![](https://utusansarawak.com.my/wp-content/uploads/2020/12/8.-bala-gagung.jpg)
![](https://www.utusansarawak.com.my/wp-content/uploads/2020/12/8.-bala-gagung-1024x768.jpg)
PENGAP GAWAI BURUNG
Dulu ari tu penulis kala bekunsi enggau bala pemacha sekeda leka main kitai Iban.
Nyadi sekali tu kitai sama meratika pemanah leka main Pengap Gawai Burung nitih penemu sekeda lemambang ti digumpul penulis ditambah mega enggau sekeda bup ditulis orang tuai kitai dulu ari tu, nyengkaum niang Benedict Sandin.
Sekali tu kitai bekunsika leka pengap Gawai Burung ba senentang genteran Lemambang Kesulai ngambi Aki Lang ngabang ngagai gawai anak mensia munyi ti entudi tu.
LEKA PENGAP
“Deka nuan diasuh aku ngambi Sengalai Lai Muking?”
“Enda ninga aku,” pia ku aka Bunga Nuing.
“Enti diasuh nuan meling sukung manding, mutai ditali jingan berempam tubuh ramping. Aku nganjung tatau isah kingking, ngagai tengah laman Kayang menua Ping. Datai din ila aku entiring gunting ngempurung aji.”
“Deka nuan Pungga diasuh ngambi nandai ngabang ngempa?”
“Oh enda! Jingan rumpang tubuh bela, aku tu tau diasuh ngambi ngempa. Enti diasuh nelan lungga kiril sepagi, jingan ngempan tubuh bela, seraya aku nganjung tatah isah tempa, datai din ila, aku rasa ka disunga nisi dai.”
Udah nya datai temuai seiku-seiku, datai temuai duduk lemunuk-unuk. Datai Kesulai Tandai melan-melan, datai Lelayang Rangkang Hari Ujan.
“Deka nuan, enti aku ngasuh nuan ngambi Aki Lai Nyakai?”
“Enti kita ngasuh, dini aku tau enggai. Tang nganti aku nanya indai aku, Pinggai Tuai Retak Seribu. Nganti aku nanya ibu aku Balang Undang Pengalu Antu. Nganti aku nanya apai aku Setawak Rarentak Puting Lanting, enggau menyadi aku Chapak Burak Besiring Kuning. Sekali aku nemuai ke Batang Engkari. Din aku diberi orang makai jani, ditu mulut bedau gelinying lichau. Sekali aku ngambi ubat ke Lenggai Serembat, din aku nginsap, ditu ngeluaka asap bedau semakau.”
“Enti pia tebang lengkan berangan ujan, nyaduh nuan betubuh bepasuk ngepan, berau nuan nyampau sekali nyepi, garam nuan ngenggam sekali ngerami.”
Simun mutun di daun, nuan ti diasuh ngambi ngabang, nyaduh betubuh beradu nurun.
Nurun tangga laka umbas endur belanda bentang lang, mansa rumput enda berenyut nemu batu silup ular kendawang. Mansa ai enda beremunsik nemu batu pari tegar merenang. Mansa lebak meda baya empekang punggu, nengah emperan meda sengayan beduk jugu. Baru sulur titi meda jani duduk sugu, nengah tinting meda baning baum betelu.
Nya baru Kesulai manggai di pun kara jangkit, terengkah di batang purang kunyit.
Nya baru iya meda subak ladu burak tampak betau-betau. Meda serungup lubang batu baka balun langkau kayau. Nya tengah lama wa genalu ribut bepuput balat udu.
“Nama penatai nuan seiku-seiku, nama penatang nuan gunu-gunu?”
“Aku tu baka duku patang minta tampung, baka beliung simpak minta labung. Sigi adat wai bejuung-juung, sigi chara betampung-tampung.”
Mentikar rampu akar, nyaduh betubuh beajar-ajar. Deka ngambi ngabang, tapang anang nguyang ningkarka dan.
Mansa bukit anang numbit, enggaika terempit nyadi emperan. Ari nya pawas rapi balas.
“Nuan pia ga, mansa bungkung, anang ngabung inggap nepan. Mansa ranggar punai anang nyapai nyimpanka serangan. Bumbung ribut nyabung terengkah ba tanjung sengkilung panga, renjung-renjung baka tangkung senyala janji. Beunsai-unsai ribut lemai ngempaska pantai radai baya.
Ludai-ludai baka kerekai dunjung padi. Segantuk ribut muluk mangka teluk sarang kebura muna, kering kerubung, lemah tajam tisi. Temulang-ulang ribut nyegang mangkaka tapang lalau lunsa, diturun sempun indu api. Ninga nuan Bujang Pedang ke mensiang sabang entara rumah dua. Dia deh pending iya jampat ninga, mulut sempat ngerara.”
“Nama utai tak beguntam munyi riam gu bala? Nama utai tak berauh munyi apa? Abas iya kulu sepuntang nyala. Abas iya kili sepuntang nuba.”
“Kada enda munsuh ngunja menua. Kada enda antu bala Raja.”
Engkilili rambau nyadi, nyadi betubuh belatur rari. Jamah iya peredah tinggal beliung, japai iya duku tinggal sarung, jengkau iya seladau tinggal ladung.
Dia iya rari enda tetikika rumah diri, iya niki rumah Lai Tuntung Engkerawai Meratai Punggung, iya niki rumah Lang, panduk ranggung, mau ngemburung.
Datai di tikai lalu melintang gali, datai di ruai lalu duduk melepi.
“Lapa latak bedau melinak ba tapa kaki? Lapa peluh bedau ampuh nisi dai? Peluh belakang tau endur enseluang mudik betanjak. Peluh dada tau endur indu dara nyunggaka anak.”
“Eh bisi munsuh nya dia, bala Raja, antu nya dia enda baka-baka.”
“Eh bula nuan akan pemadu iya. Banggar nuan baka gentar mangkang nanga.”
“Nama pemula nya aya. Enti babang bala Nanang enda aku rari ka pedang lantang di suran. Enti betimbak enggau orang sepiak enda aku nginsitka chagak mua meriam.”
Ada begemung ribut nyabung ngempaska tuchung sanjung besinjang.
Beunsai-unsai ribut lemai mangka tatai radai isang, lalu deka danjan deh kayu rian, kapa deh iya danjan, ngasuh buah iya berabinan baka kaban kera rai. Berulang-ulang ribut nyegang mangka tembawai madang pinang bebuah baka chinang mansau tisi.
Muput ga ribut enda badu-badu mangka bena enda leju-leju. Sapa nyapi memuri enggau igi mujau? Sapa nyiratka ingkat enggau tekalung lumau? Enti alun jaum dibai aku nguja menua, enti orang raja dibai aku bemunsuh diri sebala.
Tunuka bulu mayas chapan, lantarka alu lamba tebelian. Bedau ga ribut bepuput enda badu-badu. Bedau ga bena mangka enda leju-leju. Lang Julak ba puting setak nganu sida nembiak bepeluh rinding. Lang Jagu belanda niti tanju nganuka sida ke indu ngating pengering.
Udah nya kesai deh ati Dara Sentaba asai ke sengkan sangka butang, asai ke ngetau padi tangkai becheringai bintih burung lelayang.
PENGINGAT MAYA GAWAI KELIA
Nyadi bakanya meh munyi pengap bala lemambang gawai burung ba genteran ngambi ngabang munyi ti udah disebut ba pun tadi. Penulis kala enggau gawai tu maya umur urung 17 taun menya tang kurang pengingat tentang tusun pengawa gawai.
Taja pia, pengingat penulis, gawai ba rumah sida di Kawit Lalang kelia amat ngerinduka ati kelebih agi bala kami ti angkat bujang bebendar amat ngining bala sida indu dara ti serambau, nyengkaum sida ti sama enggau begulai sekula. Orang tuai balat kiruh enggau pengawa begawai lalu nentuka pemakai enggau utai irup chukup magang. Kami ke nembiak gagit betundi diri sama diri lalu nadai berundingka atur enggau tuju gawai.
Nya amat enda tentu ngena tang sapa ti ulih ngerara bala nembiak begulai enggau pangan diri dipeda bala mayuh, nadai belalai. Betundi enggau manah lalu bekunsi penemu enggau pangan diri.
Diatu gawai tu jarang bendar dintu orang laban bala lemambang pan nyau nadai agi. Taja pia, aku ngarapka bala kitai sama bekunsi penemu meratika pemanah tusun pengap lemambang. Ngarapka kitai bela gerai, bela gayu….oohaa.
Oleh TELESA EMPERAN