Tusun Ke-3
DALAM minggu tu kitai deka macha sereta belematika sebansa litaricha sanggah-dilah bansa Iban ti dikumbai “Jaku Sebar”, nampung iya ti udah dichelak dalam Tusun Ke-2 ti dichelakka dalam minggu dulu tu kemari.
Jaku Sebar chukup lebat bendar dikena besidir bejaku lebuh seiku-seiku Iban dipaduka bejaku di mua mayuh, baka ngelaluka penatai sereta ngenataika peminta ngagai orang besai (sida Menteri, YB Kaban Kunsil Nengeri enggau Parlimen enggau Kepala Opis Perintah), bejaku maya mela gawai adat enggau pengerami besai ti bukai, baka Pengerami Melah Pinang, Gawai Dayak enggau Gawai Selamat. Kebuah iya beguna amat dikena besidir bejaku sebedau mantaika pekara ti endang deka dikejaku, nya dikena dulu besabi nyangka jam ke bejaku lagi, leka penemu leka jaku tak bisi tesurung ngayanka penyumbung, telah ke bisa ngayanka penyangka, bisi telasur, bisi tekebur ti tau ngasuh ati peninga ensiban, bisi ngasuh jantung ensuda ngujungka laya.
Diatu Datuk Patinggi Sapit Kepala Menteri
Dibai kitai ke nembiak tu ngerambing belakang tinting,
“Tau,” ku iya, laban kitai ga udah tepedaka seling jalai betiki;
Datuk Patinggi dibai kitai ngeribang tebiang nunggang,
“Nya pan tau mih,” ku iya,
“Tang kitai anang rindang,
Takutka kitai terenchahka karang batu beranti.”
“Umbas endur kitai bebatak,” kenu ku iya
“Nunda unak pandung wi;
Patut endur kitai betarit nunda piet tali belati.
Laban, enti enda pia,
Sapa ke agi dianti ngansak kitai,
Ngidupka turai Jaku Iban
Nyentuk ke tiban paras degree?”
Nya alai, ku aku-empu:
Datuk Patinggi Alfred Jabu tu,
Dikumbai aku Beketan Manju, nitihka sema tuai;
Lama endar iya tu udah deka nguluka kitai bebubu.
Nya alai, ku aku, ke tu
Aram mih kitai besulu nirika tampun.
Agi mega Datuk Patinggi tu
Disemaka aku ngagai Aki Buku Tebu,
Sigi lama bendar YB Sapit Kepala Menteri kitai tu
Udah nudukka aum bebai nunu,
Nya alai, nadai kebuah kitai tu
Tau tak malu nuchulka sempun.
Terima kasih.
JAKU SEBAR KEEMPAT
Jaku sebar ti keempat tu enggi siku YB Kaban Kunsil Nengeri sebedau iya mantaika siti keretas-kereja ti bejulukka ‘Litaricha Sanggah-dilah, Ngepan, Tanda enggau Musik Iban’ ba sebengkah seminar dayaidup.
Nya alai, endang ke baka kitai munka pengawa
Indah enda baka kayu: enti bisi telinsu, bisi mega bunga;
Baka tapang, enti bisi manyi bisi mega rembia;
Baka sungai, enti bisi entigis bisi mega nanga.
Lalu jaku pan baka nya ga, enti bisi entelah, lebih manah iya enti ditambahka enggau buah leka sempama. Laban kenu ku tiu jaku sida ke tuai:
Enti jaku panjai manah enti orang nemu ngerintai, seraya kitai
berambai serimbai bungah.
Laban enti jaku kelalu pandak ditetak, nyadi endang iya nyadi
Tang enggaika sida ke nembiak,
Ke mending, semina tak gaga ria, rindu besak,
Bekerancho bekejegak
Bejaku ragak balat bejeragah.
Ujung-ujung kitai ke tuai tu
Digela orang pimpin burung beragah
Semina bejaku kechah-raah
Udu kerah-kerah munyi ke dikirah,
Tang semina bisi jaku bungah,
Tang nadai buah leka sempama.
Tang mih tudah pangan tu enda nyalah-nyalah
Ari orang ke berumah di tanah renjan tebiang
Betiang udu runjing
Sigi nyadang diri ke begiut dipuputka ribut.
Baka orang ke ngelabuhka sauh di riam nunggang
Ulak nyegang senisi tebing
Sigi nyadang diri ke berunyut anyut disintak surut.
Nyadi aku ke bejaku tu mantaika Keretas-kereja “Sastera Lisan, Pakaian, Tarian dan Musik Suku Kaum Iban” tauka “Litaricha Sanggah-dilah, Ngepan, Tanda & Musik Iban”, dipinta pengatur seminar tu, kelebih agi YB Datuk Patinggi Tan Sri Jabu, tang mih tudah aku tu amat numbas bendar penemu pasal pekara ke deka dikejakuka. Taja pia, aku tu tak rindu nyambil gagit bejakuka pekara tu ke besai amat rampa sereta beguna amat ba raban bansa kitai-empu.
Nyadi mayuh orang
Deka bebelit nengah belakang bukit
Tang kitai ke mit tu
Endang udah kena pesan niang aki kitai Sabit Bekait menya;
Tak semua kitai nembiak mit tu tadi
Enda diasuh iya kelalu bebelit
Enggaika tumbit kitai kena rarit batu betaji.
Bisi ga orang nya tadi
Rindu deka nyelam riam dalam
Tang kitai ke mit tu
Endang udah kena pesan Apai Makam
Enda nyagi kitai nyelam riam dalam
Enti kitai nadai bebekalka kelam,
Enggaika kitai tesengkuranka palan Raja Genali.
Nya alai Unggal, Menyadi
Kala adat kitai apin kelalu tachat
Cherita enggi kitai agi ditemu leka
Kala penemu enggi kitai agi ulih adu
Diksionari enggi kitai agi ulih dipenyadi
Litaricha enggi kitai bansa masih ulih kelala;
Ari nya, daya-idup Iban tu, indah enda baka perau
Enda tau nadai pengkalan
Baka burung, enda tau nadai penepan
Baka jelu mesti meruan jelan,
Nya ke endang dikedekaka kitai magang.
Nya alai aku mai kitai
Anang maluka main asal,
Jalai pendiau enggau dayaidup bansa diri;
Mai kita nya setapa sejari
Sedada seati, sebetis sekaki
Niti nali daya-idup bansa diri
Ke tanda kitai nya bisi identiti,
Bisi bansa kediri empu.
Nya alai kitai mayuh ke datai ditu baka ke seharitu
Ke datai ari ulu, ari ili, beseminar ditu:
Sekilir kitai tu, kenu ku aku, ngena ansah
Kawah benung engkah.
Ari nya, enti batang nya besai,
Besaup kitai sebuat nyan;
Enti lubuk beteluk
Kitai bela nyelam
Nya baru iya tau nyemia tampak terang.
Nya alai, aku mai kitai sebala tu
Anang takutka ribut,
Anang rawanka ujan,
Anang rarika api
Anang chengangka gumbang;
Laban enti nyema kitai tak karam,
Dia alai karam, dia ga alai betimba;
Dia alai parai, kenu ku jaku tuai
Dia ga alai bebaya.
Enti sema munsuh munuh,
Ringka ga alai disalai
Enti antu nemu,
Sebayan ga ngambi parai.
Laban enti kitai nyau deka surut
Dia kitai tau tachat adat, jaku tau pimpat,
Limpang enda tetitihka enggi orang;
Enti kitai lenyau cherita, kitai lenyau menua
Enda teambuka tanda Tatai Kelingkang;
Enti kitai lenyau jaku, kitai lenyau ambu menua tu
Ari Lundu nyentuk ke Limbang;
Lesap litaricha, nyau bansa
Nadai rega satu-apa
Dalam puncha mata undang-undang.
BETAMPUNG