![](https://utusansarawak.com.my/wp-content/uploads/2022/06/image-61-1024x899.png)
Tusun Ke-3
BERITA ANAK TEMUAI
DIATU diadingka berita sida Jenawang Bujang Melisa ke tak beati meraya diau meranggang. Datai hari siti sida Jenawang Bujang Mekang nali empang. Datai hari siti iya nali empang mega. Nyau keleju iya ke merampau diau meranggang, ke duduk dungu-dungu nguan timpu papan pantang, dia iya tak lalu tinduk di retuk papan simbang bebalaika ratai bungai sinang. Dia iya bisi mimpi mentuwie tinduk telentang. Mimpi betemu enggau antu, ke enda ngasuh iya berunggu nali empang. Tedani Bujang Mereti teduie angkat seledadang, dia iya tak duduk dugau-dugau di panggau mai ati irau kandang lempuang. Dia iya nyau enda teingatka kenyap buah mimpi lebuh iya ke mentuwie galai petang. Ujung tunjuk iya tak tekusukka penduk tengang sebelembang.
“Oh, enti baka tu mati dih aku indai ke mengandai tangkai menimang sintak likang tali sentagai,” ku iya.
Datai hari siti nali, hari siti nali ga Jelamang Bujang Mereti, Serit Sapit Ganti. Nyau keleju iya ke sinu di leku kandang ati, ke merampau diau dua tiga hari, dia dih iya nyau enda berasai, tak gali galai malai tikai anyam diri. Tinduk dih iya kelemumuk mata tisi. Dia iya bisi kenyap buah mimpi. Mimpi betemu enggau Menyalu Bunsu Sereganti. Dia orang mega madahka iya enda tau berunggu main nali. Dia iya tak tegepang angkat tedani, mai atau ke irau merampau tusah ati. Iya nyau enda teingatka kenyap buah mimpi, ujung tunjuk iya tak tekusukka penduk tengang ujung tali.
“Au, ka mengandai tangkai beradi, mati aku indai sintak tali piso penemuai. Tu mih ati enggi aku tiga lemai ngaum ngalih hari kemari tak nadai pengawa bukai selalu betati deka nemuai,” ku iya.
“Au Dum, enti nuan nemuai lantang, anang ga nuan enda manah diau di menua orang,” kenu ku jaku indai Anak Temuai, Dara Mengging Tubuh Kuning Ti Ke Sumping Pintu Panas, Indu Kedemi Tuchi Ati Pengemata Kunchi Pintu Tawas.
Nya alai Anak Temuai pan lalu beradu. Tak lalu belitka iya sirat panjai tak lempai-lempai nyentuk ke kerigai rusuk marang. Tak purus iya unus seribu lapan ratus baka Beketan Talus pulai belelang. Lalu pasukka iya tumpa rangki penaring jani babi belang. Aduka iya tumpa bala, serak upa gading tulang. Belitka iya labung pakau baka tulis likau nabau melelenang. Labung lalung iya baka sengkilung tedung tiang. Aduka iya labung lilap baka sempepat inggap di puchuk pedada nyentang lalu umba Anak Temuai enggau lelaga bulu kenyalang. Entakka iya gerejak takang isang. Nya baru tangkin iya berangin pedang panjai, bejabung balat merundai baka buk sipai balat gelegetang. Tangkin iya nyabur chudur pengundur darah lega langkang. Udah nya lalu san iya sumpitan sumpit tapang, tangkin iya saka limau mampang. Dia dih iya lalu ngangauka menginau tangkai menimang.
“Au dih kau indai. Mupuk mih aku bejalai dih indai begadai nyurung mansang,” ku Anak Temuai madah ngagai indai iya.
Dia indai Anak Temuai tak lalu labuh selimas ai mata, liur tepanchur undur nyawa, sesidak nyabak selangka dada laban iya ke endang nemu anak iya ke nemuai ngagai menua orang di Batang Buluh Balau, Ke Belai Lega Langkang, di Batang Keranji Padi Ke Bebuah Rumbau Jadi Bintih Kesuwie Kunchau Benang. Nya ga menua sida aya Apai Rimbu ke Pemadu Raja Mansang.
NGELAWA RUMAH APAI RIMBU
Anak Temuai pan lalu mupuk bejalai belundai nyurung mansang niti sentali jalai ulang. Iya lalu nyemerai datai di pendai masai alai mandi sekali bebuai miang; pendai ulu sida ke chiru ari madu minyak kepayang. Nya alai iya nyemerai tebing seberai lalu nyemerang tebing seberang. Rembang pelakang lalu pelenggi, bukit ditait diturun tiki, sungai diulu, sungai diili. Iya lalu manggai di Kara Rakah ke reregah tengah menua, Kara Runti Nali Pesara. Nya dipangkang Gerasi Mangah ke nyau rah-rah inggar nyawa. Nya dipangkang Gerasi Tunggal Gigi ke beati mutus changka.
“Au dih Dum kini penemuai nuan gayu?” ku Antu Gerasi.
“Au dih aya wai. Aku tu nemuai ngagai menua sida Setembul Tating Jala, Pengangkam Kaki Kubau, Tunggul Nugu Tengah Menua, Rekaya Raja Nyamai Diau,” ku Anak Temuai.
“Jauh menua orang nya Dum. Enti nuan nemuai kia ke, tujuh hari tujuh malam baru nuan datai di menua Apai Rimbu,” ku jaku Antu Gerasi Tunggal Gigi, Jerimut Nampung Mulut, Beukir Daie Silup Entadu, Rimau Kaka ke bala pandai begelut, bulu ke nyeregu bauh nyeregu.
“Au dih Dum, uji telentangka nuan petangan ujung jari, alai aku ngengkahka anak kebal nyadi kena nuan berujan pendawan mata besi ke nadai raji mesai abi sayat kemelang. Engkahka ba petangan ujung kukut, pegai lalu sambut. Tu perampang pinang idup, ambi nuan ke ubat kebal penutup nangkup di adup ruang belakang,” ku Antu Gerasi.
Udah badu Antu Gerasi bejaku, dia Anak Temuai lalu bejalai belundai nyurung mansang. Bejalai laju iya ari peluru leka senapang, bejalai deras baka upas laja pematang. Nya alai batang tinggi, disuruk, batang baruh, lalu diperejuk.
Kejangka Anak Temuai ari nya, nyau manggai di kampung baung nadai dinga ensung kesung nyumbuh bujang. Iya datai di kampung rapak nadai dinga wa anak empeliau arang, di kampung sunyi nadai dinga buie buau orang. Iya nuntung di kampung dalam naka anak duan ke bisi dedepan kenyalang betimang. Anak Temuai nyau nengah kampung entap, ke alai naka mempanyat ke bisi rejat-rejat ngungkat serama gendang. Dia iya bejalai beguai-guai ngujika penegar anak sempiar untak tulang laban Anak Temuai ke endang tau jaku kelulu nyampau dikenang. Enti jalai panjai, Anak Temuai tau ngasuh iya pandak. Enti menua jauh, Anak Temuai tau ngasuh iya semak.
Diatu, Anak Temuai nyau datai di bukit ke lelegit tengah menua, di tuchung Biru Nakung Labuh Begempung Gugur Semua. Nya seberai rumah sida Apai Rimbu, di Tinting Sampang Gading Munyi Kesuling Sepu Bujang, di Bukit Lubang Naning Ke Bepeling Mua Lubang. Nya ga alai orang datai mangkaka selaing pulai nyerang. Tak malik iya ke seberai, peda iya tak lempai-lempai peretang rumah panjai sida Apai Rimbu, sehari tajai terebai ngindang terebang. Bulang mata rindu iya agi nentang punggang rumah merundu, sida aya Apai Rimbu sigi begamal letu-letu seperampu randau tengang. Dia mih Anak Temuai lalu duduk mealai-alai bebalaika segu rau meranggang, duduk ngeju mih iya kelalu lelak tulang.
PEJALAI TUJUH HARI TUJUH MALAM
Udah iya nginsap ke rerangap pun rang, iya makai pinang tuai asai ke makai kamai sempidan arang. Nya baru iya mupuk bejalai belundai nyurung mansang. Iya nyau datai di pendai sida Apai Rimbu bekeranganka rangki sepenampang bujang. Pendai ulu sida Apai Rimbu tak chiru ari madu minyak kepayang. Dia begau dih bala nembiak ke bejaku enggau Anak Temuai mayuh kelulu nyampau dikenang.
“Au, mih aya, udu mih nuan tu aya ari pasu paras gantang. Gegembi saruk lensat nuan tu aya, berani panggung sigat. Gegembi saruk raba, nuan tu dih aya, ke berani panggung raja,” pia ku jaku anak nembiak papak perenggang.
“Dini nya baka nya dih Dum. Lelak mih aku tu Dum ikak tulang. Jauh mih menua kita tu Dum, jauh ari menua Memaluh ke richuh ngerubuh tampang,” kenu ku jaku Anak Temuai.
“Au dih aya, ni pengelama nuan udah bejalai belundai nyurung mansang?” ku bala anak nembiak nanya Anak Temuai.
“Tu ketujuh hari tujuh malam baru aku datai nuntung di menua kita,” ku jaku Anak Temuai nimbal jaku bala nembiak.
Dia Anak Temuai nudukka diri diau di tebing ai, nganti diri ke mandi sekali bebuai miang.
“Mandi mih kau aya wai, bepari isi bebuaika peluh langkang,” ku bala nembiak papak perenggang.
Dia Anak Temuai tak lalu bejaku mayuh kelulu nyampau dikenang.
“Naka ga pemanjai rumah kita Dum, wai.”
“Panjai, aya. Rumah panjai kami aya, sehari tajai burung terebang. Rumah pandak kami aya, seketak nyilup remang.”
“Sapa dih orang megai rumah kita Dum?”
“Nya anang ditanya nuan, aya. Nya ga dipegai aki kami Setembul Tating Jala.”
“Au, Dum, mayuh mih dara rumah kita, Dum?” ku Anak Temuai.
“Nya anang ditanyaka nuan, aya,” ku bala nembiak nyaut. Nemu endar ga nembiak nyaut Anak Temuai ke baru datai nuntung nyingkang.
“Enti nuan nanyaka dara, tujuh puluh tiga ke benung bekelenggi. Nya alai sudan, tujuh puluh enam ke bebua tumpa rangki. Balu madai, tujuh puluh tigai ke bebentai tina sekali. Balu, tujuh puluh satu ke lanting bujang mandi,” ku jaku sida ke nembiak papak perenggang.
“Sapa sida ke juring muting geraji? Sapa sida iya ke mang ari kepayang rendam sehari? Sapa sida ke munuh ari ipuh ujung jenggi? Sapa sida iya ke bajik puji lelaki? Sapa sida ke imun pantun tampun puji?” kemah ku jaku Anak Temuai.
IBU SEMANJAN BEGEMAN UJUNG DABUNG
“Au dih aya wai, dini sida bisi telebihka ibu kami Semanjan ke Begeman Ujung Dabung, Dara Bagau Nyerengau Rekung. Tang ga iya bedau penti, bedau pemali Niang aya kami Rekaya Ria ke diatu ke udah lesi bebadi rugi nyaya enggau orang ke menua Juara Rumpang. Bedau penti pemali aya kami Datu Siku ke udah lesi ilang pambu enggau orang ke Langgu Limau Dilang,” ku nembiak papak perenggang.
Nya alai tak tuchum Anak Temuai baka ke ngulum gendum buah pinang. Tak ketawa rising-rising iya ngayanka puting dabung jerantang.
“Au mih kau Dum. Dini mih alai aku tu mandi, gayu?” ku Anak Temuai nanya bala nembiak.
“Au kau. Aya. Pendai ili enda tau alai nuan mandi. Nya alai sida apai meruti perut jani ulih sida meti di sepan babi belang. Pendai tengah enda ga tau alai nuan mandi, aya. Nya alai sida Bujang Bungah ngeruah perut manuk labang,” pia ku jaku nembiak.
“Enti baka tu, dini alai aku mandi, Dum? Ditu mih aku mandi gayu, di lubuk mesai mangkuk diturus dalam seratus, ngampuhka penyan lalu laya midang. Tu ga lubuk tengkuk, lubuk kepayang, lubuk daluk, lubuk embawang,” ku Anak Temuai.
“Au kau, aya wai. Dia enda tau alai nuan mandi. Nya ga pendai ibu kami Semanjan. Memaluh udah mandi dia, tiga puluh tujuh, mati semua. Nadai tudah Memaluh agi richuh ngerubuh tampang. China, tiga puluh tiga ga udah mandi diau dia, mati semua. Nadai agi China bejerita main bedagang. Laut, pan udah mandi dia, tiga puluh chukup, mati magang. Nya alai nadai agi Laut ke betanchut malut pinggang,” ku nembiak nyaut Anak Temuai.
BETAMPUNG
Oleh JANTAN UMBAT