Tusun Ke-4
Dalam minggu tu kitai deka macha sereta belematika sebansa litaricha sanggah-dilah bansa Iban ti dikumbai “Jaku Sebar”, nampung iya ti udah dichelak dalam Tusun Ke-3 ti dichelak dalam minggu dulu tu kemari.
Jaku Sebar dikena besabi enggau nunduk-ensuruk ketegal penyilap, pengilap, penyaru tauka penyalah mulut ti udah kelelanjur sebut, penyalah dilah ti udah telansur telah, tauka ulah jelekah ti udah bisi tekelanjur dikereja ti tepediska orang ke alai besabi tauka alai minta ampun nya. Iya ke bepenyalah nya ukai semina besabi enggau minta ampun ba ujung mulut aja, tang mega ba ati enggau pemereti. Iya nyanggup diri diukum tauka ditunggu nitihka pematut taga dalam undang-undang, tauka enggau atur tuai amat ga penyalah iya ti udah nya enda disimpan panjai-sepanjai jadika dengki enggau dendam.
JAKU SEBAR MINTA AMPUN
Nya alai pengawa kitai ke beseminar ditu
Dalam endar tuju, besai endar reti ba anak-uchu
Kitai ke jemah ila;
Laban enti kitai enda ngering
Baka aping nyadi jerungkang;
Tau kitai ila puntan nunda jelan jalai jelu,
Balang nunda pedang nadai ulu,
Tunsang baka lelanjang nadai ketapu.
Nya alai enggaika lebu
Sida Aki Buku Tebu begerah nunu
Enti kitai ke tu bela malu nunchulka sempun;
Lebuh sida Apai Beketan Manju begaga bubu
Enti kitai ke tu malu nirika tampun
Enggaika tak puntan tuju dih
Sida Tan Sri Jabu ngaduka tunggu
Enti kitai ke tu tak semua malu ngambi ukum.
Laban nyau munyi ke suah
Betanduka jaku ti udah ngelamatu:
Enti gendang kitai tu manah terantang
Tentu lantang sida ke nembiak
Ngaduka singkang jalai berayah;
Enti pencha kitai tu ngena
Tentu nyamai sida ke nembiak ila
Angkat nunda terus muka bunga sembah;
Enti perejuk kitai tu nyentuk
Sida ke nembiak ila pen
Nyamai ga tak ngelanduk angkat ngelangkah;
Enti puchau kitai ila sama-sama bedau kabau
Tentu ila meruan bekau abi semilah.
JAKU SEBAR KE-5
Jaku sebar ti kelima, nyadi enti tua nya deka nanam pelasar jaku, sebedau tua berengkah mansutka jaku ti lebih panjai, sebengkah ari jaku sebar ti manah dikena tau iya munyi tu:
Aku ke bejaku ba daun aum tu baka nya ga,
Nemuai pan endang enda kala datai
Berandau pan kitai tu endang bedau;
Nya alai bejaku pan aku tu agi deka sanggu.
Nya alai, enti jaku aku tu
Tak didinga tinggi lagi, tau dipapal,
Enti iya baruh, nadai salah dipanggal,
Enti iya kelalu besai, tau disempiar;
Baka nya mega, enti kelalu mit, nadai salah dibintar.
Lalu enti iya pesuk lagi, besaup ga kitai nampal;
Lalu enti iya berega, sama-sama ga kitai nyual.
JAKU SEBAR KE-6
Jaku sebar ti kenam tu suah dikena lebuh kitai bejakuka sebengkah-sebengkah pekara ti dikenang kitai, lalu utai nya tekelalu mayuh sekalika tekelalu panjai, tang mih kitai ke nusui utai nya enggai kelalu nyebut iya enggau chukup enggau lenak, tang semina deka nyebut iya ngena jalai pandak sereta muntang, dia kitai ke bejaku nya tau ngaga lebas jaku diri munyi tu:
Tak asai ke enda ulih aku ngerambaika
utai tu kelalu panjai,
Laban utai nya enda alah tusi
Nunda Engkari deras dipudik;
Enda alah tiap,
Baka ke niap singkap mangkuk selantik,
Enda alah tiu
Nunda runtu ngempuru tisik.
Lalu jaku sebar ti sama reti ke seruran besarang ba dilah sida lemambang, ke sama tau dikena nya munyi tu:
Enda nya alah itung kitai sebuat,
Baka ke ngitung lempaung ngambungka batang;
Enda alai rintai bala kitai,
Baka ke ngerintaika tangkai jelai pengerang;
Enda alah tiap kitai empat,
Baka ke niap singkap engkerawai midang;
Enda alah tesa kitai lima,
Baka ke nesa laja juing pematang;
Enda alah sidi kitai menyadi
Jaku siti baka gelai Apai Maji
Ke nyeruri bubu duri,
Jai rimpi, timpang serengang.
JAKU SEBAR KE-7
Jaku sebar ti ketujuh tu manah dikena nyidir pengulih diri enti kitai dipaduka orang mangku pengawa lalu kitai nya ngasaika diri enda tentu tetangkupka pengawa nya, dia kitai tau besempama bejaku munyi tu, minta saup orang.
Aku tu nemu diri-empu endang chapin
Nya alai, baka perau, minta gandung;
Endang nemu diri ke patah baka duku,
Nya alai aku tu minta tampung;
Endang nemu diri simpak baka beliung,
Nya alai minta labung.
JAKU SEBAR KE-8
Jaku sebar ti kelapan tu dikena siku penusun enggau penyampai sebengkah program radio ti dikena iya melasar isi kenang enggau randau pasal dayaidup raban bansa Iban. Ku jaku iya:
Kami ngarapka kenang tauka randau dalam program Ngeratan Jeman tu ila ulih nuga ati enggau runding kita peninga –
Ukai nuga ngasuh kita nyida lalu muka bunga sembah,
Ukai nuga ngasuh ringat lalu angkat mai bejamah,
Ukai nuga ngasuh bebiuh lalu bekelikuh bebantaika penyalah;
Tang mih ngambika kita tau sama-sama ulih nyuling iya ke chiru lalu nyiuhka iya ke kamah; ngemetulka iya ke betuja lalu nyemela iya ke bejuntah; nepo iya ke jai lalu mutik iya ke manah; ngambi iya ke nguntung lalu ngelekaka iya ke ngenyalah mai penusah enggau pengiruh.
Nya alai, endang ke baka kitai munka pengawa
Indah enda baka kayu: enti bisi telinsu, bisi mega bunga;
Baka tapang, enti bisi manyi bisi mega rembia;
Baka sungai, enti bisi entigis bisi mega nanga.
Lalu jaku pan baka nya ga, enti bisi entelah, lebih manah iya enti ditambahka enggau buah leka sempama. Laban kenu ku tiu jaku sida ke tuai:
Enti jaku panjai manah enti orang nemu ngerintai, seraya ke kitai
berambai serimbai bungah.
Laban enti jaku kelalu pandak ditetak, nyadi endang iya nyadi
Tang enggaika sida ke nembiak, ke mending, mina tak gaga ria rindu ragak,
Bekerancho bekejegak
Bejaku ragak balat bejeragah.
Ujung-ujung kitai ke tuai tu digela orang pimpin burung beragah
Semina bejaku durah-durah
Udu kechah-kerah munyi ke dikirah, tang mina bisi jaku bungah
Suntuk pemanah, nadai buah leka sempama, ke tau dipeguna.
Tang mih aku tu enda nyalah-nyalah
Ari orang ke berumah di tanah renjan tebiang
Betiang udu runjing
Sigi nemu diri-empu ke begiut dipuputka ribut.
Baka orang ke ngelabuhka sauh di riam nunggang
Ulak nyegang senisi tebing
Sigi nyadang diri berunyut anyut disintak surut.
BETAMPUNG
Oleh JANANG ENSIRING