KERA Gitang diasuh orang bejaku pasal ibu indai Kera enggau Manang Balie.
DULU ari tu kitai udah ninga pasal indai Kera seduai Manag Balie ti labuh beberap ti alai indai Kera lalu luput. Mimit da deka ninggang tudah Tekura ti tinduk lalu ngujungka iya tedani ninga seduai ti meredup labuh. Dia Tekura nanya sekalika seduai ti labuh nya tegal belaya.
“Ukai belaya kami duai tu tadi Buat…berubat. Tang lebuh iyang aku datai, indai orang tu tekenyit lau luput tegal kelalu kesal ati. Meda iya luput lalu diberap aku. Nya kebuah kami duai tadi tak beberap peda kita,” pia ku Manang Balie.
Nyau kelama sida ke ngidupka iya, nya baru indai Kera ngeleda. Taja udah ngeleda, tang lama enda tau bejaku. Bini Manang Balie pan sama enggau orang begau kia. Apin seduai nya ke labuh, iya enda nemu Manang nya ngubat indai Kera di puchuk kayu din meda lupung iya enda dibai. Nya alai iya lalu nanya: “Kati ku nuan berubat, lupung enda dibai. Nama utai ke dikena berubat?” ku iya.
“Ukai nya semina dalam lupung utai ke dikena berubat. Semadi belian, nya baru begunaka utai ke bisi dalam lupung,” pia ku iya nyaut bini diri.
Bini Manang nyau majak sangka pengawa Manang nya bisi enda tentu enggau indai Kera, laban iya nemu bagak laki diri. Nya alai iya lalu bejaku baru: “Nama kebuah enggai enda di puchuk kayu din berubat, lantang meh di tengah tanah tu,” ku iya bejaku mai ati pedis.
“Datas baka di baruh tu meh. Sama penemu nya ti dikena berubat,” saut Manang. Indai Kera apin dapat nyaut, agi natka pala ke tepangka ba bandir. Bini Manang nya majak enda lantang ati meda ulah seduai bakanya. Ati iya endang deka nekanka seduai nya butang, laban indai Kera nya nadai agi laki – benung baluka niang apai Kera.
MANSUTKA BUTANG
Ati udah kelalu pedis, enggi tudah bini Manang. Nya meh ti ngujungka iya lalu ngempuruka orang mayuh ke betatan ba midan nya. Udah bala sama sampal datai dia, baru bini Manang bejaku.
“Nyadi aku ke ngempuruka kitai mayuh ditu, laban bisi utai ke balat bendar ngasuh ati enda lantang, lalu penusah nya nguyum ba ati enti apin dikusaika ba mua kitai bala tuai mayuh ke ditu. Utai ti ngasuh ati tepekul sereta malu nya ketegal pengawa aya Manang kita nya enggau indai Kera. Kitai mayuh sama udah meda ulah seduai ke labuh tu tadi. Nya alai enda ibuh aku madah, kitai tentu udah nemu belabaka pengawa bansa nya dalam ati diri. Ari nya aku ke ngempuruka kitai mayuh tu mansutka seduai tu butang,” pia ku bini Manang Balie.
Ninga jaku bini Manang munyi nya, dia Makup lalu bejaku. Nya alai ku iya: “Pengawa seduai tu pemadu salah, laban kitai mayuh ke datai begempuru ngagai midan tu saritu deka milih sapa ke tau nyadika tuai ngempung nembiak mayuh ari pupu raban bansa ke dalam pulau kitai tu. Nyadi indai Kera seduai Manang tu tak ngaga ulah ke enda menyana ba mua kitai mayuh, nya alai ba penemu aku, seduai tu patut ditinggang adat.”
Sereta ninga jaku Makup munyi nya orang bukai mayuh bendar bejaku madahka diri besetuju enggau penemu Makup nya. Bala tuai bukai sama ditanya magang. Sekeda madahka jaku Makup nya kelalu kasar, tang enda ga madahka penemu diri pasal atur ke patut kena mutarka pengawa indai Kera seduai Manang nya. Bisi sekeda madah diri nadai penemu, tang nitihka atur ke patut ku jaku mayuh.
Ninga jaku bala nadai tentu bebatang munyi nya, ari nya Tekura angkat lalu bejaku.
“Penemu bala kitai mayuh udah didinga, tang nadai udah nyemetak nampung jaku punggal Makup nya tadi. Nya alai ku penemu aku, apin kitai mutuska atur pasal seduai ke dikejakuka tu, kitai patut mendingka penemu ari bakih Kera Gitang, laban indai Kera nya raban sida,” pia ku Tekura bejaku ngagai bala mayuh ke dia.
“Ngena nya punggal. Enggai nyadi ga enda mendingka penemu tuai sida empu,” ku Gajah. Kaki lalu dienditka iya ba menalan nya. Berenyang tanah dia laban iya.
“Anang kelalu bechakap punggal, ukai ka belaya kitai ke begempuru ditu. Enda nyamai kami ke datas tu kena rentak kitai ke di baruh nya,” ku Ingkat bejaku ari dan anak raras di tisi midan nya.
“Enti ka bejaku, nurun ngagai midan kitu meh, anang baka orang ti mit enda nemu reti orang baum,” pia ku Jelu Padi Baru ngerara Ingkat.
“Eh ari tu pan didinga meh jaku. Enda tan idung ensium utai balat endar bau di baruh dia,” ku Ingkat nyaut Jelu Padi Baru. Pedis bendar ati Jelu Padi Baru disindir Ingkat bakanya. Tang bisi ati mandangka pengeringat diri, enggai nyadi laban endang bisi jaku tangkan enda ngasuh belaya sekumbang ke begempuru ba midan nya.
“Gamal ke ngemit nya deka lebih-lebih bejaku. Apin dipulas ke udah bekalih rekung,” ku jaku Jelu Padi Baru mutap kediri di tisi midan dia.
NGASUH KERA GITANG BEJAKU
Sida bala mayuh majak ngasuh Kera Gitang bejaku. “Enda diasuh pan endang deka bejaku ga aku, tang nganti kita bukai nya udah magang,” ku Kera Gitang.
“Nya alai pasal ibu kami nya enggau aya Manang, enggai nyadi kitai ngumbai pengawa seduai iya butang. Kebuah aku munyi nya, laban kitai nadai terang meda seduai beulah-ulah. Semina utai temu kitai meda seduai sama labuh beberap. Nya alai ku penemu aku, nadai jalai ngukum seduai pasal nya,” bakanya ku jaku Kera Gitang.
Lebuh Kera Gitang ke bejaku nya, Jelu Mirah seduai Jelu Padi Baru betelai di tisi midan ngenang diri ke meda ulah Manang Bali ke nguda indai Kera nya di puchuk kayu din.
“Enti orang ka ngiga saksi, aku deka madahka utai ke ditemu diri pasal ulah seduai nya,” pia ku Jelu Mirah bejaku enggau bala kaban bini Manang Balie. Ninga jaku nya, bala bini Manang nya lalu madah ngagai iya. Bini Manang lalu nukuka jaku Jelu Mirah nya.
“Amat, ukai semina aku meda ulah seduai ke di puchuk kayu din tadi. Punggal Jelu Padi Baru nya bisi meh meda,” ku iya.
Nya alai ninga penemu tak bebatang munyi nya, ari nya bini Manang lalu bejaku madahka diri ngambi saksi.
“Tau enti deka ngambi saksi. Tang apin mansutka saksi, kitai enda tau enda ngiga sapa orang ke endang bisi kuasa mutuska pekara tu. Enti kitai semina bebelitka jaku, nadai guna. Apus hari, enda meh tau putus teputar. Barang ke endang deka bejaku, endang digiga utai ke ngasuh bebelit,” bakanya ku jaku Tekura.
“Nya amat,” ku sida bukai. “Tang sapa kitai ditu ke nemu mutuska pekara tu deh?” ku sida.
“Ku penemu aku, nadai orang bukai kelimpah ari ‘Jui’ nya. Iya nya endang orang ngemeranka adat, megai batang undang-undang,” ku Tekura nunjukka Pelanduk.
“Enti munyi nya, padahka meh saksi ngambika bejaku awakka pengawa jampat teputar,” ku bala sida ke dia.
JELU MIRAH NYADI SAKSI
Bini Manang lalu madahka Jelu Mirah nyadika saksi iya. Iya pan sanggup, nya alai Pelanduk lalu ngasuh iya nusui naka utai ke ditemu iya pasal pengawa indai Kera seduai Manang Balie nya tadi. Ninga orang ngasuh bejaku, ari nya Jelu Mirah lau nusui semua utai ke dipeda iya pasal pengawa Manang ke ngurut indai Kera. Nyentukka ulah Manang ke beperukka indai Kera ditusui iya magang.
“Pala dikempuk, jari diperuk, tunjuk dibatak, kechiak disilak, perut diuntus, dada dipurus. Tegu di kuyu, paut di dagu, keremuk di rusuk, sagamka punggung, tangkap di urat penatka patung, gau ka kanan, gamaka kiba, peda tudah indai Kera enda nemu utai bakanya, kual kakal baka ke disintak amba tali temeran,” pia ku jaku Jelu Mirah nyerita utai ke udah dipeda iya.
“Enti kita enda arapka aku, nya punggal Jelu Padi Baru nya, tau tanya. Kami duai sama bisi meda,” ku iya.
Sida lalu nguing ngagai Jelu Padi Baru, nanyaka pengamat utai ke ditusui Jelu Mirah nya tadi. Amat magang ku iya, laban seduai sama beratika gaya Manang Balie ke ngubat indai Kera nya ku jaku.
Nyadi lebuh seduai ke beurut-urut di puchuk kayu nya tadi, dia indai Kera seduai Manang Balie endang bisi jaku sempekat. Laban nyau kelama ke berandau sambil beurut-urut nya, dia seduai sama nadai utai dipelalaika pangan agi. Jaku udah tembu, runding udah tekuing sama deka sekunsi jadi begulai.
“Nyadi aku ukai ka mantaika pengawa pangan, tang laban kena tanya, nya alai nusui utai ke ditemu diri,” pia ku Jelu Padi Baru.
Naka tu aja dulu. Kitai ngelengka cherita tu awakka ditampung dudi ila.
Oleh TELESA EMPERAN