti nuan beambai, dih Sedinang, anang ga nuan lama ninggalka rumah panjai balat jementang. Enti nuan belakika Bujang Sugi, sepi asai nuan Sedinang. Nya orang ke endang berani mutus garang,” kemah ku Bujang Paku Lawang.
Dia Sedinang tak enda nyaut enggau mulut dabung jerantang, tak enda malik nikal ke belakang. Sida tiga tak mupuk bejalai betunda-udi sama nyingkang. Nya alai datai sida di pala tangga nurun ke tanah menalan manah enggi sida alai matahka rakah sabang seluang. Kejang sida ari nya, sida niti sentali jalai ulang lalu datai di pendai masai alai mandi sekali besungga undang. Sida nyemerai tebing seberai nyemerang tebing seberang lalu terus nengah kampung baung nadai dinga ensung nyumbuh bujang, kampung sunyi nadai dinga buie buau orang. Bukit tait turun tiki, sungai diulu sungai diili. Nya alai bejalai sida sepagi-pagi nyerumba matahari ke gemeri tampak terang, panas ke belebas mandang lumpang. Dia sida tiga tak sama ikak lelak tulang. Aya Apai Rimbu tak lalu mai ngetu tengeju lama lengang. Pantap iya engkubung ambi ke pelasar, pantap iya menua ambi ke panggal.
Dia sida lalu ngetu tengeju lelak tulang. Dia Aya Apai Rimbu nyau sinu di leku kandang dada lebuh nentang menantu iya, Endu Sedinang Dara Melisa ke tak nyau lelak ikak gaya laban iya ke enda kala bejalai di menua kampung puang. Dia tak sinu di leku kandang kamai Aya Apai Rimbu, Raja Besai, meda Sedinang Dara Pandai, tak lelak ikak bejalai ke belundai nyurung mansang. Dia tak lalu muchau Aya Apai Rimbu munyi Melanau nimbau bangkung, nyau bejaku munyi Sebaru tunsang ujung lalu besangin munyi Beketan Palin ngulihka lilin madu ranggung. Aya Apai Rimbu lalu nyampi munyi Menani manang Chelung laban iya, enti jalai panjai iya tau ngasuh nya pandak, enti menua jauh iya tau ngasuh nya semak.
NYAMBUT PENATAI ENDU SEDINANG
Kejangka sida tiga ari nya, manggai di Bukit Nimung Engkabung Burung Lelayang Rangkang, di Tuchung Biru Nakung Ke Labuh Begempung Ninggalka Idang. Nya ga bukit seberai pendai sida Apai Rimbu, masai alai mandi sekali besungga undang. Nya pendai tengah sida Apai Rimbu, udah dipanjah enggau rajah minyak pemandang. Datai sida di pendai, sida lalu mandi bepari isi bebuai peluh langkang. Tembu mandi, sida pan lalu begari, masukka perengka enda jena baka, baka maya nurun ngabang. Udah masukka gari manah ke deduah puji orang, Aya Apai Rimbu dulu lalu Sedinang tengah. Tak bejalai lubah sida baka nipah ke rebah puak laut. Tak suma nyingkang nyurung pejalai Sedinang Dara Lempung baka nibung ke berayung puputka ribut. Tak bejalai ringang-ringang Endu Dara Sedinang baka pasang besegang mudik anyut.
Nya alai udah datai di menalan sida lalu niki ke rumah. Dinga gu-gu orang sekayu punggang peretang rumah merundu munyi empangu ngambat kalu bulan mansang. Dinga tak rami richah rimai orang sekayu punggang rumah panjai munyi ke begawai ngidang pengabang. Sida begau laban meda Sedinang baru datai belundai nyurung mansang. Dia dinding ke nyau beseling abis dipekerumbak. Pintu abis tekebu lalu tesilak. Sida ke kait nyau pandai bejalai bekejengkak. Sida ke buta lalu menchelak. Pia mega, sida ke ngandung lalu beranak.
Maya nya, tudah Semanjan tak bedau nyabak di awak selangka dada diau di panggau ke begurau tuntun mata, di berangin tinggi enggi iya kediri-diri remba-remba, masai baruh kurung perabung rumah raya, enggi sida iya enda jena baka, baka ke nyentuk di singka niga lantang. Orang mayuh pan begau magang-magang. Dia bala sida ke bujang nyau bekesetak mengkelak. Sida bujang biak nyau mandam geladak papan simbang.
“Naka mih pemajik bini Sugi Endu Sedinang,” kemah ku jaku bujang mayuh.
Oleh JANTAN UMBAT