![](https://utusansarawak.com.my/wp-content/uploads/2022/09/image-64-1024x771.png)
Tusun Ke-15
WAT BUJANG SUGI NIKI KE LANGIT
SEKUMBANG Sugi ke udah datai di menua sida Sedinang, iya nadai ngetu diuji Bujang Paku Lawang. Ba semua pekit, Sugi nadai kala alah, tak nadai surut nikal ke belakang. Orang pan nyau ngumbai iya Wat Bujang Sugi. Berebak enggau maya Bujang Paku Lawang ke mai Wat Bujang Sugi bepekit, dia dih Sedinang bisi bejaku enggau Wat Bujang Sugi.
“Au dih ambai, ke dendam dalam bangkai, Au dih laki aku Sugi ke dendam dalam ati. Aku bejaku enggau timpu dabung landai baruh sambai pun rang. Aku ka madahka ati diri tusah di gundah kandang kerigai. Ati enggi aku tu Sugi dua tiga hari tu ke beraie balat amai. Aku tu ngenang sida menimang kerubung karung mengandai enggi aku kau Sugi ke udah lesi bebadi ilang nadai ditangkap sida Kedai di penyurai langit mandang.
“Nya alai apai aku dih Sugi Bujang Mit, udah ditangkap Apai Sabit Bekait dibai orang pulai ke Jerit Langit Mandang. Aku dih Sugi ngasuh nuan ngambi sida apai Bujang Tinggi dih Sugi. Bai iya pulai ngagai penyambai rumah lelenggi panjai nyementang enggi kitai. Aku ga ngasuh nuan mulau matak serang ngasuh nuan ngayau mai orang,” kemah ku jaku Endu Dara Sedinang.
Sugi tak ketawa malik ke bukai. Iya tuchum panggung belalai enggai tetentangka Dara Sedinang.
“Dini dih aku teambika nya. Aku tu ke beli lansang kedubang. Aku tu ke lembut enda kering tulang. Kati alai nuan enda nginjau Bujang Paku Lawang? Nya ga orang ke tegar sempiar untak tulang, orang ke tau serang,” kemah ku Sugi.
“Oh, anang munyi nya ga nuan kau Sugi,” ku Sedinang. Sugi pan enda nyaut agi.
Nya alai malam nya, apin ga iya pulai ngagai sadau Sedinang. Bedau ga iya gali diau di panggau enggau Wat Igat Retachat Pangkung Kerumung, Sentalau Ke Rerangau Inggar Panjung. Seduai iya tinduk begulai di ruai. Dia Sugi, laban iya ke endang tau meda ari tapa dada jari, tau tilit di burit kendi aji, endang tau ngangau sereta tau nyampi, lalu nyampi. Nyampi dih iya diau di dia ngasuh Sentalau tinduk jenak. Dinga tak munyi matak unak rutan sega seluang kuruh seput enggi Sentalau ti beranyut munyi surut besintak langkang.
LABUH BA MENALAN APAI SABIT BEKAIT
Dia Sugi pan lalu pansut ke tanju mesai langgai jugu lang beparang. Iya lalu muchau munyi Melanau nimbau bangkung. Iya lalu muchap munyi Kedadap alam kampung, nguwa sangin munyi Beketan Palin ngulihka lilin madu ranggung. Iya nyampi enggau seri gigi ujung dabung munyi Menani Manang Chelung, munyi Gelanyang Manang Empung, nya orang ke nyaguka ayu pelangka gantung di baruh penjuang tulang perabung bekelapungka upung gerunung sanggang. Dia Sugi tak lalu mengkelak munyi masak chagak bedil betunang. Tak nyirut munyi ngetup asam semadang.
Dia iya lalu perejuk gantung ngagai kebung langit ngeruang, perejuk ngelambai enggi iya, Sugi Bujang Besai ensara tetai bintang beguang Iya lalu labuh di menalan sida Apai Sabit Bekait, orang ke berumah di Teresit Langit Mit, Tikup Rapit Baka Tambit Peti Belulang. Tak manggai di menalan sida Apai Sabit Bekait, Di Gerenjang Bintang Baka Bulang Teku Taji, Langit Mit Baka Kepit Bingkai Tanggi.
Dia dinga iya tak gu-gu di sekayu metang landu sida Apai Sabit Bekait nyau munyi empangu ngambat lu bulan mandang. Tak berami richah rimai orang benung nikika pengabang baru datai. Sida Apai Sabit Bekait begawai besai, nirika ranyai tiang kelingkang. Orang ka munuh apai seduai indai Sedinang. Dia Sugi lalu nanya enggau tempenga jaku lantang.
“Jadi rumah kita tu unggal, jadi?” ku iya.
“Jadi, dih unggal jadi. Kami tu nadai penti laban kami tu begawai nirika ranyai kenyali bujang. Kami tu begawai nirika sandung ke bebungkungka pebenung menaga ningka beluyang,” ku orang nyaut.
Nya alai Bujang Sugi pan nyau duduk di pala tangga ba ruai orang ke dia. Orang nadai utai ngengaga nya nunga iya duduk betentang. Dia orang mayuh, orang banyak, enggau indu kaban nembiak nyau begau meda Sugi baru datai, meda iya tak nyau julas-julas baka asu pas betu peransang, tak nyau jangah-jangah baka beruang mangah ngelampin buah melanjan nunggang. Sugi endang dijangka orang kering keredanding tulang pinggang, jangka orang tegar sempiar untak tulang, meda berangin pedang panjai enggi iya ke bejabung balat merundai betabu gelung gelegetang. Peda isau lansau enggi iya penampuk rian kijang. Peda nyabur iya chudur pengundur darah lega langkang.
“Oh, gegembi mih orang tu saruk lensat ke berani panggung sigat. Gegembi saruk raba orang tu, ke berani panggung raja,” ku jaku orang serumah. Tak siku pan nadai ga orang ngelala Sugi tang semua orang bebasaka iya magang-magang. Dia dih orang mayuh, orang banyak lalu madah ngagai Apai Sabit Bekait ke di tengah rumah.
“Au dih aki, au dih aya, naka mih penyigat temuai, iya ke baru nuntung datai di penyurai rumah panjang. Nya orang ke tajam nyemayam nyemilu tisi. Juring orang nya muting geraji. Mang orang nya ari kepayang rendam sehari. Munuh orang nya ari ipuh ujung jenggi, kering panggung berani,” ku bala pengabang.
Angkat Apai Sabit Bekait mai pamping piring rendai digulai santan direndang, mai piring penganan baka bulan rerak rumpang, mai letup meilup-ilup penangkup bunga lepang, mai seliuk manuk labang, mai tabak ke lelidak tentang pengabang, bejalai beguai-guai belundai nyurung mansang. Datai iya ba mua Sugi, iya lalu bejaku.
“Au unggal, nama kebuah nuan laun datai kau unggal? Semua orang udah niki magang-magang,” kenu ku jaku Apai Sabit Bekait.
“Au unggal, bebai aku tadi unggal tang siku orang madahka diri nadai lantang lalu siku madahka diri enda enggau. Nya alai aku tak kediri-diri seorang-orang tang aku tu deka mantu gawai kita unggal. Gaga rimai mih aku ninga kita nirika ranyai tiang kelingkang,” ku jaku Wat Bujang Sugi ke bebulaka apai Sabit Bekait, orang ke diau di Jerit Langit Mandang.
“Enggau aku pulai ke setak nuan kau unggal. Nyin ruai kitai, iya ke di tengah rumah. Peda nuan ke tak regah-regah ujak kelekuyah takang sabang. Nyin mudan kitai unggal alai nyalai begam balang berang. Ditu ukai penuduk kitai Anak Bujang Berani ati mutus kempang,” ku jaku Apai Sabit Bekait nganu Sugi, agi nampung jaku iya.
Sugi pan angkat seranyat nyurung nyingkang. Seduai lalu betunda-udi sekaki betambak singkang. Nya alai dia orang serumah barang ke nengkadah besap-besap. Orang ke malik rangap-rangap. Nadai siku mih sida ngelala Wat Bujang Sugi. Dia Wat Bujang Sugi lalu datai di ruai Apai Sabit Bekait.
NYAMBUT PENATAI WAT BUJANG SUGI
Udah Sugi duduk, orang pan lalu ngatur peniki Sugi laban iya ke dudi laun datai. Nya alai Apai Sabit Bekait tak lalu enda nanyaka peniki Sugi, tang lalu nanggung tuak ti kelimbak di benung tujuh rumbang tajau bujang. Ai tuak nya lalu diirika Apai Sabit Bekait.
“Tu peniki nuan unggal, tujuh rumbang,” ku iya. Dibai lalu dibiau iya enggau seliuk manuk labang, enggau selanjau manuk menang.
“Au dih unggal. Dini mih aku teempaka utai ngemayuh nya, penuh tekura kandang lempuang,” ku Wat Bujang Sugi.
“Au dih unggal. Nya endang peniki kitai Anak Raja Berani, kitai ke berati mutus kempang,” ku Apai Sabit Bekait. Dia lalu disambut Sugi enggau kukut jari ngengkang. Tak lalu diirup munyi ai surut besintak langkang. Dinga tak gurung-gurung dih beram ai tepung enggi Sugi mansa rekung pun rang. Peda tak abis magang-magang. Dia tak lalu ngenung orang sekayu rumah panjai bala pengabang.
“Naka pengudu dih orang tu ari pasu paras gantang. Naka pengelebih orang tu ari tambih ginti penjuang,” ku ati sida.
SUGI NYELAMTAKA ENTUA IYA
Dia orang lalu mela makai, ngisi kamai tandan lempuang. Orang pan lalu ngirup tuak mua pengeragak kelimbak ari pebenung tajau bujang. Dia Sugi pan lalu bejaku madahka diri kemi laban penuh geni kandang lempuang. Pansut Sugi ke tanju. Dia dih iya meda kajang kumbu bali tengkebang enggau sangkar besi Apai Sedinang diengkah orang di tanju. Dia dih iya tak lalu ninga sera nyawa dabung ujung enggi Indai Sedinang Dara Lempung.
“Au Orang Tuai perinyai sulu sangkung. Dini enda lesi tua tu Orang Tuai nengali hari danjan nengali bulan. Pumpung dih tua tu Orang Tuai baka letung jalung santubung rarung puang. Naka dih pengelebu tua Orang Tuai, aku ke nyeraka di dada gelung chantung. Aku ke bepenti mali lelabi gumba melepung lebuh aku mali nakat ai rarat ulai lepung, lebuh aku mali makai utai alam sengkiung putus pungkang, aku ke ngadaka sendia Dara Lempung enggi lantang tua Sedinang anak umbung. Tang ga iya ke udah belakika Sugi nya orang ke begelar Sengkilung Tedung Lampung ke benyawa sigi rengung-rengung masai mantuk di punggung babi belang. Taja baka nya, iya tak enda teambika tua ke rimpi mantai pumpung enggau orang ke menua Raya Sebayan Ke Lanjan dulu Kejung, enggau orang mandi kechimbung betipuk gantung ke di wung Lanjan Leletang,” ku serebana Indai Sedinang.
“Nya mih Orang Tuai, tak naka ga pengelebu nuan ke lempedu kandang dada. Nuan ke tetengukka jeruk asam jawa, nuan ke bepenti mali lelabi indu gumba lebuh jamat ke mali nakat ai rarat ulai gelegua, lebuh jawang aku mali ngeluntang batang tengang nyengkung mandung jalai raya. Udah lantang enggi tua ada, Sedinang Dara Melisa tak enda ga iya teulih belakika orang ke pemadu tampak dama, orang begelar mensumbar pesilar ular naga, ke benyawa beburah kembung rang. Enda ga iya teidupka tua. Dini enda lesi tua bebadi mantai nyaya enggau sebayan sida Ini Inan enggau Dara Rambai Geruda, bai orang pulai ke menua Buara Rumpang, bai orang merau enggau selaku indu pengala belanchar di senggal wung beranggung ringkat tiga numpu ke Nanga dih wai Lanjan Gelemang,” ku jaku Sentukan Buban.
Ninga munyi nya, Sugi pan lalu beati keru ari paku ke di leku tanjung bekumbang. Tak nyau beati gegar Sugi ari sempiar untak tulang. Dia Sugi pan lalu ngerumbak sangkar besi. Peda tak semua silik abis terumpang.
“Oh, au kita ke begawai nirika ranyai tiang kenyalang. Mati pan kami Dum, enggai mih enda nganti siang hari. Danjan pan kami tu Dum, enggai mih mati malam. Tumbang pan kami dua Dum, enggai mih enda nganti terang,” ku indai Sedinang, ke lalu nanggam pala iya enggau tapa jari ngengkang.
“Au dih kau aya wai bapa mentua, Datu siku pemadu mali disebut nama. Aku ukai ka munuh seduai aya. Aku tu Sugi laki Sedinang ka ngambi seduai pulai,” ku Sugi.
Ninga munyi nya, seduai iya angkat lalu merap Sugi, Tak sama nyabak seduai melaki bini. Nya alai Sugi tak lalu nyangkam seduai iya enggau tangan jari ngengkang lalu simpan iya dalam temilah buluh lalang. Sugi pan lalu pulai ari tanju bedau ga kajang kumbu ampang tengkebang tang tak nyau nadai agi alai orang; tak puang nyelambang. Sugi pan lalu duduk ngentam indah enda baka jugam jelu beruang. Duduk nyerungkung baka remaung madung di lubang.