![](https://utusansarawak.com.my/wp-content/uploads/2020/08/1.-crowds.jpg)
![](https://www.utusansarawak.com.my/wp-content/uploads/2020/08/1.-crowds.jpg)
BERUPAI sama pedis. Kada enda sama patah kaki. Baka nya ku gaya dua iku indu – nyengkaum siku ti agi bedau ngeleda ari luput – ti ditaban kaban sida ngena kerita pangan sida ngagai sebuah rumah enda jauh ari Tabuan Jaya ujung bedau lama ke udah.
Nama kebuah tau nyadi baka nya? Munyi rita ari padah bala kaban sida ngagai Sada Sarawak seduai nya sebagi ari bala raban kampar ti terejun rari ari siti rumah ringkat dua di Batu 13, iya nya rumah alai sida diau.
Bala sida ke rari nya ukai rari ari polis tauka bala Imigresen tang rari ari tuke ke ngurung sida ba rumah dua ringkat nya.
“Semu tiga iti pintu dikunchi tuke ari luar magang. Bala kami nadai ulih pansut ngeripot tauka ngiga pemakai. Duit pan nadai, laban bisi semak dua bulan udah nadai diberi gaji ulih tukay ke mina datai nganjung pemakai mimit alai kami diau,” ku Renie (ukai nama endar) nusui ngagai siku pengari bejaku ke nampung berita tu ngagai Sada Sarawak apin lama. Renie, ku, pengari bejaku nya gawa ba siti kedai kupi di Batu 13. Kedai nya siti ari kedai ke ngambi bala kampar tu gawa.
NADAI PEREMIT GAWA
Iya madah ngagai pengari bejaku nya sida bisi ngembuan paspot enggau ‘ketepey’ (kad pengelala menua Indonesia) tang nadai peremit kereja. Sida datai kitu ngena peremit nemuai tauka peremit sosial aja.
“Tegal nya bala kami enda berani ngeripot penanggul kami ngagai polis tauka sebarang opis bekuasa, laban takut ditemu orang gawa nadai peremit,” ku Renie, siku ari raban bansa Dayak di sepiak sempadan kitai menua tu enggau Serikin.
Kaban iya dua iku ke sama pedis nya tadi malam hari apin lama tu tadi terejun sama enggau orang bukai ke diau ba rumah nya nengah penjan. Seduai munyi ke sama terengkah ba semin lebuh ke terejun nya. Kaki seduai sama balat pedis tang engka enda patah.
NADAI DOKUMEN PENGELALA
Renie madah sida enda berani ngemai seduai ngagai sepital laban nadai dokumen ti ngena. Lebuh ditanya apin lama, orang empu rumah alai seduai diau nya madah seduai udah dibai bala kaban pindah ke bukai taja pan kaki seduai sama agi kembai tang engka nya udah ulih bejalai. Kebuah ke pindah nya laban takut digiga ba endur nya ulih tuke sida.
“Bala kami takut bendar ka tuke nya, laban chukup jai enggau kami,” ku Renie munyi ke ditusui siku pengari bejaku nya.
Nyadi bala sida tu sebagi ari bala kampar ba sebelah menua kitai di Sarawak ditu ke endang bebendar ngiga alai gawa, enda ibuhka diri nadai dokumen, lalu enda entu nangika diri ditemu perintah sereta diberi ukum nyengkaum jil enggau ukum lunsin (ungkup lelaki aja).
Kitai endang suah udah ninga sereta mega bantai berita pasal penanggul mayuh kampar di menua Sarawak, kelebih agi di nengeri besai, sigi udah nyadi siti penangi ka bala mensia mayuh. Taja pan perintah Malaysia ninggang sida enggau ukum berat, ulah ngampar nya majak nyadi -senyadi.
BALAT DIKENANGI
Tebal agi bala rayat di Sarawak balat nangika penatai bala kampar tu, kelebih agi nangika sida ngereja ulah jenayah.
Surat berita di menua tu udah suah mantai ripot pasal bala Raban Sambas enggau Singkawang ke ditangkap sereta dukum ngereja penyalah jenayah sida baka ulah ngerumpak beraban enggau ngereja penyalah jenayah bukai.
“Sida nya ngena awak datai ngampar ngagai menua kitai ditu lalu ngereja penyalah ke alai sida tau bulih jereki besai lalu lengkas mulaika diri ngagai menua sida kin lalu jadi kaya raya,” ku siku pemesai polis dulu suba ke enda ngasuh nama iya ditulis ditu, sereta ngena chunto rumah siku penulung menteri ke diserungkai lalu ngujungka duit ti chukup mayuh dichuri sida perumpak nya, ke endang ditemu ngena modus operandi selalu dikena bala kampar.
“Taja pan perintah Malaysia endang bisi ukum terit kena ngukum bala orang ti ngampar nya baka meri ukum ti berat nyengkaum ukum lunsin enggau ukum jil ngagai bebulan-bulan sereta betaun-taun, bala kampar nya endang nadai ngasika nya sereta enda jera, kelebih agi sida ke ngarapka diri bulih jereki besai datai ngagai menua kitai kitu.
“Tebal agi sida nya nadai takut mati, lalu sampai berani ngadai nyawa sida ngulihka jereki besai baka nyerungkai rumah orang kaya mayuh reta mudah ditaban rari ulih sida nya, lalu ngena awak sekali nya tau nyadi tuke besai ba menua sida din enti mujur enda ditangkap perintah menua tu,” ku pemesai polis nya ke dulu suba bepangkat ASP (Asisten Superintenden Polis ).
DITANGKAP NGAMPAR
Iya mega madah sekeda ari sida nya ke udah dukum perintah ditu lebuh ditangkap ngampar tauka datai kitu nadai ngena pas enda takutka ukum nya lalu bisi ditemu datai baru kitu ngena nama enggau pengelala bukai.
“Siku ari sida nya (lelaki bansa Indonesia) bisi ditemu litan lunsin ba burit iya lebuh ditangkap baru ngampar di Sibu. Kedua kali iya ditangkap nya, nembiak nya dukum jil enggau lunsin dua kali,” ku pemesai polis dulu suba nya madah.
Reti nya, taja pan udah diletak ukum berat baka lunsin, agi mayuh bala kampar nya datai ngagai menua kitai ditu tegal deka ngena awak nya ngiga jereki jampat baka ngereja penyalah ngerumpak enggau jenayah besai bukai. Bisi mega sida nya datai kitu nengah jalai tikus ari mayuh jalai masuk ba sepemanjai entara menua tauka sempadan baka di Lubok Antu, di Lachau, di Serikin, di Entikong/Tebedu enggau sekeda jalai bukai.
“Tang enti sida nya datai kitu laban deka ngiga pengawa nadai kitai tentu irau, laban sida nya ngiga pengidup ba menua kitai. Sida pan nadai ngachau kitai. Keba mayuh endar bala sida ke merinsa dijamah bala orang ke alai sida gawa di menua tu,” ku pemesai polis dulu suba nya madah.
TETAP ENDA PATAH ATI
Nyadi laban empa pengeran ke gawa ditu, bala raban kampar ke rari ari Batu 13 nya endang tetap enda patah ati, laban berundingka pemanah jereki ulih sida ari menua tu. Sida nanya abis teluput-luput rarika tuke laban udah nadai ngayan penyiru ngagai sida.
“Kami nyau digaga lebih ari ngaga jelu. Dah ukui tauka mayau kitai nadai ngimbur enggau ai angat, anangka mensia. Ulah ke ngasuh kaban kami siku balat lukus nya ukai ulah kitai mensia. Taja pia, kami enda berani ngeripot laban takut kena tangkap tauka ditemu tukay jai nya,” ku Renie madah ngagai pengari bejaku ke udah nya nusui ngagai Sada Sarawak.
Dia kitai meda, jurai ditu nya pasal dilemma sida ke amat keran dalam pengawa sida enggau penyai sekeda tuke ke ngambi sida gawa. Dalam kes baka tu, penangi sida ke datai ngampar ngagai menua kitai ditu nya lebih ari kitai ke nangika penatai sida, laban sida nemu mayuh amat penanggul ditapi sida lebuh ngampar tauka datai enda beradat ngagai menua kitai ditu.
Ambika banding sebedau atur mindah betagang (MCO) tu tadi bisi 71 iku bala sida datai belalai nya bisi kena tangkap di pelilih menua Kuching ditu ba siti pengawa begiga. Sida tu ditemu ngelanggar atur Opis Imigresen baka datai belalai, gawa nadai kemendar (peremit) tauka diau di menua tu ngelui timpuh pas nemuai sida.
Taja pia, bala sida nya endang enda patah ati, lalu keran datai taja pan betapi enggau mayuh penanggul ba menua ditu. Penangi sida alah laban pengeran ngiga jereki ba menua kitai tu. Sida tetap datai taja pan nemu menua kitai tu mayuh taju remaung ti enda tau dambi sengapa enti takutka ditegam remaung.
Ulih TELESA EMPERAN