Skip to content

UTUSAN SARAWAK

SUMBER MAKLUMAT ERA BAHARU

Primary Menu
  • LAMAN UTAMA
  • IKLAN
  • SEMASA
  • WILAYAH
    • Selatan
    • Tengah
    • Utara
  • TEMPATAN
  • NASIONAL
  • INSPIRASI
  • KESIHATAN
  • ADVERTORIAL
  • RENCANA
  • TEKNOLOGI
  • PENDIDIKAN
  • BISNES
  • MAHKAMAH
  • JENAYAH
  • KEMALANGAN
  • KEBAKARAN
  • KOLUM
  • GLOBAL
  • SUKAN
  • WBS
  • Home
  • SADA IBAN
  • JAKU IBAN: Sada Bebuah
  • SADA IBAN

JAKU IBAN: Sada Bebuah

Utusan Sarawak 3 years ago

Tusun Ke-13

EMPELAWA SEDUAI KECHUYU

Minggu ba Tusun Ke-13 tu, dia ruang JAKU IBAN: Sada Bebuah ba dada surat-kabar Utusan Sarawak (SADA) tu diisi kitai ngena genteran sada bebuah ti bejuluk Empelawa seduai Kechuyu: Bebadi Ketegal Mansau Puji. Dikena muka randau sekali tu, diatu penulis deka mai kita pemacha mayuh nguji beratika sikap, perangai, enggau ulah ti bisi bekelemayang dalam genteran sada bebuah nya, lalu nguji nyelam ajar ti bisi teselit dia.

Iya ti dikumbai ‘empelawa’ nya iya nya sebansa utai idup ti bisi empat pasang kaki sereta landik amat mukat. Pukat nya dikena iya mukat indu utai ke pemakai. Nama saintifikik empelawa disebut tarantulas. Ngagai ti diatu, bala entomologists (saintis ti landik pasal indu utai) udah tetemuka sereta bulih 1,010 bansa empelawa ti bisi idup di dunya tu. Lalu ‘kechuyu’ nya lekajaku ti siti da dikena nyebut langau.

Diatu kitai lalu berengkah berandauka sada bebuah Empelawa seduai Kechuyu: Bebadi Ketegal Mansau Puji, tu. Nyadi hari siti, meda kechuyu mansa terebai, empelawa ti benung mukat lalu nanyaka penunga iya bejalai.

TANYA EMPELAWA NGAGAI KECHUYU

“Oh, kini ke penemuai, tunga pejalai, uing luan

Nuan dih akan, Kechuyu Kaban,

Meda punggung landung enggi nuan

Jendung-jendung nangkin sarung pedang besuran;

Pala enggi nuan tak repa

Linga-linga ujak lelaga bulu kenyali papan;

Belakang kilak kayang, antap kelatang baju besulam?”

SAUT KECHUYU NGAGAI EMPALAWA

“Ehh, sigi baka kereja aku ga baka tu

Unggal Empelawa Jawa:

Nama kedang semansang, bulan tumbuh baru baka tu

Nyawa aku tak menawa pansut au

Tesiumka bau pekasam baya;

Nyerumba pemansang kedang

Bulan ke nyumbuk, perenama nyentuk

Nyawa aku tak bagas gauk,

Gila tetenguk ke pachak keruntuk pala naga.”

TANYA EMPELAWA BARU

“Enti nuan tak pansut au, wai entipu,

Lalu lah, ngentu, wai angu

Meruan sebenda runggu enggi aku dia

Pachak naga, pekasam baya

Budu nyala jelu padi baru;

Enti nuan tetenguk deka makai

But semah pekasam tapah

Meruan nya dia setajau setengah

Sigi runggu, sekebuk batu,

Niki mih, lalu!”

SAUT KECHUYU BARU

“Oh, enda alah aku nyau ngayahka

But tapah pekasam semah, enggi nuan unggal,

Semata enda pemayuh di Sungai Kuah, Telaga Darah

Meruan mirah lampang pah

Bedau dijamah apin ditegu;

Di Tuchung Lumbung Salar Sentubung

Meruan beletung, agi meledung dilunang beru.”

SAUT EMPELAWAM SEKALI AGI

“Anang pia, Unggal Kechuyu Terebai,

Niki mih, lalu!

Peda nuan penyarak rumah pandak enggi aku

Terang tampak, besulam pirak benang biru;

Jementa beria-ria lambar setera ubung bekelayu;

Tangga rarit, turun tarit, gemerit,

Bebelit-belit manah sanggit, kaul seribu

Nanggam ke pan jempayan lintang, sadau lantang.”

Kechuyu lalu madahka kebuah alai iya enggai dilaluka Empelawa niki:

“Oh! Oh! Terima kasih, unggal Empelawa,

Terima kasih, wai pangan.

Enda aku niki, wai akan.

Tak malu aku di lempedu tulung supan

Tak takut, riput rawan

Tedingaka berita disebut ribut, diramban ujan

Tak semua sida ke udah tetunjanka tangga nuan

Nadai siku enda meragan, tepagang mengkang

Danjan tekangkang.”

Ninga nya, Empelawa lalu nimbal. Ku iya:

“Oh, anang pia, wai menyadi Kechuyu Bujang.

Enti diri enggai ke sadau,

Lalu niki mih, ke rumah panjang, aku kitu.

Iga ga nuan enggai nguji duduk nugau

Besila di atas panggau, enggi aku nyin

Ke begurau tuntun pinggang.

Nemu nuan?

Sebarang sapa ke buya duduk dia

Enti tubuh iya chelum,

Tau burak tampak bebendang;

Enti tubuh iya kurus,

Tau bebali gemu, mansang lemunang;

Enti tubuh iya bungkuk,

Tau rurus baka ke dikedang

Neladan batang sumpit kirai”.

Bejaku baru ga Kechuyu nimbal Empelawa. Ku iya:

“Terima kasih, wai Empelawa Beruk

Ining empating lulai ngumbuk.

Tak malu aku di lempedu kandang rusuk

Tak supan, tulung enchuyuk,

Tedingaka berita dibai empada, ditusi nyamuk,

Tak semua sida ke udah besila, nugau duduk

Di genturan papan panggau rasuk, enggi nuan nya

Nadai siku enda udah jengkara laya tepuruk

Dilangup tikai, digiling lantai.”

Ninga Kechuyu enggai diasuh iya niki, dia Empelawa lalu ngelinai iya. Ku Empelawa:

“Hai, unggal Kechuyu Nelap,

Akal pintar, bejaku tau besilat-silat,

Gamal ga sintal tulung tegap,

Chukup pemujang tulung sigat,

Nyemak cheremin tu nuan patut inggap

Ninjau diri-empu beamat-amat,

Baru nuan ngelala diri-empu

Jauh sigat ari lalat, gap ari sempepat

Bekekijap, mijar bekebelap

Ensara pemetang.”

Tang Kechuyu apin ulih kelinaika Empelawa. Iya lalu nimbal baru, udah nya lalu terebai rari.

“Hai, Empelawa anda, raja penemu

Landik bejaku bepujuk rayu

Pandai ngelumai betipu-tipu.

Udah ki ini!

Mupuk aku.

Pagila lusa betemu baru.

Yio! Yio! Sayonara!” (Sayonara tu lekajaku Jipun ti mai reti ‘selamat tinggal’).

Empelawa enda ibuhka diri ke dikerarika Kechuyu. Iya lalu belabuh melandai betebah nyawa ngelinai Kechuyu. Sambil iya ngelinai, iya terus nyanggit-senyanggit pukat, ka dikena iya mukat Kechuyu.

BETAMPUNG…

Oleh JANANG ENSIRING

Continue Reading

Previous: Novel: Ensera Wat Bujang Sugi
Next: Nyelai Tang Amat

Arkib

  • TERMA & SYARAT
  • PENAFIAN
  • HUBUNGI KAMI
Utusan Sarawak By Warta Niaga Sdn.Bhd | MoreNews by AF themes.