BAKA tu meh perau tauka bangkong perang dikena raban bansa Iban ngayau agi dulu suba.
Oleh JANTAN UMBAT
Tusun Ke-18
BALA JELU, ANTU DATAI MANTU SUGI
Nya alai datai semua-mua dih bala jelu, bala antu seribu datai nuntung. Nya baru dinga tak nyau gu-gu, bala jelu enggau antu ke baru datai, munyi empangu ngambat lu bulan mansang. Dinga tak berauh richah rimai bala sida jelu nuntung datai munyi ke begawai di penyurai rumah panjang. Dia sida iya lalu bejaku enggau Sugi laki Sedinang.
“Au dih kau Dum, nama dih chap surat kirum Raja? Nama dih ukum aum pechara? Nama dih abar putar berita? Nama kebuah nuan Dum, nuan ke madahka kitai sebala?” ku sida.
Dia Sugi nyaut enggau tekup dabung jarang lalu bejaku enggau belayan kaban jelu gemu ke betibang di kuyu pun rang.
“Aku ga mai kita beban langkan indu pengala, berangai panjai tiga kena aku nyerang ke gilik tasik raya masai pangka leka gumbang belinggang. Aku ga mai kita beban perau indu berangai bejerubung bandung lantai kena aku nyerang ke gilik tasik besai ngagai menua Ribai Ledung Lelinang,” ku Sugi.
“Au Dum. Nama utai diketusahka nuan gayu, anak aku?” ku Gerasi Mangah belabung dilah ke bengeli gasang-gasang, ku jaku Antu Gerasi ke datai ari tisi langit nyang.
Dia ‘orang mayuh’, ‘orang banyak’ nyau mantapka beliung magang-magang; sida jelu Beruang orang ke ngerumbang batang kayu. Sida iya gawa jamah udah japai udai. Nya alai tak lalu tembu perau indu bangkung, udah bekajangka punggang ampang belumpung, udah besengkarka lambar bari kayung, udah betalika luji bansa selung ngelung ngelingkang. Peda tak lempai-lempai perau indu berangai, udah bekajangka punggang ampang belulai begamal nadai ngemanah nya utai baka ke tau datai ensaraka bua gumbang begagai ngagai menua Ribai, Tasik Besai Ledung Lelinang.
Dia semua ‘orang mayuh’, ‘orang banyak’ tak ngaga gambar diri empu magang-magang. Peda Jugam lalu ngeluan, nya orang ganggam lengan kering tulang. Antu Gerasi lalu ngemudi, nya orang ke ganggam jari nguingka tumpang. Semua jelu bukai tak nyau ngadu gambar diri magang-magang.
Nya alai sida pan lalu pulai gelegensai angkat nyingkang. Semua-mua sida iya sama nyurung mansang. Dia Sugi pan nyau tinggal kediri-diri seorang-orang. Iya pan nudukka diri sambil ngerak Sentalau ke tinduk ngandau hari terang.
“Dani mih kau adi, dani. Pulai mih tua adi ke penyurai rumah panjang. Perau enggi tua tu udah tembu bangkung jungkang,” ku Sugi.
TEKENYIT MEDA PERAU UDAH TEMBU
Tak tedani mih tudah Sentalau lalu tekenyit panggung ka seledadang lebuh iya nentang perau indu pengala berangai panjai tiga ke udah sedia mengkang kajang, perau indu langkan berangai panjai semilan ke udah dilinsu dilagu chukup macham. Luan bangkung jungkang nya ngambi gambar jugam jelu beruang. Dia dih Sentalau lalu tengenung enggau ati ke beraie kandang chantung baka empelekung mabuk ambuh. Dia iya telengga lama lina baka pekaban burung bekaka ke diau di menua di Nanga Kura Kijang. Nya alai dia ati enggi iya balat meranggang laban iya enda nemu sapa orang ke ngaga perau nya.
“Naka penau aka aku tu pemadu dame mansang. Pandai iya tu ke di chunggai tunjuk ngengkang. Bisa mih iya tu ari tuba tubai benang. Ka aku ngumbai tu Keling Gerasi Nading Bujang Ke Berani Kempang laban aku enda ngelala,” kenu iya ke di dada kandang lempuang.
“Kati ku tua pulai ika? Ni maya tua mai perau?” kemah ku Sentalau.
“Eh, nadai nya utai dibai adi. Uji nuan nepan di luan, aku ngemudi,” kemah ku jaku Sugi laki Sedinang.
Nya alai lalu nepan seduai di perau indu berangai. Dia perau nya tak lalu ngelantar baka pesilar ular beluai bejalai deras mentachang. Nepan perau indu bangkung seduai iya, peda iya lalu ngelantar baka pesilar ular tedung ti ngua puchung rajah pemandang. Tak enda berasai seduai iya datai di pengkalan. Tanchang seduai iya perau nya di likang. Seduai iya lalu niki ke rumah mansa sida Bujang Paku Lawang. Perau sida iya tak baru bedau beruang sala, begamal mua penyelai iga enda jungkang. Peda perau batang tapang mikai enggi sida Bujang Paku Lawang, nyelai nya utai, tak nadai gamal berangai lundai penulang. Nya alai dia sida iya lalu nyapa Sugi seduai Sentalau.
“Bisi seduai tadi nemu kayu ke perau indu penchalang?” ku sida.
“Nadai, unggal nadai. Kayu mua ngemayuh nya utai tang semua udah parai lalu ngerang,” ku Sentalau nyaut.
“Dini dih Sugi ke lap lansang kedubang, ke beli panggung lansang nya nemu menua kitai? Nya alai nadai guna nanya orang ke lap, ke tambap nimbun penyai orang,” kemah ku jaku Bujang Paku Lawang.
Sugi seduai Bujang Sentalau pan lalu pulai niki ke rumah masai penunggah Raja Dagang. Dia bala nembiak ke mandi ke ai nyelam lelunggang bela tekenyit lalu seledadang meda pemanah perau Sugi laki Sedinang udah ditanchang di pengkalan ba tengkulan tali likang. Sida nembiak pulai ke beguai-guai ngagai penyurai rumah panjang. Begau dih orang di rumah nanyaka kebuah nembiak papak perenggang ke bangat tak kelalu bekejengkak ngagai ruai sida Sentukan Buban apai Endu Dara Sedinang.
“Au aki, uji nuan nurun ke ai meda pemanah perau Sugi laki Sedinang,” ku sida.
Sugi bisi ga duduk dia tang iya nadai madahka mentua iya, sida ke semuka duduk betentang.
“Au dih Igat. Anang kita bula beampa puang. Anang kita banggar mambar bedilang. Dini pan nya bisi teulihka perau indu berangai. Hari tu apin terunji sabung lemai tegayam petang,” ku Sentukan Buban.
“Au dih aki, anang nuan munyi nya. Uji nurun nuan ke ai,” ku bala nembiak papak perenggang.
LUAN PERAU BEGAMBAR JUGAM
Nyau tak enda liat ati Sentukan Buban, lalu nurun iya ke ai masai alai mandi sekali sungga undang. Nya alai tak bejalai iya begadai-gadai belundai nyurung mansang. Tilik iya ke pengkalan, nadai ga iya meda perau nyeruran mengkang ditanchang. Tak nyau bejalai ke ili agi ga iya. Iya pan datai di lenggi tanah tebiang, iya lalu tekenyit balat kelebawan, tegepang di lempuang gagang penyan meda berangai panjai semilan udah bekajangka punggang ampang belantan, belinsu ngena lagu unsut seram. Peda luan perau nya begambar jugam jelu beruang. Dia iya lalu tekenyit balat rawan. Iya lalu telinchir ari singgir tanah nyapan. Iya tak labuh ngagai berangai panjai semilan lalu seledadang angkat betekan labuh ke reni ai dalam ngampuhka tandan bau nukang. Tak pulai ga iya ke rumah peregah melan-melan mansa orang ke betunga duduk beban, iya nya, bala sida Bujang Paku Lawang.
“Pulai ari ni nuan aya, nuan tak besak basah ngepan ke nyeruran chukup magang?” ku tanya orang.
“Au dih kau Dum. Aku ga pulai mandi dih Dum di pendai lubuk dalam, mandi nyelam ngampuhka tandan bau nukang,” ku jaku Sentukan Buban. Iya ga agi belalaika berangai indu langkan enggi Sugi, begamal melan-melan begambar ngambi jugam jelu kering tulang.
Nya alai mandi bala mayuh ke ai lubuk dalam. Dia orang nentang enggau bulang mata tajam. Sida tak sama ngenung baka empelekung ikan ngaban. Tak sama tebelenga sida baka bunga ke ditanam di panduk ujung kempan. Orang nentang berangai panjai semilan enggi Sugi, begamal melan-melan, tak udah meruan ditanchang di tengkulan tali likang. Nya alai pulai ga bala sida Bujang Paku Lawang ke rumah. Lemai nya, sida enda agi betandai mansang beban nyan balan beliung kabang.
“Nadai guna kitai agi ngaga perau indu berangai. Enggi Sugi laki Sedinang Dara Pandai nya mih kena kitai nyerang ke gilik tasik besai ensaraka bungai gumbang belinggang,” ku jaku tudah Bujang Paku Lawang. Iya pan nyau enda be ati mari agi ke di lepi tandan lempuang. Iya tak nyau enda pedis ati ke nyeligi linang-linang.
Nya alai orang mayuh, orang banyak pan nyau nengkiraka perengka diri ke nganyau ke semua nadai timpang lalu orang ke indu kiruh ngaga bekal. Ditimpuh sida Sugi nengkira enam hari. Ba hari ketujuh sida deka nurun.