HANOI, 22 Mac -- Perdana Menteri Datuk Seri Ismail Sabri Yaakob ketika sidang media bersama wartawan Malaysia bagi memaklumkan hasil lawatan kerja beliau selama dua hari ke Vietnam di hotel penginapannya hari ini. Beliau berkata Malaysia mencadangkan pertukaran lawatan peringkat tertinggi sempena ulangtahun Jubli Emas ke-50 hubungan Malaysia-Vietnam pada 2023. --fotoBERNAMA (2022) HAK CIPTA TERPELIHARA
Tusun Ke-4
ANAK TEMUAI LEMAS MANDI
ANAK Temuai tak enda ngasika tagang sida nembiak. Tak lalu buka iya gari, iya pan lalu terejun ke ai. Terejun Anak Temuai naka patung, kelama naka punggung, keleju-leju naka rekung. Nyau kelama-lama datai di semunjung.
Nya naka Anak Temuai bejaku enggau nembiak. Anak Temuai pan lalu labuh ke di panggau Bunsu Yak Sepunchak Jala Benang, di panggau Endu Dara Ke Chenaga Umbang Pinang.
“Au dih kau ambai, wai. Lalu ambai, lalu. Oh, nuan tak ngeju angkat nyingkang”.
Dia Anak Temuai lalu duduk ngimbai pesinau atau sulu ambai enggi iya di kerigai rusuk marang. Tak lalu duduk nyerungkung Anak Temuai di panggau gantung baka remaung madung lubang.
“Au dih kau ambai. Kini ke penemuai nuan laki, ke dendam dalam ati? Kini ke nuan nemuai ambai ke dendam dalam bangkai?” ku jaku anak Bunsu Baya ke beukir dada muchuk rebung mang.
“Aku ka nemuai ngagai rumah sida aya Apai Rimbu, nya orang ke megai penyurai rumah merundu enggi orang Rampu Randau Tengang.”
“Enti nuan ka nemuai dih ambai, aku ka meri nuan pesinang rampang bungai, pesina lama perinyai ambai lalai. Nya ke ubat peransang nuan ambai tunang kena nuan nyerang ke Batang Ulu Merakai, ngerumpang anak penjuang kuta lantai pilan temiang. Uji telentangka petangan tunjuk dua nuan ambai, alai aku meri nuan perepat ubat seribu guna. Tu puchung penyangga nyawa kena nuan nyerang ke Batang Rajang ba simpang Ulu Belaga kena tinda nuan ngerumpang liba kuta penjuang”.
Nyau keleju-leju seduai iya bejaku betibang di kuyu pun rang, dilengkaka genteran berita Anak Temuai enda lama ngambi sesempa makai pinang awakka ngadingka berita bala nembiak ke bekejengkak papak perenggang.
Nya alai anak nembiak pan lalu pulai ke rumah lalu belanda ngagai ruai sida Ibu Indai Rimbu.
“Au dih kau ini, naka mih pengerugi kitai ini. Bisi temuai datai nuntung nyingkang, ke datai di menua kitai. Udu mih Anak Temuai nya tadi kau ini, ari pasu paras gantang. Bisa Anak Temuai nya tadi ini, ari tuba tubai benang,” kemah ku jaku nembiak.
“Dini dih alai iya Dum?” ku Ibu Indai Rimbu.
“Iya ga udah mati mandi di pendai ibu kami Semanjan,” pia ku jaku anak nembiak.
Dia tak lalu beguai-guai dih tudah Ibu Indai Rimbu belundai nyurung mansang, ngepit samit minching kajang. Tak lalu nurun iya nengah tangga sukun numpu pun nangka lamun ke bebuah beketayun tuntun berang. Lalu sidi iya jalai ai bandung keri tebu tengang. Dia Ibu Indai Rimbu lalu ngelumuka perengka Anak Temuai. Digempuru lalu dikajang iya. Dia iya lalu bediri degi-degi gedang-gedang.
“Naka mih penyayau dih kau Dum,” ku iya nganu bala nembiak.
Nya alai lekaka jaku pasal sida Ibu Indai Rimbu awakka ngadingka berita Anak Temuai.
PANSUT KE MENUA BARU
Udah Anak Temuai berandau enggau Endu Yak, iya lalu pansut ke menua. Dia iya lalu bepurus mua sereta merening Ibu Indai Rimbu, ke sedia mangkang kajang. Ibu Indai Rimbu malik besabung tentang. Peda iya Anak Temuai tak ketawa rising-rising ngayanka puting dabung jarang. Ketawa tuchum Anak Temuai baka ke ngulum gendum buah pinang. Dia iya tak lalu bejaku enggau Ibu iya Indai Rimbu.
“Naka ga penyiru nuan dih ibu, indai, ngajang anak perengka enggi aku, ke sedia baru datai enggau benai kajang sebidang”.
Dia Indai Rimbu tak enda nyaut seleka mukut. Enda nimbas seleka beras. Iya tak lalu peluh ngum asai ke kena pandang unggun mangkang bedilang. Tak nyau bejalai Ibu Indai Rimbu kejau-kejau baka orang ke kena pulau bala nyerang. Tak getar-getar iya baka ngunggar ampuh pasang. Nadai mih iya kala meda temuai ngeyigat nya. Tak nadai alai iya mantah. Nadai alai iya mejah. Tak naka penyigat mensia mansang.
“Nya alai udu mih Anak Temuai tu ari pasu paras gantang,” ku ati Ibu Indai Rimbu. Dia Ibu Indai Rimbu lalu bejaku.
“Begari nuan dih Dum. Begari nuan, gayu. Begari nuan, lantang, nitihka aku”.
Dia Anak Temuai tak lalu ngaduka gamal manah ke deduah puji dayang. Aduka iya gamal sigat kijap-kijap mandang ke atap jaung jerenang. Tak liau-liau Anak Temuai mandang ke kasau purang dibalang. Udah badu masukka pekayan, dia iya lalu ngaduka perengka enda jena baka, baka ke maya mansang ngabang. Dia iya lalu enggau Ibu Indai Rimbu niki ke rumah.
Dinga tak begau sekayu rumah panjai meda Anak Temuai datai. Nyau munyi ke begawai ngidangka pengabang. Dinga tak rami richah ragak sekayu peretang rumah gegayak begau; tuai enggau bala nembiak papak pererenggang. Dia Ibu Indai Rimbu dulu, Anak Temuai dudi, tak sekaki saum tambak singkang. Dia tangga ke ditiga tiki sekali, lalau ke dijingkau ram diremi.
“Nuan anang duduk, Dum. Nuan nitihka aku,” ku Ibu Indai Rimbu.
Dia dinding ke beseling abis dikerumbak. Pintu tekebu abis tesilak. Sida ke buta abis menchelak. Sida ke kait pandai bejalai bekejengkak. Dia belayan kaban dara orang sekayu punggang rumah raya tak enda berasai bejaku enggau pangan diri.
“Au dih kau wai, tanya enggau iya enggau tempenga dabung seleka. Enti iya ka nyaut asai ke beambai semalam. Tanya enggau tempenga dabung landai, au dih wai. Enti iya ka nyaut enggau tekup dabung jurai, tak asai ke beambai sebulan,” ku bala dara.
ANAK TEMUAI BETEMU ENGGAU APAI RIMBU
Dia Anak Temuai bejalai nunda udi Ibu Indai Rimbu ke sigi bejalai lanji-lanji niti punggang rumah menchegi baka sentali ai anyut. Anak Temuai pan bejalai sigi ringang-ringang baka pasang besegang sintak surut. Iya bejalai sigi nyingkangka bulang ujung kudung niti sentali rumah belung indah enda baka nibung ke berayung puputka ribut. Bejalai lubah Anak Temuai baka nipah ke rebah di puak laut. Dia nyau peda datai di ruai sida Apai Rimbu. Malik mih Apai Rimbu lalu nentang enggau bulik mata menchenung, nentang Anak Temuai ke baru datai deka ngaitka andai badi saka limau mampang.
“Au, dih Dum. Lalu dih lantang aku,” ku Aya Apai Rimbu.
Dia Anak Temuai tak lalu ngaitka isau lansau penampuk rian kijang, gading unding beruding makai tulang. Kaitka iya di saka tanduk rusa ke periga ringang bepampang. Dia iya lalu duduk nyendi Aya Apai Rimbu Pemadu Dama Mansang. Dia seduai sama duduk besila baka orang ke macha surat sembiang. Seduai tak sama duduk nyerungkung baka remaung madung di lubang.
Dia Aya Apai Rimbu tak telengga-lengga lama tengenung. Ni enda lama telengga tengenung baka empelekung mabuk ambuh, tak lama ngetu baka puyu mabuk keruh laban meda gaya Anak Temuai ke datai nyingkang nyurung ke punggang rumah belung enggi sida iya. Dia dih tak enda berasai, dinga seduai iya tak rerengai dih Rimbu ngumbai makai.
“Makai dih Apai, makai. Bai aka tama ke bilik,” pia ku jaku Rimbu.
“Au dih Dum. Tama tua dih gayu lantang anak aku. Makai mih tua kau Dum,” ku Aya Apai Rimbu.
Nya baru Anak Temuai nitihka Aya Apai Rimbu. Tama Anak Temuai ngagai penaik bilik buka dua ke manah remba-remba. Peda iya begeri benda menaga tiga puluh tiga ke melabat baruh bentang. Peda bilik buka lima enggi sida Aya Apai Rimbu bandung pebenung lempaung benda rusa, tiga puluh lima, beukir mua pengena-ngena ngambi bingka senggang pengerang. Nya alai bilik baru enggi sida Aya Apai Rimbu, bandung begeri benda seregiu, tiga puluh satu ke bebulu mansau pisang. Nya alai benda rawai, tiga puluh tigai, ke bebentai ngelung bekumbang. Peda guchi enggi sida Apai Rimbu, tiga puluh mati, beringgit tisi bedabung manyang. “Raja mih orang tu baruh singka miga lantang,” ku ati Anak Temuai.
Seduai pan lalu duduk makai.
“Au dih kau, Dum. Makai mih tua gayu bedamai nyeruran kenyang, ipung ke lempaung beketup tunjuk. Makai mih tua Dum ke bedamai nadai lauk. Ngempang ukai alah aku enda ngempang ke Nanga Batang Rajang. Datai aku di Nanga Batang Rajang, ai tak pasang besegang mudik menuh. Nyumpit ukai alah aku enda nyumpit, Dum, nunjang batang kara jangit. Bisi ga kerampu jelu bejit tang ga ipuh aku enda munuh. Makai mih dih Dum wai. Salai bisi ga ditu Dum, rangkai semah Skrang. Nya alai lempis bisi ga ditu Dum, pais ikan kesenyuar magang. Salai rusi bisi ditu Dum rusa lalang. Jani pan bisi Dum babi belang.
Peda Anak Temuai ai lauk tak baka danau Nanga Tisak. Peda iya ga asi baka Tuchung Menyaung Gunung Setulak. Dia makai dih Anak Temuai ngisi kamai tandan lempuang. Tak penuh asai buyuh perut raya. Kenyang iya di lempuang kandang dada. Dia Anak Temuai lalu bebasu jari. Dinga basu iya sigi munyi terutu rajang tetunggang. Udah nya tak lalu mengkurup ga Anak Temuai munyi tekup gumbang belinggang. Tak lama malik tengetu tudah Aya Apai Rimbu panggung nentang.
“Naka mih pemalat Anak Temuai tu ari sukat timbang pengedang,” ku ati iya.
Udah badu makai, seduai pansut ke ruai sama berimbai duduk betentang. Nya alai, hari pan nyau lemai ke nyerimbai sabung petang. Dia Apai Rimbu lalu beranchau tikai tujuh belah ruai baka ke begawai ngidang pengabang. Hari pan nyau malam kelam sabung petang. Orang pan bejalai magang-magang; semua orang rumah panjai puting setak pemayam punggang.
NANYAKA PENTAI ANAK TEMUAI
Dia orang berandau, nyampau ari adau mansang nyemerang. Perisi orang sekayu rumah nyelenggi ari lanji ambin begitang. Mayuh mih tubuh orang dia ari beluh kambuh seluang. Nya alai sida ke indu tak nyau begelumu gempuru diau di petang. Dia Anak Temuai tak lalu bedau besila becherita mayuh dibilang. Tak bedau enda buka serungkung bandung denjang seringgang. Dia orang bejaku ke betibang di kuyu pun rang. Mulut orang nyebut tang mata orang selalu belina malik nentang. Sida iya berandauka diri ke meti ngelingi sepan babi belang, berandauka diri manjuk ke teluk kampung puang, berandauka diri nyumpit ngulihka bejit beburit bependal belang.
Nya baru, bejaku mih dih Apai Menaul Gundai, nya orang ke delapan manang betawai, semilan ngaum meligai, baru bisi gundai cherai mesai kepai buntal melelenang.
“Uji ngetu dulu kitai mayuh, anang ragak bala nembiak ke bekejengkak papak perenggang. Aku tu ka bejaku betiu nyampau dikenang. Nya alai kitai mayuh, kitai banyak, kita ke di tengah rumah, orang ke di punggang puting setak. Lama pala tangga kitai tu enda kala peraka temuai datai. Nya alai pinang kitai lama udah luluh di gagang buruk di tangkai. Asi kitai lama udah bari nadai orang makai. Tang lemai ke tu lebuh hari ke terunji sabung lemai, tak bisi jawang sida rengayang Bujang Besai ke nuntung perabung rumah panjai.
“Au mih kau Dum, au mih kau gayu. Aku tu Dum, bejaku menga enda tau nyengala bisi leka. Bejaku udu mih aku tu gayu kelalu changka. Bejaku manah aku tu kau Dum di tengah mua bala. Tang ka aku enda baka nya Dum, kitai bejaku kelulu enda bekelala. Tu aku gayu ka nanyaka menua. Ni penatai nuan dih Dum? Ni peninduk nuan dih Dum Bujang Gauk ke di puchuk tapang neraka? Dini dih tansang nuan Bujang Mekang, begelar mayas lelang kering tulang ngerembang batang bedindang berimbai dua? Dini sepan nuan Jenawang Bujang Ganggam, nuan digelar serenti babi bandam? Kada enda tiban ujung tanjung Baram betelan ngelung besapa? Dini dih radai nuan ke Bebangai Raja Baya? Aku tu ka nanyaka tunga menua?” kenu ku jaku Apai Menaul Gundai.
Oleh JANTAN UMBAT