![](https://utusansarawak.com.my/wp-content/uploads/2022/10/Caption-6.jpg)
SEKEDA ari gaya langkau arau endur ngenduh jeman Wat Bujang Sugi dulu suba.
![](https://www.utusansarawak.com.my/wp-content/uploads/2022/10/image-27.png)
Tusun Ke-17
BEBAN PERAU PENGAYAU
ORANG tak beranchau tikai tujuh belah ruai baka ke begawai ngidangka pengabang. Dia dih orang lalu nesau orang sekayu betung randu nyuruk rampu randau tengang. Sugi mai orang ke begulu nunda tematu apung bindang. Iya mai orang betugung nunda lempaung ngambung batang. Iya mai orang baum.
Udah orang datai magang-magang, dia dih orang mayuh, orang banyak nanyaka kebuah Sugi mai baum.
“Au unggal. Aku ke ngelumuka kitai ditu sekayu bentang landu nyerara rampu randau tengang baka tu ga. Nya alai kitai tu udah tembu ngetau ngisi kebau tibang pengindang. Udah kitai ngintu pengawa umai, kitai nyauka bebuaika darah rangkai lega langkang. Aku ka mai kita nengkalung laki ke tisi langit mandang. Mai kita ngudu ke munggu duju bukang. Mai kitai nganyau ke gilik tasik matang, nyerang bala besai ngagai menua Ribai, di Tasik Besai Ledung Lelinang,” kemah ku Sugi nyaut.
“Sapa kitai ke pugu pandu matak serang? Aya kitai Sentukan Buban ke tuai pala ke nyau buban ngemunga lalang midang?” ku tanya Bujang Paku Lawang.
“Ka pan enda aku. Nya alai, enti kitai nyau mansang nyerang, pagi ila barang kitai ke nadai terabai, kitai ban terabai rampai disimbang. Kitai ka ngambuh bujak besantuk pirak ke menchapak nunang awak tangkai lempuang. Kitai ka beban perau indu pengala kena kitai nyerang ke gilik tasik raya pangka leka gumbang belinggang,” kemah ku Sugi laki Sedinang.
“Nya alai, sapa kita ka nitihka aku?” kemah ku Bujang Paku Lawang. Orang mayuh nadai tentu nyaut enggau selingkut mulut dabung jarang. Semua orang betati deka nitihka Sugi laki Sedinang tang ga iya enda nyaut ngasuh Bujang Paku Lawang matak serang.
Tembu baum, orang pulai magang-magang. Pagi hari siti, nyerumba hari ke tawas teringkas siang, orang pan lalu nurun beban. Sugi tak bedau enda angkat ari panggau ke begurau tuntun pinggang. Sida Bujang Paku Lawang udah belabuh nebang batang tapang ba jalai pendai. Dia Sugi lalu ngangauka Endu Sedinang.
“Uji mih nuan Sedinang ngaga bekal ke kami dua adi kena kami dua beban perau indu langkan, kena kami nganyau ke gilik tasik nyapan nanjak gemuan gigi gumbang,” ku jaku Sugi.
Sedinang pan lalu ngaga rendai nyamai munyi api ke makai reban rangkai nyanggang ditebang. Sedinang ngaga penganan baka bulan rerak rumpang. Sugi lalu ngema sap isau beselang lalu nanggung rantung beliung kabang. Nya alai nurun mih Sentalau seduai Bujang Sugi lalu mansa sida ke nebang batang tapang.
“Kini seduai unggal?” kemah ku orang mayuh ke betubuh sampal magang.
“Kami dua tu ka ngiga kayu ke perau indu penchalang,” ku Sentalau.
“Au mih. Dini iya ke beli nya nemu kayu ke tau ke perau bangkung jungkang,” ku Bujang Paku Lawang.
MILIH KAYU DIBANKA PERAU
Bujang Sugi pan enda nyaut enggau singkut mulut jaku kenang. Seberai seduai iya tebing seberai lalu puntang seduai iya tebing seberang. Datai seduai di tingkah tanah ngua, di kampung bali rimba, dia lalu seduai tetentangka enggau sekengkang bulang mata kiba.
“Nakah ga pemanah kayu nya aka, batang kedang upa begamal linga-linga,” ku Sentalau.
“Au adi, enda nya tau ke berangai panjai lima, ke ruang buka sedepa enggaika parai manuk sabung aku Pungga, Manuk Lia ke Dilengka Mali Lengang,” ku Sugi. Tak ngenung dih Sentalau ninga jaku Sugi munyi nya.
“Sapa dih dama Sugi laki Sedinang?” kemah ku jaku iya tang mulut iya enda pansut. Kejang seduai iya ari nya seduai datai di tingkah tanah nyadai, di babas kayu tuai.
“Naka ga pemanah batang kedang mikai nyin aka wai bebatang lempai-lempai,” kemah ku Sentalau bejaku rengai-rengai.
“Nya adi wai, enda tau ke perau indu berangai kena nyerang ke gilik tasik besai ngagai menua Raja Ribai enggaika parai manuk sabung aku, Sempurai Muntigerai Simbang Ambai Lancham Jerungkang,” ku Sugi ga.
Kejangka seduai ari nya, seduai datai di tingkah tanah nyala, di kampung jerung tengah kerapa. Seduai iya lalu malik nentang enggau sekengkang bulang leka mata.
“Peda nuan ika wai, batang ubah ala ke bebatang remba-remba nyin,” ku Sentalau.
“Nya baru tau diambi tua ke perau indu pengala. Nya ngayuka panjung pegari nyawa manuk sabung aku Laja mantaika leka begumba balang berang,” kemah ku jaku Sugi laki Sedinang. Dia seduai lalu mansang semak sereta mensiang. Seduai iya pan lalu ngaga tundan ke leman tuntung tiga. Dia seduai lalu ninga bejampung burung gaga tak kaung-kaung.
“Naka ga pemanah burung tua adi ke ngayuka panjung pegari nyawa engkitai ila mantaika leka balang berang ukai ke enda nyandihka tundan ke leman tuntung tigai,” ku Sugi.
Udah nya, seduai lalu belabuh nebang. Dinga tak chengai-chengai munyi embuas burung beragai.
“Naka ga pemanah burung tua adi wai, tua ke nebang batang kedang mikai. Tu ga ngayuka nyawa sida manuk sabung aku Sempurai mantaika leka begumba balang begundai ke rengai-rengai minta timang,” ku Sugi.
Nya naka jaku ke ngeluluka seduai iya ke ngiga kayu ke perau indu berangai lundai penulang. Udah nya lalu ditebang Sugi kayu nya ke tak rebah manah-manah ninggang tingkah tanah rata. Peda tak lantar pesilar ular naga ke benyawa nukangka rang. Peda puchuk iya tepan sambuk jelu gila ke benyawa nukangka rang. Dia dih Sentalau tak lalu rari ke tisi pemanah iya, tak enda redaya angkat nyingkang.
Sugi tak lalu ngelumpung ujung batang kedang dayung enggau rantung beliung baja. Peda tak sereta lalu beluntang. Dia seduai lalu duduk ngetu tengeju lembut tulang. Seduai iya lalu bepakaika asi rendai ke digulai santan direndang. Seduai iya makai asi enda jena-jena mangkang lumpang. Seduai tak lalu makai asi ke diadu Endu Dara Sedinang ngisi geni tandan lempuang.
Tembu seduai iya makai ngisi kamai tandan lempuang, dia seduai tak duduk bekelenguk baka batang tapang puguk ke nyaruk nyemayang batang. Seduai duduk berandau di pulau babas pengerang.
Kelama seduai ke udah ngetu, dia Sentalau lalu mai Sugi belabuh beban.
“Mupuk mih tua ika beban mantaika balan beliung kabang,” ku Sentalau.
“Au kau adi, nama utai dipeguaika tua beban adi wai? Tua baru badu makai. Tua dulu gali galai ngedang belakang laban tua lelak ikak tulang. Udah manah pan tua ulih nebang,” ku Sugi. Sentalau tak berasai malu ke mai Sugi mupuk beban ngena balan beliung kabang.
MINTA TULUNG ANTU
Seduai pan lalu ngaga balai ngenyadika seregu rau meranggang. Dia Sentalau pan lalu ngambi babas penumbas iya ke balai galai tinduk telentang. Tak enda berasai iya lalu tinduk jenak munyi ke matak unak jelayan ngerang.
Ninga seput Sentalau tak nyau beranyut munyi ai surut ke besintak langkang, dia Sugi pan enda tinduk. Nya alai laban iya ke tau ajih, iya pan lalu bejaku bekelulu nyampau dikenang. Iya tak lalu muchau munyi Melanau nimbau bangkung di ujung tanjung bekumbang. Iya tak lalu nyapa munyi sada Manang Chelung, lalu nyampi iya enggau seri gigi ujung dabung. Iya ngangauka antu ke datai ari peru teluk kampung, ngangauka jelu ke bebulu bauh bejeritung, ngangauka aya iya antu gerasi ke begigi, pala baka rintung, ngangauka sida buau datai ari rantau bekangau parau rekung.