![](https://utusansarawak.com.my/wp-content/uploads/2022/07/image-45-1024x800.png)
Tusun Ke-5
ANAK TEMUAI MADAHKA PENATAI DIRI
DIA Anak Temuai lalu ketawa tuchum, ninga jaku Apai Menaul Gundai, mua penyiru manah leka. Nya alai bejaku udu Apai Menaul Gundai ke selebubu rindu didinga.
“Nya alai au kau aya wai, endang ke gaya kitai kau aya. Enti orang datai kitai nanyaka menua. Enti kitai bejaku aya, kitai bejaku ngelulu nanyaka dama. Au kau aya, ka aku madah enggau dilah sera nyawa, tang aku malu di lempedu kandang dada. Jai mih nama menua aku, aya. Aku tu lelang midang nunda kengkang ukui kaka. Aku tu ga ngampar jauh menua,” ku Anak Temuai.
“Dini pan nuan tau munyi nya dih Dum, gayu aku. Uji padah manah-manah enggau dilah dabung seleka,” ku Apai Menaul Gundai.
“Au mih kau aya. Menua aku aya di Batu Tangkal Chuyu, Ke Manah Adu Belagu Dabung Manyang, Kepit Bukit Labit Madu Ke Selebubu Ninggalka Idang,Tampung Menyaung Tuchung Ribut Nyepu, Begundang-galu Ngebuka Bangkai Laya Midang, di Tuchung Embawang Ngandung Sigi Rengung-rengung Munyi Ketebung Ngena Tempap, Keretachat Pangkung Gendang, Baruh Geraga Kuta Pangkat Indah Enda Baka Jenawang Bujang Sigat, Bejari Jampat Nyintak Jelap Mata Pedang, Ayung Lindung Petang Lindap Serangkap Ambun Midang. Nya mih nama menua aku aya,” ku jaku Anak Temuai.
“Au dih kau Dum wai. Naka mih pemanah nama menua nuan Dum. Naka ga pemanah menua kita gayu nundaka gamal nuan ke datai di menua kami. Nuan lantang tau mih tua tu Dum baka sukung banding tiang, baka gandar mata berayang.Tau mih nuan nyukung aya kami Apai Rimbu Pemadu Dama Mansang. Tau mih nuan tu nganti aya nuan Apai Rimbu nunda titi andau penyemerang. Tau nuan tu nampung megai perabung rumah nyementang,” ku jaku Apai Menaul Gundai.
“Dini pan aku tu tau aya, ke tuai kita di penyurai rumah panjang. Aku tu ke beli lansang kedubang, orang kampar jauh menua nadai temu orang,” ku Anak Temuai nyaut enggau singkut mulut dabung jarang.
“Anang ga nuan munyi nya Dum. Nya alai enda dipatahka nuan Dum, pan layu. Enda dipadah nuan Dum, aku tau. Aku bejaku changka didinga tang ka aku enda nanya laban iya endang adat basa,” ku jaku Apai Menaul Gundai.
Nya naka jaku sida enggau Anak Temuai ke berandau semalam-malam sejeman petang kelita. Sida bejaku sebarang tau di kuyu dabung rata. Nya alai hari pan nyau enda berasai, dinga tak rangau-rangau empeliau ngua ngandau di pulau rapi pengerang.Tak rerauk kukuk selanjau manuk jaguk mengkukuk ngenjun gelanggang. Dinga babi ke bemunyi nyungkur dulang. Hari nyau tawas teringkas siang. Peda tak bedau duduk entap Anak Temuai baka Datu Patinggi Bandar Saat macha kitab surat sembiang. Tak bedau duduk mih iya besila baka Raja China ke ngitung rega macham barang. Orang ke bejalai, pan nyau pulai magang-magang.
Nya baru Anak Temuai pan lalu diau ba ruai sida Aya Apai Rimbu begulai saum serawang. Tak nyau entap mih Anak Temuai di peretang rumah memekap enggi sida Ibu Indai Rimbu, nyau baka ke pangkat anak lantang.
SEMANJAN DARA PANDAI
Nya alai udah lama ga Anak Temuai ke diau dia nengali la bulan terang. Nya alai hari siti tak nyau nyelai jerita sida Jementa Dara Jekang. Bejaku dih Endu Lit Pinang Tembawai, Entemut Gegiut Tisau Jalai. Bejaku dih iya enggau selantang ke reringang anak andai, Semanjan Dara Pandai.
“Au dih lantang anak andai. Uji nuan nyembui sehari tu ka Endu. Peda nuan nadai beras kitai dih kau Endu, tak nyau ngerepas di burit benda langkang. Lama ga tua udah enda nyembui makai padi ngauk di tibang,” ku Endu Lit Pinang Tembawai.
“Au mih kau indai,” ku saut Semanjan.
Nurun Semanjan ari sadau gantung sapat umbung baruh kurung perabung pinang, tak berangin tinggi iya ke kediri-diri nadai nenjang.
“Anang mega nuan baka nya kau lantang. Perengka enggi nuan Endu tak kena semua magang-magang. Kena pekayan enggi nuan Endu ke seruran nadai timpang. Jayau kena jingkau Endu ngasuh ati sida Jelali Bujang Tatau merampau diau di panggau tuntun pinggang. Nya alai, ubat kena nuan kau Endu, serangkap genap raban pemandang,” kemah ku jaku mengandai tangkai menimang.
Nya baru Semanjan pan lalu beraduka gamal diri empu ke ngelagu umba bujang. Iya ngadu gamal diri manah ke deduah puji orang. Nya alai tak lalu nurun iya ari sadau imun enggi iya, baruh talun rumah panjang. Tak lalu nurun tangga baik numpu bilik dalam begelemang. Tunjan iya tangga papan numpu sengkan guchi beluyang. Nya alai bejalai iya nuju pintu ke belagu gaga tukang. Silakka Semanjan pintu tasak sigi kiak-kiak munyi anak munsang betimang. Udah nya, pansut Semanjan ke pugu tanju masai alai orang ngalu jugu Lang beparang. Dia iya tak lalu malik besabung tentang enggau Anak Temuai ke duduk ba panggau ragai ke dedinggai nadai nenjang, berangin tinggi iya ke kediri-diri seorang-orang.
“Au dih mengandai tangkai menimang, uji nuan ngenggam umpan enggi selanjau manuk jelayan, iku ke bauh begeran sematung tapang. Uji anjungka nuan umpan selanjau manuk pungka laki enggi aku indai, ke bebulu lis mati, ukai enda tanchang gelagi taji jungkang ke begamal manah mati baka ke bediri ngembing tunang,” ku Anak Temuai bejaku enggau mengandai tangkai menimang iya.
Nya alai pansut ga Ibu Indai Rimbu mai padi genggam meranggang, mai beras ulih ngerepas di benung tajau bujang. Sua iya ngagai Anak Temuai.
“Ukai ga tu dih indai pemakai manuk tawai enggi aku indai ke belanggai tugang labang,” ku Anak Temuai.
“Apa pemakai manuk nuan dih Dum?” ku Ibu Indai Rimbu nanya enggau timpu dabung jarang.
Benung Ibu Indai Rimbu bejaku enggau Anak Temuai, dia Semanjan malik ke setak, malik ke setak. Nadai ga iya meda seliuk manuk labang. Tak beati malu mih Semanjan di lempedu kandang lempuang. Tak bemua mirah baka darah kijang digayang. Iya lalu pulai ke bilik enda lalu nyembui.
“Naka ga nuan dih kau indai, tak ngemaluka aku indai, di lempedu kandang lempuang. Enti aku nemu temuai bisi datai ba ruai Aya Apai Rimbu, dini dih aku deka diasuh nuan nyembui padi di entali tibang pengindang. Aku enggai dikumbai orang indu jegit kelalu jekang. Enti temuai datai aku indai, enggaika dikumbai orang nukangka lawang,” kemah ku jaku Semanjan tang indai iya tak tuchum malik ke bukai.
SEMANJAN DIASUH BETEMU ENGGAU ANAK TEMUAI
Tak ketawa belalai Endu Lit Pinang Tembawai. Iya ke bendar, iya ngasuh Semanjan pansut ke ruai awakka meda Anak Temuai ke baru datai di penyurai rumah panjang, ngambika temuai tak telengga lama lina meda Semanjan ke dara ke reremba benung orang.
Dia hari tak nyau lama terunji bekalih tumbang. Malam pan nyau kelam sabung petang. Sida Jenawang Bujang Tuyu pan bisi bejaku di kuyu pun rang. Iya ngangauka sida menginau tangkai menimang Ibu Indai Rimbu.
“Au wai indai, uji pansut ga nuan ke ruai. Aku ka bejaku amai enggau nuan indai di sambai pun rang. Aku madahka diri deka ngamba baruh punggang lada enggi kitai ditu, nyangka bisi kerampu jelu rusa betanduk ngena ringang bepampang. Aku ka manjuk dih indai di peretang rumah nerenjuk enggi kitai ditu, nyangka bisi bulih imbuk ke bebuk nansang ke belakang. Aku ka ngabas kupan Dara Ganggam diau di lunggang alang diban ke dibalai ratan bunga sinang. Aku ka ngabas peninduk sida Teruna Dara Gauk ke di retuk papan pantang,” kemah ku jaku Anak Temuai.
Dia dih Ibu Indai Rimbu lalu ketawa nelengaka rasa dabung jarang.
“Aku enda nemu bejaku dih lantang, enda nemu nagang tang nuan anang enda manah-manah dih Dum bungah enggau orang,” ku Ibu Indai Rimbu.
“Au dih indai,” ku saut Anak Temuai ke tak lalu bekemaska gaya diri empu ke ngelagu umba bujang. Iya tak lalu berati mupuk bejalai ngejangka gerunggang alang pengalai enggi iya balai tikai pandan bekuang. Iya lalu bejalai gadai-gadai niti penyurai rumah panjang. Peda apai orang nadai agi reringang mangkang bedilang. Api orang abis nadai agi menyadi beseri mau rerendang. Iya tak nepatka panggau Sekempat Punggang Pemanggai, Seragunting Nyaing Kechendai, adi biak Dara Semanjan Ke Begeman Dabung Ujung.
MINTA ULU SEKEMPAT PUNGGANG PEMANGGAI
“Dani mih nuan dulu unggal, dani, nuan ke gali galai mun hari sabung petang. Enti nuan dani, duduk nuan unggal. Duduk enggau aku besaruk nenjang seringgang,” ku Anak Temuai.
Tak lalu angkat tudah Bujang Sekempat Punggang Pemanggai, Seragunting Nyaing Kechendai. Tak tekenyit balas seledadang.
“Au, unggal. Nama dih unggal berita nuan ngagai aku?” pia ku jaku Sekempat Punggang Pemanggai.
“Au ga kau unggal. Lama mih aku udah datai di menua kita, apin ga aku tapuska penyurai rumah panjang. Tu aku ka madahka diri bisi kebuah. Ka aku madah nadai, tak enda nyamai balat kempang. Aku ka minta uluka nuan bejalai; bejalai bujang,” pia ku jaku Anak Temuai.
“Nama dih penyalah nya unggal, endang baka kitai orang. Kitai ga baru datai, dini kitai nemu peninduk sida teruna Dara Gauk ke di retuk papan simbang. Dini kitai nemu nuju pintu laban kitai apin nemu ke lempedu kandang lempuang. Enti nuan minta uluka aku nama kebuah aku enggai. Ni dih tuju nuan bejalai?” ku Sekempat Punggang Pemanggai. Nemu ga tudah Bujang Sekempat Punggang Pemanggai nyaut jaku Anak Temuai.
“Au dih kau unggal. Aku tu baka ke tak udu kelalu enda bebasa. Tak keru aku tu bejaku enda manah didinga. Nya alai aku tu unggal ka ngayap ngagai menyadi nuan Semanjan, nya orang ke Begeman Dabung Ujung, begantung bekelepung jauh berita. Ka nganyap indu Dara Bajik ke Begilik Panggal Lampung di kibung indu dara,” ku Anak Temuai.
Tak enda bemunyi tudah Sekempat Punggang Pemanggai. Nyau kelama baru iya tepansutka jaku.
“Barang ku nuan unggal, enti nuan ka ke menyadi aku ke beli lansang kedubang, ke lap nimbun penyai orang, enti temuai datai nukangka lawang,” ku jaku Sekempat Punggang Pemanggai.
“Anang ga nuan munyi nya unggal. Aku tu unggal, endang tau meda di tapa dada jari. Endang tau nyelinting aku tu unggal ke juring ari puting mata geraji. Aku endang tau munuh ari ipuh ujung jenggi. Aku tu tau tilit di burit kendi aji. Aku enda dipatahka nuan, pan layu mih aku unggal, enda dipadahka nuan pan aku tau,” ku jaku Anak Temuai.
Nya alai seduai lalu bejalai sigi begadai-gadai tebelundai nyurung mansang nuju pintu ke belagu gaga tukang. Pegai Anak Temuai enggau chunggai tunjuk antu, sepi tak dugu-dugu asai batu galang melintang. Tak enda ulih babak dih pintu tasak tak lalu bemunyi kiak-kiak munyi anak munsang betimang.
“Au dih unggal wai. Ditambit sida indai pintu lantai kami tu enggau bilai bari sebelembang,” ku Sekempat Punggang Pemanggai.
“Uji nuan ngambi nyabur aku kin dulu unggal, ke di saka tanduk rusa beperiga ringang bepampang,” ku Anak Temuai.
Oleh JANTAN UMBAT