MAYA melah pinang seduai melaki bini mega dibiau kena minta berekat.
LEBUH orang bisi pengawa begulu berami baka maya begawai baka Gawai Antu, Gawai Umai, Gawai Tajau, Gawai Burung, Mangkung Tiang enggau semua pengerami gaga ati baka Melah Pinang, siti ari penggal atur pengawa orang ke berami nya miau pengabang ke dikumbai orang bebiau.
Biau pengabang tu sigi dipejalaika orang ba pun pengerami, iya nya udah bekau pengabang nyau jenuh udah duduk sereta mega penggal pengawa bukai, nitih atur sebuah-sebuah rumah panjai ke bempu pengawa, tauka orang sepintu bilik ke bempu pengawa, kelebih agi baka dalam pengerami melah pinang.
NGELALU PENATAI
Tuju biau dalam gulu tu kena ngelaluka penatai pengabang, kena merekat sida, sereta bepinta ka pengerai sereta pengelantang ari Petara. Enti iya biau orang jadi melaki bini tauka biau melah pinang, tukang biau nya merekat seduai ke baru jadi ngena jalai biau, beniatka seduai sama panjai begulai, beranak betelesak enggau pangan diri.
Genteran biau pengabang ke dikenaka chuan dalam lambar tulis tu nya siti ari genteran biau ke selalu agi dikena orang miau pengabang ba menua Batang Ai, Skrang, Batang Lupar, Saribas enggau Krian, kelebih agi pati Saribas baka menua Paku, Rimbas, Padeh enggau Layar, sereta semua ai Krian baka Kabo, Melupa, Kerangan, Kawit, Drau, Mapar, Sebubu, Babang, Ulu Krian, Budu, Telik, Awik, Sebelak, Sebetan enggau semua genturung menua Krian ulu, tengah enggau ili.
Tukang biau endang dipilih ari sida ke tuai agi sereta bisi penemu nyadi lemambang enggau teleba bejaku ba mua bala mayuh. Leka biau endang nitih tusun dalam leka sada benyawa baka pengap, renung enggau timang jalung tajapan biau tu enda dikangau baka sada benyawa ti disebut nya.
BEBIAU
Uji kitai sama ninga sereta belajar mimit ari biau pengabang tu.
O-ha! O-ha! O-ha!
Nama ke semetak inggar temekung?
Munyi ke masak chagak bedil kelutung.
Tebah Kemendan Tuan Menggung,
Didinga ari pun Semambu Ngandung
Kunjung-kunjung nyadi benung Tajau Bujang,
Kebungka burung tiung lelaki.
Nama ke semetak inggar didinga?
Munyi ke masaak chagak bedil temaga
Tebah bini Tuan Raja
Didinga ari Singapura
Pansa geruda kapal bekejang,
Ngadap ka leka matahari mati.
Nama ke semetak inggar bemunyi?
Munyi ke masak chagak bedil besi,
Tebah bini tuan Tawi,
Didinga ari tisi langit lati,
Lanji-lanji tengkak sawang.
Ari nya baru aku ngangau ka
Ribai ke datai ari tasik besai
Ledung linang,
Betumpu alau, berimbai ruai,
Enggau Menyalin Bungai,
Tutup Temaga Lawai Bunsu Garai,
Berumah di rantau panjai
Tinggang telesai bungai engkuang.
Ngangau ka Chendung Lempung Pelingan,
Puchung begantung nengah bulan,
Bunsu Bundan, orang tau nangga
Gam gigi gumbang.
Rumbai tu beranak ka Endu Pupu Kebul Bebuli
Tu indu pemadu nama,
Dikumbai Dayang Tekang Mau Tuchi
Rega nengeri siti menua
Beranakka Lulung datai ari
Segupung Ati Tanah
Sembah di kelasah pandan bekuang.
Beranakka Kumang
Nepan di taking apung beluyah
Menyadi Saripah Aka Tuan,
Jadi enggau Sigi Beru Hari
Ninggang kunchi guntur beringgang,
Jadi enggau Sigai Beru Lemai
Ninggang telesai ujan sayang.
Nya orang ngemeran ka batu pesuk
Teman tunjuk jari lima
Ai belambuk ngampuh ke menua.
Nya menua Apai Miga
Betanduk ngena, umba ketapu
Buok galung bauh ngelagetang.
Rumbur ka Sibau rambuk bulu
Menua ampa raya tekebu,
Sebuah tukau bangkung langkau
Menua Lemandau datai ari ngelepau
Gumbang besabung.
Menua pating aur pengerindu
Lendu-lendu maguh ka
Ulu Belimbun Jawa.
Takang buluh ayu ngachuh ka ulu
Putih Menyala.
Nya menua Raja Bangka bedinding ngena
Gumbang menyadi.
Tuan Jandan bedinding hari
Sukadana Bebuli Ati.
Nya betampung enggau menua
Raja Segangga Gunggung
Penyadung Antu Tuah
Berimbai enggau Raja Segangga Ganggai
Penatai Antu Limpah,
Nya jadi enggau Kemeli Kemantan Padi
Diambi mimpi jadi raja.
Jadi enggau Kemelat Tampuk Lensat
Diambi kenyap tinduk lina.
Dia sida mai pengaruh,
Batu lementak bai ngabang
Ngambika tau nyelepak awak
Menua orang.
Batu duri bai ngabang
Ulih nemu di tuki ridan pengerang
Batu pabung mai ngabang
Ulih nemu di lampung tekalung pundang.
Taring uting babi ngelampai
Tanduk rusa mulai,
Gemala panggum tupai
Dibai orang tuai mansang nandai
Selit di punggai puting ilang.
Awakka gayu, awakka guru!
Awakka gerai nyamai!
Raja nguan menua!
Kami minta jalai bidik enggau lansik,
Minta betuah minta belimpah,
Minta gerai minta nyamai
Minta chelap minta embap.
Aku ngangau ka Petara Aki, Petara Ini,
Ngangau ka orang ke lama udah lelang,
Lama udah midang,
Sida ke udah parai, ke udah nadai,
Nya dikangau, ditesau,
Nya aku kumbai, aku lambai.
Nyaup aku ngupas padung, ngupas tilung,
Ngupas panggang, ngupas ruang,
Ngupas penuduk, ngupas peninduk,
Ngupas ruai, ngupas tikai.
Ngambika iya bau rengu, bau garu,
Bau empenit, bau bangkit.
Ngambika endur betunggah, endur besembah.
Ngambika tampak Tuan, tampak Sultan,
Tampak China, Tampak Belanda,
Tampak Laut, Tampak Bunut.
Tu endur besauh, endur belabuh
Endur betanya, endur bepinta.
Ngambika kami mansang, kami nyegang,
Kami ngebung baka langit
Entuchung baka bukit.
Ruai kami baka danau
Tampak meh kami naka pulau
Gayu guru gerai nyamai semua kitai.
O-ha! O-ha! O-ha!
Nama ke semetap munyi ngitar?
Nama ke betengah munyi kapal?
Nama ke semegup munyi bedil?
Nama ke semetup munyi bandir?
Nya nyawa anak raja, nyawa anak uda,
Nyawa anak kerani, nyawa anak mensali.
Orang nya bisi piring lebat, piring sarat,
Nya meri aku ngangau, aku nesau
Nya meri aku ngakak munyi tajai
Ngakak di dan emperawan benang.
Nya meri aku ngembau munyi ruai
Ngembau di tatai panjai nyementang.
Nya meri aku nidit munyi landai
Nidit di punggai mua lubang,
Enda kami busung, enda kami lunggung,
Enda kami tulah, enda kami pimpah.
Ga dikuan aku ditanggam bentuk selung,
Ga kaki aku bediri ngembar ruit pendawan.
Pala aku dibiau selanjau ijau manuk sabung
Dada aku luak tata minyak ai juyung
Ga aku baka paku besurung gelung
Baka tubu besulur rebung
Baka penduk betampung puchuk
Baka tali betampung wi
Baka tengang tampung belembang.
Baka rutan tampung danan.
Kami ngangau ka orang lama parai
Lama udah nadai
Ngangau ka orang ke lama udah midang
Lama udah tumbang.
Tinggang batang tebelian wi.
Ngangau ka orang lama udah nadai
Kena keranjai indai imbuk kedidi
Orang ke lama udah rentap langgar urat
Dandi lelaki.
Orang lama udah suyak tinggang karak
Kepayang padi.
O-ha! O-ha! O-ha!
Kita ke dalam tanah nyenguk naka punggung
Kita ari langit nilik naka rekung
Kita ari ili mudik sebuah bangkung
Kita ari ulu undur sebuah barung.
Kita ngabang piring rendai, piring salai
Kita ngabang piring asi, piring tumpi.
Enti kita bela udah datai, udah nyeluai,
Enti kita bela udah betugung, udah betembung
Dia kita duduk di tikai wi, tikai peradani.
Tikai pandan, tikai rutan.
Nya kitai empuru makai kapu
Kita beranggap, kita nginsap
Tang kita udah makai rendai, makai salai
Kita ngabang, kita mansang
Kita mai ubat serangkap genap
Mai pengaruh kambuh tubuh.
Nya baru ninggalka batu remaung
Ulih nyamah di parung tingkah tebiang
Nya baru ninggalka batu ratai ka Simpurai
Ulih nyamah di ratai buluh temiang.
Nya baru ninggalka batu pama ke lalau lamba
Ulih nyamah di keresik lansar didendang.
Nya baru ninggalka taring tengiling ka Keling
Dua meling, lapan bekumbang.
Nya baru ninggalka penyelinting
Sangking di tunjuk jari butang
Nya baru ninggalka basilar
Tangkai ka di tandan bau nuking.
Nya baru ninggalka kebal tutup
Nangkup ka adup ruang belakang.
Nya baru ninggalka lansik bidik
Ka betuah enda langkang.
Nya baru ninggalka batu padi
Kebayan puli di mua tibang terentang.
Meri nuan seharitu
Baka batu lulung umbak
Meri nuan seharitu lelijang.
Baka pisang lulung tambak
Nya baru aku nepan di batu bulan
Ngambi suman nguan menua.
Nya baru aku manggai di batu chanai
Ngambi gerai selama-lama;
Nangga sintung, nangga rabung
Nangga awan, nangga bulan,
Gayu guru! Gerai Nyamai!
DISIBUR
Udah bekau ke miau, nya tukang biau lalu disibur orang ke nyibur ai ngena ai tuak. Nyadi sibur ai tu kena meri terima kasih sereta mega kena minta berekat ari Petara ngichaka biau nya ngasi didinga lalu peminta iya nyadi nyata segenda dipeda mata dua semua mensia mayuh ke betugung bebala memagang.
Mensia mayuh ke begulu ba endur nya pan sama kena sangkung biau nya tadi kelebih agi dalam peminta ngagai Petara tentang pengerai, pemandai, pengelantang, penyenang sereta mega peminta pasal bala mensia ke tampak dipandang sereta dipeda Petara ngichaka semua sama mudah bulih jereki, bulih tuah bulih limpah.
Nya meh kebuah, lebuh ke miau pengabang, lemambang biau nya megai manuk sereta miau mensia mayuh ngena manuk nya ngichaka semua sama kena sangkung dalam leka biau enggau sampi nya.
Oleh TELESA EMPERAN