![](https://utusansarawak.com.my/wp-content/uploads/2020/12/Slug-rotan2-1.jpg)
![](https://www.utusansarawak.com.my/wp-content/uploads/2020/12/Slug-rotan2-1.jpg)
BINTULU: Bansa Dayak Iban endang udah lama dikelala enggau pengawa begagaka handikraf kelebih agi iya ke digaga ari rutan.
Ari penyelai kereban nyentukka ngagai tukuh asal ke nyata mandangka identiti bansa nya nambahka rega sesebengkah produk nya.
Gaya ke endang bisi nya nyadika temegah ungkup raban bansa Iban nyentukka suah dipilih orang luar diambi nyadi buah jari.
Menti Bujal, 66, siku indu bansa Iban ke diau di Rumah Antau Nabau di Sungai Sekabai,Ulu Sebauh di Bintulu, nya siku orang ke mengkang mekuh pengawa begagaka handikraf bepelasarka wi tauka rutan.
Ungkup orang ke diau di Kandang Menua Sebauh, rutan suah nya disebut wi dalam jaku orang ditu.
Lebuh ke dikerandau Utusan Sarawak, nyata amat pengagit ati Menti lebuh nyerita bekaul pengawa iya begagaka handikraf rutan baka bakul, lanji, sintung, enggau ke bukai.
PRODUK DIBANTAI DI RUAI
“Sebendar iya, aku berengkah begagaka handikraf tu lepas Biro Indu rumah panjai ngatur siti program ke ngembuan tuju nambah sereta ngansah pengelandik begagaka handikraf.
“Naka ke diatu, aku enda nyual produk-produk ke bisi ketegal aku enda nemu chara bejual.
“Nyadi, pekara ke digaga aku nya mantaika semua produk aku diruai ba mua bilik aku maya pengerami tauka program ke ngaul orang luar,” ku iya.
Menti madahka, proses begagaka rengka ari rutan ngambi timpuh antara dua nyentukka tiga mingga indah sampai sebulan, bepanggai enggau tukuh enggau pemesai sesebengkah produk.
Seraya nya, ku Menti, kereban ke beguna amat udah meseti nya rutan ke alai iya madahka rutan nya diambi iya empu ari kampung.
“Suah iya kami (peranak rumah panjai ) ngambi wi tu di kampungbegulai enggau orang bukai.
“Udah nya kami, begagaka wi sebedau ulih digaga nyadi kereban baka bakul, tang enti aku, aku suah ngaga tu lebuh maya lepa,”ku iya.
Ku penerang, rutan tauka wi nya dibagi ngagai sekeda bansa iya nya wi sega, wi batu, we lia enggau ke bukai.
Ku Menti, bida wi nya ulih dikelala nengah meda chura.
Rega produk ke dijual ulih Menti nya nitihka pematut iya nya antara RM40 ngagai RM70 seraya tikai rutan manggai ngagai RM400, nitihka pemesai iya.