![](https://utusansarawak.com.my/wp-content/uploads/2022/09/image-68-1024x757.png)
AWANG Rawing seiku Bujang Berani Iban diberi basa penuh enggau adat soldadu ketegal pemerani iya
ngelaban munsuh maya perang konfrantasyen ngelaban soldadu Indonesia.
Tusun Ke-28
JAKU IBAN: Sada Bebuah dalam Tusun Ke-29 tu, alai penulis mantaika serebana ati diri pasal pengujung umur siku anak indu iya ke betu dikesayauka iya, sida sebilik enggau semua kaban belayan, bakih pangan iya ti ke ulu enggau ke ili. Sada bebuah ti bepejulukka “Pengujung Umur” diturai penulis lebuh anak iya udah genap 100 hari netas kaul diri enggau dunya injau tu, ke alai iya ada, besai, numbuhka ruang-bilik enggau ninggal laban kena kangauka Petara ke Pemadu Bekuasa enggau Iya pulai ke menua baru, iya nya siti menua ke penuh laban pengudus, ke alai perayat Iya nadai nemu sakit lengit, aus lapar, merinsa mensena, tusah tasah, kachau bilau, tang semina malar ngasaika pendiau enggau pengidup ke senang lantang sepemanjai jeman.
PENGUJUNG UMUR
Pengujung umur datai ngeresau
Enda usah dipesan, enda ibuh dikangau;
Ngiga dengah baka ke ngayau,
Sambar iya terus orang ke dikesayau.
Indah enda baka injin pengetau
Reda keresau, dipampat magang.
Badu betampil, badu beringgap,
Enggau perua tu ke diinjau sekejap;
Badu dipelemati, badu dikeingat,
Putus mih kaul, putus mih sempekat,
Sempama ubung, lenyau jerumat,
Sempama pisang beserara enggau sikat,
Semina ke cherita, semuti ke hikayat,
Ambi ke pengingat, pelasar kenang.
Anchur ati merening sarang,
Besampak pirak, logam bejerantang,
Kurung cheremin, belapik linen, setera beselang,
Mua sesela, tubuh dah rumbang,
Tak baka ke tinduk, nugauka siang,
Taja ke tinggal, umbang ke puang.
Berasal ari debu, pulai ke tanah,
Ke menua baru, ayu iya bepindah,
Kami ke tinggal, sedanah tusah,
Iya ke ngejang, nama dih penusah,
Diiring kenang, sampi enggau sembah,
Ditambah enggau surah, leka sembiang.
Iman, pengarap tumbuh nyeratan,
Baka penerang Bintang Selatan;
Taja tubuh bebejur di pendam,
Ayu ‘dah angkat, ninggalka Sebayan.
Semengat enggau Roh ‘dah entudi Tuhan,
Enda bekian, ninggalka pemetang.
Senuan enggau kubur pengetu di dunya,
Di perut tanah, galai sementara,
Ingga dia, dikemataka Petara,
Diangkatka Jesus Keristus pulai ke Serega,
Lebuh iya datai kali kedua.
Becharaka dusa, nimbang pengerunggang.
Kami ila betemu baru,
Enggau asi tu, ke dulu tinduk tumu,
Di perua dunya baru,
Mengeri baik, udu chiru,
Nadai dusa, kudus selalu.
Din, kami nadai pengeleju,
Nadai penusah, nadai penyinu,
Berami begagai, begulai besulu
Gayu ratu baka batu galang melintang
AGE’S END
Age’s End forces its way up
Without order, without warning;
Searching for victims as if warred,
Sweeping through the sorrowful.
So much like a reaping machine
Hews gifted branches, cuts them whole.
Stop the ritual, leave off touching down,
In this fast, borrowed world;
Forget it, cast it from memory,
Break, yes, break that tie, that pact,
As a thread loses its needle,
A fruit sheds its peel,
What’s left is just history, a tale
Told by memory.
Looking at the coffin with a dissolving heart,
Gilded in silver, studded with metal,
Encased in a glass chamber,
Slipped under slanted silk — a woven shroud
With a blooming face and lifeless torso
As if sleeping, by day
What remains is an empty shell.
Beginning from dirt, returning to soil,
the soul migrates to a new kingdom.
We who remain, remain troubled.
But she departs forever, bothered no more,
Lead by remembered hands in praise,
Guided by a heavied heart in honor,
Endowed with words of Scripture and seeds of prayer.
Faith and belief rise brilliantly
In the shadow of all Southern Stars,
And while the body lies eternal, in rest at the grave,
The spirit has risen, leaving the Underworld.
The soul with the Holy Spirit follows God,
Willing enough to leave its darknesses.
The grave, like the tomb, is a resting place on earth,
Inside its womb lies the in-between —
Loitering there in the presence of God,
A priceless jewel to be lifted by Jesus Christ to Heaven
During his Second Coming,
Judging sins, purging injustices.
We will meet again
You who are loved, you who has been called for an early sleep
In a new kingdom, a new life
A peaceful country, a serene tranquility,
Living with no sin, always holy.
Up there, we’ll never grow bored,
There will be no hardship, no suffering,
Celebrating merrily, peacefully
Long-lived, as ageless as an unmoving rock.
Dikena nangkir sada bebuah ti dikumbai “Pengujung Umur” tu tadi, diatu pemacha mayuh deka dinahka segenteran ti enda panjai sada bebuah ti bepejuluk “Enti Anak…”. Siku ahli filosafah ke benama John Locke nyemaka minda siku-siku anakmit ke baru ada ke dunya tu ngagai tabula rasa. Reti rambaijaku tabula rasa nya sesingkap batu alus ti alai orang kelia nulis. Ku John Locke, teori tabula rasa tu ngumbai minda siku-siku anak mit ke baru ada endang agi kusung, tang lebuh iya mansang besai-sebesai dia minda iya lalu belubah-lubah diisi penemu ti datai ari utai ti bekelingi enggau iya, baka ari tunjuk-ajar (upbringing) apai-indai iya enggau tujah pengidup (experiences) ti diasaika iya. Dalam sada bebuah “Enti Anak…” alai kitai deka macha sereta belematika baka ni penyadi enggau pemansang minda siku-siku anak mit ke nerima tunjuk-ajar ari apai-indai iya.
ENTI ANAK
Pemansang anak nitihka kambuh,
Penyadi nembiak nitihka sepuh;
Pemansang anak nunda sidan,
Penempa nembiak nitihka chuan.
Enti anak duduk dalam kutuk, iya belajar berunding bingkuk, nyadi crook.
Enti anak bediri dalam dengki, iya belajar keru ati nyadi pemuli.
Enti anak engketut dalam penakut, iya belajar reput, buyan ngeleput.
Enti anak selalu dikemeli, iya belajar enda bebasaka rega diri.
Enti anak diau dalam kepapas, iya belajar beperangai ganas, nyadi pengerapas.
Enti anak selalu diberi malu, iya beperangai sereba enda nemu, ulah jelekah selebubu-iru, selalu ditinggang tunggu.
Enti anak diau dalam penyayau, iya belajar enda ngaga pengachau.
Enti anak duduk rebangkang dalam peransang, iya belajar ngulihka pengelantang, ngiga pemenang.
Enti anak diau dalam penan ati, iya belajar nyadi mensia mereti, gerinti berani.
Enti anak diau dalam puji, iya belajar nemu malas budi, ngingatka danji.
Enti anak diau beterekun dalam pengangkun, iya belajar nyadi pengimpun/pengibun.
Enti anak nyandar dalam pemendar, iya belajar ngulihka pemintar, nangga ikhtiar, ngiga akal.
Enti anak diseridi diau bekunsi, iya belajar idup beberi, enda nengali.
Enti iya diau dalam pengerurus, iya belajar beperangai alus, nemu betebus.
Enti iya diau enda disiping, iya belajar idup betawing, nyeliahka pemingking.
Enti iya diau betempat dalam penelap, iya belajar bejimat cheremat, betungkatka adat, belalauka sempekat.
Enti iya diau dalam pengelikun, iya belajar nemu angkun, bisi pengimun.
Enti iya diajar besulu bepangan, iya belajar ngingatka terunan, siru enggau kaban belayan.
Anak sempama tabula rata,
Tau dichat, ulih diwarna
Tau disunting, ulih dikeliko.
Anak sempama seseta kain setera putih,
Tabak warna sepeneka milih,
Tau dichura, ulih dijalih.
BETAMPUNG
Oleh JANANG ENSIRING