SIBU: Ketegal ringat laban dirara enda ngena penutup mulut enggau idung, seiku indu ngau staf farmasi ba Jalan Kampung Nyabor kena Hari Enam ke udah.
Taja pia, ulah iya ke baka nya meri penusah ngagai diri empu laban iya enda nitihka SOP Atur Nyaga Pejalai Maya Nyuman (PKPP) sereta diukum RM1,000.
Ku Kepala Polis Pelilih Sibu ACP Jonathan Ringgit, siti video viral di laman sosial mandangka suspek, 48, nganu seiku staf ba mua kaunter farmasi.
“Ari gambar ke dirikut dalam video nya polis bejalaika pengawa nasat sereta mujur nangkap suspek.
“Ari asil pengawa nasat maya penusah nya nyadi urung pukul 4.20 ngalih hari, staf farmasi ngerara suspek ke tama ngagai premis nya enda ngena penutup mulut enggau idung.
“Suspek mega ringat lebuh iya dikangau ngena nama ‘auntie’ ke ngasuh iya belaya enggau staf farmasi nya.
“Pengudah staf farmasi nya ngaga riput polis, suspek mujur disidi,” ku iya lebuh meri penerang ngagai pengarang berita kena Hari Satu ke udah.
Ku Stanley, ari asil pengawa nasat, suspek ngasaika diri enda puas ati dikangauka ngena nama auntie.
“Kelimpah ari nya suspek mega ngaku bisi insomnia (penyakit enda ulih tinduk maya malam hari).
“Maya ditanya, suspek mega jampat amat ringat sereta ketawa kediri empu lalu pengudah bejalaika pengawa mansik lebih silik agi suspek mayuh amat ngaga riput polis kegetegal belaya,” ku iya.
Ku iya, suspek ditemu ngaga penyalah nitihka Peraturan 10 Peraturan-Peraturan Pencegahan dan Pengawalan Berjangkit (No.8) 2020 laban enggai nitihka SOP PKPP.
“Suspek ke udah diterangka senentang penyalah ke udah digaga iya nadai ngembuan rikut jenayah lama diberi timpuh 14 hari mayar kompoun ba kaunter KKM Sibu,・ku Stanley.