OLYMPUS DIGITAL CAMERA
KELIMPAH ari mayuh main benyawa bukai, sebengkah agi main asal kitai Iban ke jarang didinga sereta nadai tentu dikemeranka agi nya besugi.
Maya dulu menya, siku kitai Iban ke tebilang landik besugi ba radio nya Meramat. Tang diatu nadai kala ninga sida churung radio mantai sugi Meramat tauka sugi lemambang bukai.
MAYUH TUJU SUGI
Tuju orang besugi menya endang sigi mayuh. Bisi meh nya besugi kena minta pengerai orang ke sakit, bisi mega besugi kena beniatka anak, ka reta pengaya. Bisi mega besugi kena ngenataika pengerindu ari indu ngagai lelaki tauka lelaki ngagai indu. Bisi mega besugi serabana.
Dulu ari tu aku bisi udah mantai ngagai bala pemacha pasal atur enggau pengawa kitai Iban kelia nyentuk ngagai diatu ke ngayap, lalu ditangkan enggau nanya indu sereta udah nya ditembuka enggau atur melah pinang tauka nikah ba rumah panjai.
Mayuh mega pengawa dikena orang nanya indu nya. Bisi nya ngena jalai begeliga, sereta enggau jaku ansah ke manah betimbal didinga, sepenutuk leka enggau genteran ngayanka pengelandik enggau penyiru kitai Iban dulu menya nengkebang leka jaku ke manah didinga.
Ngena awak tu uji kitai ninga pemenah genteran sugi kena orang menya nanya indu ke bini baka ke entudi tu lagi. Tu ngeluluka Apai seduai Indai Rimbu ke nanya Sedinang ke bini Bujang Sugi. Munyi iya baka tu:
Udah nya lalu duduk ga meh Apai Rimbu
nyandih di limba tiang medang. Indai Rimbu
pan lalu tama ke bilik, ti baka tasik linggang gumbang.
“Oh, lalu meh ibu,” pia ku jaku Dara Bajik ke Perintik
Baruh Rekung, Endu Sebatu Indai Kampung,
Nyerumba Rarung Ubas Mansang.
Tak endang enda tekerembai tikai besai baka bala Raja Dagang.
Chukup macham jelapa, endang udah disediaka Indai Mendung Nyerumba Rarung Ubas Mansang. Indai Rimbu pan lalu duduk dia. Orang pan lalu ngeja jantau pulut jentawang.
UDAH NYA ORANG MAKAI
Udah nya orang pan lalu makai ga bedamai nimang lantang. Isau unding pan nyau ga beranaing dalam sarangan. Tisi langit pan nyau bebali besiring kuning. Matahari lesi terunjam padam, hari pan nyau petang nyadi malam.
Agi sekeda bisi begerangi bebuti betundi enggau pangan diri ke jarang betentang, bisi mega nguji pengelandik mantai topik jaku kenang, bisi mega mantai sanggai timang pengabang, kena sida dara lanji betabi jari enggau bala lelaki kaban menimang, kena sida nembiak bekelala ari puting setak ke puting setak rumah panjang. Kena bala sida dara Inja deka bekelala enggau bala lelaki ke negi berani angkat bujang ngichaka randa sida tau betemu dudi ila awakka enda ibuh agi ditanya peneka jadi melaki bini sulu ati idup sekunsi sampai mati lesi midang.
Tutung lalu madahka orang sekayu rumah randu ke merundu randau tengang. Nyau datai ga meh orang sekayu rumah panjai ke sehari tajai burung ngelayang. Nyau udah betugung orang mayuh, baka lempaung ngambungka batang. Nyau duduk berintai meh orang mayuh, baka tangkai marau pengerang.
Nyau duduk bedijir meh orang baka tingkil asam semadang. Orang mayuh pan nyau bepakaika ganjai nyamai, ulih ngerekai di mua tibang.
Nyau bejeputka piun tusut pemulu bengkang kambut entilan di dan lintang tapang undang. Nyau bempaka saba semakau lama, ulih nampuka Kalaka tumpuk lintang. Nyau bekebu ka minggu semakau baru ke bebau lengu-lengu direndang.
Nyau becharikka sirih siduk ulih nyuluk di puchuk ragai menuang. Nyau bekachitka pinang kunchit baru alit nelanga langkang. Lalu bempaka pinang muda asai untak paya undang Samariang.
Udah nya baru Endu Sabalu Indai Kampung bejaku: “Au Ibu. Tu dah pengelama kami tu diau di Gelung Batu Besundang, nyiur nyau bebuah nudukka kerang, nadai ga kita kala datai, kala nemuai. Nama pejalai, nama penemuai seduai Aya deh Ibu?”
“Au Endu. Bisi pejalai, bisi penemuai meh kami duai Aya nuan tu,” pia ku saut Indai Rimbu.
“Deka ngambu puna, ngambu dua tu Endu. Di puchuk tapang ara ninga tak lenga-lenga mesanka baru sempun lukai. Deka manjuk imbuk, kami dua tu Endu, di puchuk tapang mikai. Deka natuk puchuk, kami dua tu Endu, tapang bekumbai . Deka nekang tapang kami dua tu Endu, tepan idang madu terebai. Deka nikung adung kami duai tu Endu, di ulu langgai sungai, deka mantil kaki emperagam lawai.”
NAKA PEMANAH PEJALAI
Endu Sabalu Indai Kampung pan lalu nyaut. Ku iya: “Au, Ibu. Naka pemanah meh pejalai seduai nya. Iya sapa ke dituju nuan Ibu, nunda ulu langgai sungai? Iya sapa ke diselinting nuan deh Ibu, nundang genting sebarang panjai? Sapa ke ditepat nuan deh Ibu, nunda bukit sebarang besai?”
Indai Rimbu pan lalu nyaut Endu Sabalu Indai Kampung. Ku iya: “Kami duai Aya nuan tu anak menyadi, nanya Endu ke di Liu Nyatu Tapang, nanya Kumbau di Balau Belai Langkang, nanya Endu Dara Jawai Ke Mesanggai Dayang Kumang, nanya Sadinang Lantang anak umbung, enggi kita di baruh kurung perabung pinang.”
Endu Sabalu Indai Kampung pan lalu nyaut jaku Ibu Indai Rimbu. Ku iya: “Sapa meh lantang ke ditanya ka nuan nya deh Ibu?”
“Nanya ka Datu Siku Pemadu Nama Mansang, enggau orang ka leku tikal kajang, nanya ka Labung Panggai ka sakai jaku nyerang. Nanya ka Bujang Sugi ke Berani Malas Perang,” pia ku saut Indai Rimbu.
“Iya ga baru pulai nyidi lubang ai ke perebeni jampat mansang. Baru pulai nelian lubang ujan teman geran laja puang. Iya ga baru pulai nyegi matahari, baka bunga besi ditenchang. Iya ga baru nyelikap pintu kilat, baka kempat kanggan dagang.”
“Au Ibu,” pia ku saut Endu Sabalu Indai Kampung. “Enda meh aku nemu nyaut jaku nuah deh, tak barang ku sida Tutung Lemandau Gendang.”
Udah nya lalu nyaut ga Tutung Lemandau Gendang. Ku iya: “Ti munyi nya deh Ibu, nama kebuah aku enda nerima. Ga endang udah dikerindu, endang utai dikedeka, endang utai dipinta, endang utai digiga. Tang meh Ibu, pinta tampung Serit Lung, nunda Semeriung Kepung Pungkang.”
Lalu nyaut deh Apai Rimbu. Ku iya: “Ti baka chapak endang mindah sarang, endang diatur aku nguai ke orang.”
Udah nya nyaut baru ga Tutung Bujang Lemandau Gendang. Ku iya: “Enti munyi nya, nama kebuah aku enda nerima deh Aya.”
Lalu bejaku baru Apai Rimbu. Ku iya: “Ti nya udah diterima deh anak menyadi, uji padahka meh tegian, mendasan kita.”
“Au meh Aya,” pia ku jaku Tutung.” Tang aku Aya minta punggung kesa, besai enda jejena mesai tekaran. Aku minta taring tengiling Aya, tau kai aning simpai lengan. Aku minta atau tungau, Aya, ngiga iya ke ngeluar daun chapan. Aku minta untak kerengit, Aya, ngiga iya ke bulih sapinggan bulan. Aku minta tanduk nyamuk, Aya, tau kai tajuk tanju luan.”
“Nya endang diterima aku, akan, endang berian anak raja berani,” pia ku saut Apai Rimbu.
MANTAIKA MAIN ASAL
Udah tembu jaku nya, orang lalu melah pinang. Dinga tak perabensak ga anak wuok empeliau arang. Hari pan tawas teringkas siang. Udah nya orang lalu ngeja jantau pulut jentawang. Udah nya lalu makai meh ga orang bedamai nimang lantang.
Agi sekeda bisi begerangi bebuti betundi enggau pangan diri ke jarang betentang, bisi mega nguji pengelandik mantai topik jaku kenang, bisi mega mantai sanggai timang pengabang, kena sida dara lanji betabi jari enggau bala lelaki kaban menimang, kena sida nembiak bekelala ari puting setak ke puting setak rumah panjang. Kena bala sida dara Inja deka bekelala enggau bala lelaki ke negi berani angkat bujang ngichaka randa sida tau betemu dudi ila awakka enda ibuh agi ditanya peneka jadi melaki bini sulu ati idup sekunsi sampai mati lesi midang.
Amat agi belala ninga leka sugi tu. Nya alai enti dipasang orang dalam radio menya, endang amat enda berasai hari nyau udah jauh malam. Taja pia sugi senentang nanya indu tembu naka tu. Dudi ila kitai tau ninga baru ba genteran bukai.
Ulih Telesa Emperan