BHAGAVAD GITA
Tusun Ke-10
MINGGU dulu tu kemari kitai udah macha sereta belematika enggau penuh segenteran sada bebuah ti dikumbai “Perangai Pemabuk”. Bacha kitai mega baru mungkal sada bebuah ti bejuluk “Masih Begiga”. Nya alai minggu tu ruang JAKU IBAN: Sada Bebuah ba dada surat-kabar Utusan Sarawak (SADA) tu diisi ngena genteran sada bebuah ti bejuluk “Masih Begiga.”
“MASIH BEGIGA”
Udah aku bacha drama Shakespeare, ensera Homer;
Mahabharata, Ramayana, Bhagavad-gita;
Udah ku sebut salin pantun Lord Tennyson,
Emily Dickinson, Charles Dicken;
Udah aku serenih alus pantun Erasmus, Wordsworth, Robert Frost;
Udah aku peratika “The Praise of Folly”,
“The Tales of Canterbury”,
“The Odyssey”, “The Divine Comedy”
Karang Machiavelli, Dante Alichieri;
Tang masih ga diri tu agu mati
Bedau mereti ngarang nengkebang!
Udah aku gulu randau Conficius,
Pengajar anda jeman dulu,
Ngajar basa enggau pengelabuh jaku.
Segulai sejalai, gawa beserumpu,
Duduk besemuka, bejaku betiu
Di baruh jumpu Timbuk China.
Aku ampit ningaka ajar Gautama Buddha
Ajar pengerurus nuju NIRVANNA
Duduk besendi, betunga mua
Di baru Kayu Penemu, Jambu Lipa.
Tang agi ga diri tu babo, masih banga,
Mengkang bangang, lansang kedumbang.
Suah aku silak, aku bacha selalu bup penemu,
Bup Injil – Penyanggup Lama, Penyanggup Baru,
Bup Pericles, Aristotle, Plato, Amaru,
Ku putik, silik aku perundingka bup I-Ching
Tang masih ga ati diri tu
Enda beseling, rapa perening,
Buntu runding, meretika kuing, sagam besembiang.
Aku udah tinjau mayuh pulau,
Aku udah palik mayuh tasik,
Aku udah perati mayuh mengeri,
Aku udah sada mayuh menua;
Aku udah dingaka semua ke patut aku pending;
Aku udah peda semua ke patut aku perening;
Aku udah kereja semua ke patut aku gaga,
Aku udah pansik semua ke patut aku giga,
Aku udah kambuh semua ke patut aku tempa,
Aku udah kunyah semua ke patut aku ginya,
Aku udah pakai semua ke patut aku empa,
Aku udah ludah semua ke patut aku lua,
Tang masih beketu ga gaya,
Minda masih kabat, ati masih muntat.
Minda masih puang, ati mengkang nyelambang.
Umur udah tuai, penemu masih nadai.
Enti sema aku tau ajih, ati nemu ngatur, sigi aku ajihka,
Awakka rebak biak nyadi ba pengujung umur,
Ngambika semua iya berengkah baru, nelusur besulur.
Aku udah ditu kenyau ari mula,
Mengkang ditu sampai ke dia,
Masih ditu takar ke ila,
Nyentuk ke penyudah maya, pengujung dunya,
Laban ke dituntut apin segera,
Ke diamal apin nyengenda,
Ke digiga apin nyata,
Bedau nyerupa, mandang rerendang
Bepijar terang.
PASAL PENGIDUP ENGGAU TENGKIRA
Pekara ti disempamaka dalam sada bebuah tu iya nya pasal pengidup enggau tengkira “Masih Begiga” dalam pendiau enggau pengidup, semua utai (baikka nya penemu, pemisi, pemakai tauka utai bukai) enda tau chukup, enda tau genap, mesti bisi dikekurang/diketimpang, berindik ari ati, penenguk mensia ke enda nemu puas, enda nemu tepantup, enda nemu terentuk. Ari nya, genap iku mensia mesti seruran bedaya, betengkira nyanda, ngiga, ngulihka utai ti dikenadai/dikekurangka diri, keba Jaku Dalam bisi nyebut: (1) Diberi sechupak, minta segantang; diberi segantang, minta sepasu’; (2) Diberi setunjuk, minta sekilan; diberi sekaki, minta sedepa; (3) Diberi betis, minta pah.
Lalu dalam sampi, orang nyebut: minta mudah, minta gerah; minta lebih minta lilih. Jaku nya jelas enggau nyata nunjukka iya nya ati/pengasai/penenguk mensia sigi enda nemu puas, enda nemu terentuk. Ari nya, mensia begigaka utai ti dikekurang/dikenadaika diri-empu. Nya mih batang pekara ti disempamaka dalam sada bebuah ke dikumbai aku “Masih Begiga” tu.
Dalam rentayan kesatu sada tu nyebut:
Aku udah ditu kenyau ari mula,
Mengkang ditu sampai ke dia,
Masih ditu takar ke ila,
Nyentuk ke penyudah maya, pengujung dunya,
Laban ke dituntut apin segera,
Ke diamal apin nyengenda,
Ke digiga apin nyata,
Bedau nyerupa, mandang rerendang
Bepijar terang.
MENGKANG BISI DAYA SEAGI IDUP
Nyadi pekara ti disilupka dalam rentayan Ke-1 tu, iya nya, seagi-agi tua nya dapat, seagi-agi tua nya bepengerai, seagi-agi tua nya idup di dunya tu, tua mesti agi bedaya, bekiraka utai ti kesuntuk/dikenadaika diri, (kelebih agi penemu ke menuku ke beguna bisi rega) laban penadai, penimpang enggau pengurang dalam pengidup endang sigi mayuh.
Dalam rentayan kedua Sada Bebuah tu nyebut:
Aku udah mendingka kensung burung semelayung,
Angin begemung, barat betinung,
Mendingka pelandai karung, madu ranggung, ribut nyabung,
Mendingka sangin buntak lilin, ikan patin, angin bepusin,
Mendingka tiu jaku, sangkut mulut ikan bekut, buntak dut, ribut bepuput,
Mendingka sanggai mendu ilai, beruang rambai, angin lemai,
Mendingka gugu gumbang beduju, guntur bederu, angin beguru,
Mendingka renung bala tekuyung, madu ranggung, barat Begemung,
Rengguang kampung, ribut nyabung,
Mendingka sugi kenyali danji, teras kawi, buluh beteri, angin begili,
Mendingka sajak ikan juak, burung engkerasak, lenggang riak,
Mendingka dungai engkatak ratai, semah sungai, riam gemisai,
Kesut selulut ribut ngesai;
Tang lalu nadai ga nya
Ngasuh ati aku semeri tebansi, tepulai hyamai,
Senang teperindang;
Bedau ga kamai aku tak rimai meragai,
Berendam dalam, meragan kusang.
BETAMPUNG