Tusun Ke-9
MINGGU nyin kemari kitai udah macha sereta belematika segenteran sada bebuah ti dikumbai Bup. Lalu minggu tu ruang JAKU IBAN: Sada Bebuah ba dada surat-kabar Utusan Sarawak (SADA) tu diisi ngena genteran sada bebuah ti bejuluk “Perangai Pemabuk” segenteran da ti dikumbai “Masih Begiga”.
Tang sebedau kitai berengkah macha sada bebuah ti dikumbai “Perangai Pemabuk”, dulu agi tu penulis deka meri seleka-dua jaku besabi ngagai pemacha mayuh, nyangka ti bisi ngibun tebiat ti bansa tu. Tuju sada tu dikarang ukai deka besalah sekalika bejaika tudah ke pengirup takar ke nyau temabuk-mabuk, enda nemu nyekat diri, ti dipantunka sida ke tuai lebuh berandau enggau pangan diri ti munyi tu: “Baka apung lunggar tasa.” Sada bebuah tu semina nguji ngambarka pendiau, ulah enggau perangai siku-siku mensia lebuh mabuk, ngambika bisi diperatika sida maya ke gerai nyamai, ngichaka ulih ngubah ulah diri empu menyanaka agi awakka bisi ke puku nerenak basa diri enggau basa orang bukai ba sida. Karang tu ukai ngenang sida ke mabuk betimpuh maya begawai enggau pengerami bukai, tang chundung agi ngagai sida ke mabuk betampung-benung, laban pemabuk ti bansa tu, nya ti balat pulaika pengerusak ba mayuh bengkah sapar pengidup diri empu enggau diri sebilik ke enggau besebilik. Nya alai, ambi mih leka sada tu jadika ajar enggau malin dalam pendiau enggau pengidup, enti iya patut, ku ati diri-empu.
“PERANGAI PEMABUK”
Ngenang aja kitai pasal orang mabuk,
Ukai deka ngachuk, ukai deka ngutuk,
Ukai deka mantah, nadai mimpi deka betenah,
Ukai deka ngemeli, nadai ati deka bejai.
Lain ga pendiau orang mabuk:
Bemua muyur-muyur,
Bedilah jelur-jelur,
Berinsak kelur-kelur,
Beliur melulur-lulur,
Meda palur-palur,
Bejaku ngalur-ngalur,
Nyaut kedul-kedul,
Beludah kechur-kechur,
Bejalai giur-giur;
Bediri layur-layur,
Duduk katur-katur.
Lain perangai orang mabuk:
Iya bediri giai-giai,
Ke kanan kiba, iya deka nyelelai.
Ganchil nyipak sebarang utai;
Suah ka tesudu, tesangkut ba tikai.
Angkat engkawit, maut pemanggai.
Beludah sengapa, enda pilih alai,
Endit enggau tumbit geladak enggau tikai.
Pengamah enggau mutah duduk dibalai,
Tunjuk nicho sebarang alai,
Lengan dikedar, jari ditantai;
Duduk melekuk, suah lelangai,
Mata melintu, tinduk enggai.
Orang ngumbai iya mabuk, iya ngumbai empai.
Butul iya kaul, gelas iya pegai,
Ngelilih-sengelilih, arak chap GAWAI,
Ngelangak-sengelanggak takar ke rebah rimpai malai tikai.
Pending orang mabuk nyangka melintang reti,
Seleka jaku rara, nadai dikasi,
Tegur diri sebilik, nadai dipeduli,
Jaku tagang, kumbai iya muji,
Tegur siru, ngasuh iya pedis ati.
Orang ketawa, dikumbai iya ngelese,
Orang berami, dikumbai iya nyemale
Orang berandau, dikumbai iya melinte,
Angkat iya nyida, lalu ka mante.
Mata orang mabuk, rapa peda,
Dunya bebintang, bechura jila,
Tiang sebatang, baka ke gembar lima;
Rumah kekayang, ruai kekua,
Orang ketawa, baka ke ngeramba,
Ulah ke manah, dipeda baka kera.
Mulut orang mabuk, tusah disimpul,
Bejaku nekang, kelambang, tekebur,
Mayuh bula, mimit ke betul.
Madahka diri kering laban bisi tisik pangkur,
Belandikka pengaya, duit penuh bakul,
Muji diri berani, napi pistol,
Mayuh degree, besai gaji, gawa jadi mandur.
Ngumba amat ga pejalai orang mabuk:
Bejalai nyingkang surut,
Gile-gile, lepe-lepe, lebut-lebut,
Rebah rimpai, gui-gui, giut-giut,
Tebidaka tuga, tesangkutka rumput.
Ngambi jaku pulai,
Mayuh ga orang mabuk enda kudi,
Ngirup amat ngirup, tang nemu nyekat diri.
Iya badu, nyepi nyau umbas bai.
Iya enda bejaku jai, beulah beli,
Terus duduk, melentuk ngantuk, lalu gali nat diri.
Dani tinduk, lalu mandi.
Diberi orang arak baru, madahka diri enggai agi,
Atau nyau lelui, mulut lembau nyepi,
Semina negu enggaika puni —
“Udah ki-ni!”
Lalu Sada Bebuah ti kedua tu diberi pejuluk “Masih Begiga”.
“MASIH BEGIGA”
Aku udah ditu kenyau ari mula,
Mengkang ditu sampai ke dia,
Masih ditu takar ke ila,
Nyentuk ke penyudah maya, pengujung dunya,
Laban ke dituntut apin segera,
Ke diamal apin nyengenda,
Ke digiga apin nyata,
Bedau nyerupa, mandang rerendang
Bepijar terang.
Aku udah mendingka kensung burung semelayung,
Angin begemung, barat betinung,
Mendingka pelandai karung,
Madu ranggung, ribut nyabung;
Mendingka sangin buntak lilin, ikan patin, angin bepusin,
Mendingka tiu jaku ikan belau,
Sangkut mulut ikan bekut, buntak dut, ribut bepuput;
Mendingka sanggai mendu ilai,
Beruang rambai, angin lemai;
Mendingka gugu gumbang beduju,
Guntur bederu, angin beguru;
Mendingka renung bala tekuyung
Madu ranggung, barat begemung
Rengguang kampung, ribut nyabung;
Mendingka sugi kenyali danji,
Teras kawi, buluh beteri, angin begili;
Mendingka sajak ikan juak,
Burung engkerasak, lenggang riak;
Mendingka dungai engkatak ratai,
Semah sungai, riam gemisai
Kesut selulut ribut ngesai;
Tang lalu nadai ga nya
Ngasuh ati aku tebansi, mereti tepulai nyamai,
Senang teperindang;
Bedau ga kamai aku tak rimai meragai,
Berendam dalam, meragan kusang.
BETAMPUNG